25-մասանոց հեռուստասերիալ Էմմա Սապունջյանի, Մերի Հակոբյանի, Նիկոլայ Եղիազարյանի, Լուիզա Ներսիսյանի և այլոց մասնակցությամբ

Հունիսի 25-ից Ucom ցանցում գործող «Արմենիա Պրեմիում» հեռուստաալիքի եթերում կհեռարձակվի 25-մասանոց նոր հեռուստասերիալ` «Թունավոր սեր» խորագրով։ Tert.am Life-ը ներկայացնում է նախագծի մանրամասները։

«Գնված երջանկություն», «Ռեստարտ 2020», «Հին արքաներ», «Քավարան» նախագծերն իրականացրած Film factory ընկերությունը այս անգամ մելոդրամա ժանրի սիրահարներին է նոր նախագիծ ներկայացնում։ Հեռուստանովելի սցենարի հեղինակը Դիանա Գրիգորյանն է, ռեժիսորը՝ Հարութ Շատյանը, պրոդյուսերը` Արա Բաղդասարյանը:

Ֆիլմի գլխավոր հերոսների դերերը վստահված են երիտասարդ դերասաններ Էմմա Սապունջյանին  և Գևորգ Հայրապետյանին։ Նախագծում խաղում են Լուիզա Ներսիսյանը, Մերի Հակոբյանը,  Մարիամ Դավթյանը, Նիկոլայ Եղիազարյանը և այլք:

«Հեռուստասերիալը պատմում է բարի ու համեստ աղջնակի մասին, որն ամեն ինչ անում է իր հորն ու մորը լավ կյանքով ապահովելու համար: Դեպքերն այնպես են զարգանում, որ հերոսուհին հայտնվում է սպանության կիզակետում, որը  շրջադարձային է լինում նրա կյանքում: Հեռուստասերիալում հարուստ ու աղքատ խավի բախումն է: Այս բախումը գալիս է  ապացուցելու, որ իրական սերը վեր է ամեն ինչից ու կարող  է հաղթահարել ցանկացած խոչընդոտ: Շատ գեղեցիկ սեր ենք ներկայացնելու, սիրային եռանկյունի:  Կարծում եմ` հետաքրքիր ու դինամիկ տեսարանները հեռուստադիտողներին կստիպեն ապրել հերոսների հույզերով մինչև վերջ»,-ասաց Արան:

Ucom ընկերության համահիմնադիր և գլխավոր տնօրեն Հայկ Եսայանը, խոսելով նոր արտադրանքի մասին, ասաց. «Ուզում եմ հիշեցնել, որ «Արմենիա Պրեմիում»ի կողմից ստեղծված հեռուստաբովանդակությունը Ucom-ի հեռուստադիտողներին  մշտապես հասանելի է «Տեսավարձույթ» բաժնում։ Նոր մելոդրամայի յուրաքանչյուր նոր մաս կզետեղվի «Տեսավարձույթում» եթերից մեկ օր առաջ»։

Արան նկատեց, որ սերիալում բավականին շատ են ներգարվել երիտասարդ դերասանների: «Բնականաբար, դերասանների մեծամասնությանը ճանաչում ենք, արդեն ունեցել ենք  համագործակցություն, բայց ցանկացած նոր նախագիծ սկսելուց առաջ հայտարարում ենք քասթինգ, որի ժամանակ փորձնական վիդեոնկարահանումն անցնելուց հետո արդեն ընտրում ենք դերասաններին համապատասխան կերպարների համար»,-ասաց պրոդյուսերը:

Նրա խոսքով` հեռուստասերիալի նկարահանումները տևել են մոտ երկու ամիս: Նկարահանումներն իրականացվել են հիմնականում Երևանում, կան նաև տեսարաններ՝ նկարահանված Ստեփանակերտում, Դիլիջանում, Աշտարակում:

Ստեղծագործական թիմի կարծիքով` մելոդրամա ժանրում առաջին փորձը բավականին լավ է ստացվել: «Հեռուստադիտողը մեզնից միշտ սպասում է միստիկ կամ թրիլլեր ժանրի արտադրանք: Այդ ժանրի սիրահարներին երկար սպասել չենք ստիպի։ Առաջիկայում սպասվում է նաև հեռուստաարտադրանք նաև այդ ժանրում»,-եզրափակեց պրոդյուսերը:

Լուսանկարները՝ Շաքե Հովհաննիսյանի և Film factory-ի