«Ինձ համար անակնկալ էր այս թիմը». Ժաննա Բուտուլյանը` «Շանթ»–ում խաղալու և փոփոխությունների կարիքի մասին

Դեռ ամիսներ առաջ Tert.am Life–ն իր ընթերցողներին հայտնել էր, որ «Շանթ» հեռուստաընկերությունը նոր հեռուստանովել է նկարահանում, որտեղ սիրային եռանկյունի է ձևավորվել դերասաններ Մարիամ Ալեքսանյանի, Կարեն Ասլանյանի և Ժաննա Բուտուլյանի հերոսների միջև։

Հուլիսի 2–ից եթերում սպասվող «Այրված անուրջներ» հեռուստանովելում Ժաննան առաջին անգամ խաղում է բացասական դեր։ Նոր աշխատանքի մանրամասներն ու իր ակնկալիքներն դերասանուհին առաջինը պատմել է Tert.am Life–ին։

Թամարիկի կերպարը Ժաննայի համար հետաքրքիր է, քանի որ առաջին անգամ է ներկայանալու ընդգծված բացասական դերով. «Մինչև այս խաղացածս բոլոր դերերն ունեցել են իրենց բացասական գծերը, սակայն, ընդհանուր բնութագրով, դրական են եղել։ Ինձ համար ավելի բարդ կլիներ, եթե կրկին դրական կերպար խաղայի։ Բացասական դեր խաղալն ինձ համար և՛ պատասխանատու է, և՛ հետաքրքիր։ Նկարահանումները նոր ենք սկսել։ Հետագայում ավելի շատ բան ունեմ խաղալու։ Հուսով եմ` պատվով դուրս կգամ այդ պատասխանատվության տակից։ Արդեն տրամադրվել եմ բարդ տեսարաններին, քանի որ գիտեմ` ինչպես են զարգանալու իրադարձությունները և ինչ հանգուցալուծում է ունենալու կերպարս»։

Ժաննայի փոխանցմամբ` ինքն իր խաղին քննադատորեն է վերաբերում, այդ իսկ պատճառով չի կարող գնահատել, թե ինչպես է իր մոտ ստացվում կերտել բացասական կերպարը. «Հարաբերություններում այդքան բծախնդիր չեմ, բայց աշխատանքում շատ բծախնդիր եմ։ Երբեք գոհ չեմ լինում իմ աշխատանքից, միշտ ինչ–որ թերացում գտնում եմ»։

Քննադատությունները երբևէ չեն շրջանցել դերասանուհուն։ Հեռուստադիտողները հաճախ նույնացնում են դերասանին իր կերպարի հետ, հարցին` մտավախություն չունի՞, որ բացասական կերպար խաղալու դեպքում հասարակական վերաբերմունքն իր հանդեպ կփոխվի, Ժաննան պատասխանեց. «Կարծում եմ` շատ  ճիշտ պահի եմ խաղում բացասական կերպար։ Մի բան է ճանաչվել բացասական կերպարով, այլ բան է խաղալ բացասական կերպար այն ժամանակ, երբ հեռուստադիտողը հասցրել է ճանաչել ինձ։ Տարիների ընթացքում իմ մասին եղել են հակասական կարծիքներ, սակայն լսարանն իմ մասին ունի ամբողջական պատկերացում և այդ կերպարով չի ճանաչելու ինձ։ Կարծում եմ` իմ կերպարը կընկալեն որպես կերպար։ Իհարկե, կլինեն նաև բացասական կարծիքներ, ինչը նորմալ է»։

Հեռուստանովելում կան նաև բաց տեսարաններ Մարիամ Ալեքսանյանի մասնակցությամբ։ Ժաննան նշեց, որ իր կերպարը բաց տեսարաններ չունի. «Առհասարակ, չեմ նկարահանվում բաց տեսարաներում։ Բախտս բերեց, ի սկզբանե, իմ կերպարի համար նախատեսված չէր բաց տեսարան, թեև վստահ եմ, որ դրանք շատ գեղեցիկ ու ճիշտ կմատուցվեին»։

Դերասանուհու հիմնական խաղընկերը Կարեն Ասլանյանն է, որի հետ Ժաննան խաղացել է մի քանի տարի։  «Ինձ շատ հարմար է խաղալ Կարենի հետ։ Բացի այն, որ երկար տարիներ խաղացել ենք իրար հետ, նաև լավ ընկերներ ենք։ Մենք միշտ  մասնագիտական քննարկումներ ենք ունեցել, վերլուծել մեր խաղը, համագործակցությունը։ Որպես խաղընկերներ` լավ զգում ենք իրար։ Կարենի հետ սիրային տեսարաններ խաղալուն դեռ չենք հասել։ Որպես զույգի` մեզ կգնահատի հեռուստադիտողը։ Ես գնահատականներից զերծ կմնամ»,– նկատեց դերասանուհին։

Տևական ժամանակ մի թիմի հետ աշխատելուց հետո Ժաննան իրեն փորձեց նախ «Կենտրոն», ապա «Շանթ» հեռուստաընկերությունում։ Դերասանուհին շարունակում է մտերիմ հարաբերություններ պահպանել «Արմենիա TV»–ի իր գգործընկերների և Դիանա Գրիգորյանի հետ, իսկ այլ հեռուստաընկերությունում աշխատելը բացատրում է փոփոխությունների սիրահար լինելով։

«Երբ երկար ժամանակ ինչ–որ բան ես անում, փոփոխության կարիք ես ունենում, որն իր հետ նոր հույզեր, զգացմունքներ է բերում,– ասաց նա ու հավելեց, որ նոր թիմին շատ արագ է ընտելացել,– մեկ օր անգամ ինձ օտար չեմ զգացել։ Ինձ համար մեծ անակնկալ էր այն թիմը, որի հետ  սկսեցի աշխատել։ Հասցրել եմ սիրել նրանց, մտերմանալ թե՛ դերասանական, թե՛ տեխնիկական անձնակազմի հետ։ Մարդկային հարաբերություններն աշխատանքում շատ կարևոր են։ Ուրախ եմ, որ նման թիմում եմ աշխատում»։