«Հենց դադարի այդ ոգևորությունը, ես կփոխեմ աշխատանքս». Լուիզա Ներսիսյանը նոր հեռուստասերիալում նկարահանվելու մասին

Tert.am Life-ն իր ընթերցողներին արդեն պատմել է  «Թունավոր սեր» 25 մասանոց նոր հեռուստասերիալի մասին, որը Ucom ցանցում գործող «Արմենիա Պրեմիում» հեռուստաալիքի եթերում կհեռարձակվի հունիսի 25-ից: Սերիալում առանցքային կերպարներից մեկին մարմնավորել է Լուիզա Ներսիսյանը: Սա ստեղծագործական թիմի հետ դերասանուհու առաջին համագործակցությունը չէ: Նա նկարահանվել է նաև «Գնված երջանկություն» 25 մասանոց հեռուստասերիալում:

Tert.am Life-ը Լուիզայի հետ զրուցել է իր կերպարի, նախորդ դերի հետ ունեցած նմանության, նկարահանումների ընթացքի մասին:

«Սերիալում մարմնավորում եմ Էլա անունով կնոջ, որը ամուսին չունի և ապրում է դստեր հետ: Նրա գերնպատակը միակ աղջկան հաջող ամուսնացնելն է: Էլայի արժեքային համակարգը միայն փողով է չափվում, այդ պատճառով նա միայն հարստության է ձգտում: Դստերն էլ փորձում է հարուստ ընտանիքում ամուսնացնել՝ չգիտակցելով, որ իրական երջանկությունը դրանում չէ»,-ասաց Լուիզան:

Սերիալում դերասանուհու հիմնական խաղընկերը Մերի Հակոբյանն է, որը մարմնավորում է նրա դստերը: Դերասանուհին նկատեց, որ իր հերոսուհու տեսակն ու մարդկային որակները որոշակի նմանություն ունեն «Գնված երջանկություն» սերիալում իր մարմնավորած կերպարի հետ. «Տարբերություններն ավելի շատ են: Այնտեղ ունեի ամուսին, այստեղ չունեմ: Եվ եղած հանգամանքներով պայմանավորված նաև կերպարիս մոտեցման ձևն է փոխվում: Ես այստեղ ոչ թե ինչ-որ մեծահարուստի կին եմ, այլ մարմնավորում եմ մի կնոջ, որը ձգտում է լինել մեծահարուստի խնամի»:

Լուիզան նշեց, որ ստեղծագործական թիմի հետ աշխատանքն անցել է դրական մթնոլորտում և իրենք ջանք չեն խնայել հեռուստադիտողին որակյալ աշխատանք մատուցելու համար: Հեռուստասերիալի վերջնական արդյունքին գնահատական տալ դերասանուհին չի շտապում, միայն նշեց՝ հաշվի առնելով հատկացված կարճ ժամանակը, արվել է առավելագույնը:

«Ստեղծագործական թիմում բոլորս ընկերներ ենք և փորձում էինք ծանր աշխատանքը հումորի ու կատակների միջոցով մի փոքր թեթևացնել: Բոլորին թվում է, թե սերիալը հեշտ ու միանգամից նկարահանվում է, բայց թե որքան էներգիա և  նյարդեր ես քայքայում, դա միայն մենք գիտենք: Նկարահանման ընթացքում բազմաթիվ խնդիրներ են առաջ քաշվում, որոնք պետք է հաղթահարել: Միայն քո դերակատարման մասին չէ, որ պետք է  մտածես, այլ նաև փորձես ձեռք մեկնել խաղընկերներիդ, տեխնիկական ու ստեղծագործական թիմի անդամներին,-ասաց Լուիզան և ավելացրեց, որ սերիալում ներգրավված սկսնակ դերասաններին էլ փորձել է հնարավորինս աջակցել և ուղղորդել նկարահանման հրապարակում,-Միանգամից ու հանպատրաստից կադր չենք մտնում, այլ փորձում ենք միասին աշխատել, գալ ընդհանուր հայտարարի և ընթացքում շտկումներ անելով առաջ գնալ: Շատ կարևոր է նաև սցենարին ամբողջությամբ չվստահելը: Սցենարում կարող են այնպիսի բառեր կամ նախադասություններ լինել, որոնք քո տեսակը չկարողանա ճիշտ արտասանել: Դրա համար հարկավոր է այդ ուղղությամբ աշխատանք տանել, տեքստը քոնը դարձնել, որպեսզի կադրում օրգանական լինի»,-ասաց դերասանուհին:

Լուիզայի խոսքով ամեն անգամ նոր առաջարկ ստանալիս, աշխատանքը սկսում է զրոյից և նույն ոգևորությամբ: «Յուրաքնաչյուր նոր աշխատանք դերասանին տալիս է ուղղակի զբաղվածություն: Շատ կարևոր է, թե դու ինքդ ինչպես ես վերաբերվում քո մասնագիտությանը: Միշտ էլ հեշտ է մեղքը գցել ուրիշի ուսերին: Ամեն նոր աշխատանք սկսելիս, ես նույն էնտուզիազմով ու ոգևորությամբ եմ աշխատում՝ դա կլինի սերիալ, մանրապատում, գեղարվետսական լուրջ ֆիլմ թե հումորային տեսահոլովակ: Ես փոքրուց որոշել եմ, որ պետք է լինեմ դերասանուհի և ուզում եմ, որ իմ մեջ չկորի այդ ոգևորությունը:  Ամեն օր ուրախ լինեմ, որ այդ մասնագիտության կրողն եմ: Հենց դադարի այդ ոգևորությունը ես կփոխեմ աշխատանքս»,-եզրափակեց նա: