«Այլևս չեմ կրկնի այդ սխալը». Ալեքսանդր և Լիլիթ Բաբասյանների հանգիստը Փարիզում

Դերասան Ալեքսանդր Բաբասյանը կնոջ՝ Լիլիթի և որդու՝ Ալեքսանդրի հետ Փարիզում էր, որտեղ անմոռանալի օրեր են անցկացրել, իսկ մանրամասներով ու լուսանկարներով կիսվել են Tert.am Life-ի հետ։ Դերասանի խոսքով` շատ է սիրում ճամփորդել. տարին սկսել է Շվեդիայում, օրերս Փարիզում էր, իսկ օգոստոսին` իր և որդու տարեդարձի առթիվ կմեկնեն Իտալիա կամ Իսպանիա։

Փարիզյան հանգիստն Ալեքսանդրին շատ է տպավորել։ Նա առաջին անգամ էր սիրո քաղաքում։ «Այն  տպավորություններն ու էմոցիաները, որ ստացա Փարիզից, հազվադեպ քաղաքներ կարող են տալ։ Ճարտարագիտական տեսանկյունից այն առաջատարն է ամբողջ աշխարհում։ Եթե հասկանում ես այն, ինչ տեսնում ես Փարիզում, հասկանում ես` ինչ է իրենից ներկայացնում կառույցը, ովքեր են ստեղծել, ինչպես են պահպանել այդ ամենը, ինքդ քո մեջ մի կարգ ավելացնում ես։ Դու պարզապես գեղեցիկ կառույցի չես նայում, այդ ամենը տեսնելը գերբնական հաճույք է»,– ասաց նա։

Դերասանն ընտանիքի հետ Փարիզում անցկացրել է 9 օր։ Ասում է` չէր պատկերացնում, որ Փարիզից այդպիսի տպավորություն կստանան։ Ի սկզբանե ամուսինների` Փարիզ մեկնելու նպատակը Լիլիթի` մասնագիտական սեմինարի մասնակցելն ու իրենց որդուն «Դիսնեյ լենդ»  տանելն էր, սակայն այնտեղ հաճելի անակնկալի են եկել. ««Դիսնեյ լենդը» հեքիաթային աշխարհ է, որը ցանկացած տարիքի մարդուն դարձնում է մանուկ, սակայն տեղում հասկացանք, որ դա նվազագույնն է։ Փարիզում շատ ավելի հետաքրքիր բաներ կան։ Արտակարգ հանգիստ ունեցանք»։

Դերասանը հայտնեց, որ Եվրոպայում հանգստանալիս ավելի շատ կարևորում է  զբոսանքները, քան ակումբներ հաճախելը կամ հյուրանոցում հարմարավետ ժամանակ անցկացնելը։ «Ինձ համար ինքնանպատակ չէ Եվրոպա մեկնելը, ես ուզում եմ տեսնել այն։ Իմ գերնպատակն է բացահայտել Եվրոպան, որը, ըստ իս, քաղաքակրթության կենտրոնն է։ Իրական թագավորական երկրները, իրական արիստոկրատները եղել են հենց Եվրոպայում»։

Երեխայի հետ հանգիստ կազմակերպելն իր բարդություններն ունի, փոքրիկը թելադրում է իր ռիթմն ու կանոնները, սակայն Ալեքսանդրը շեշտեց, որ առանց որդու հանգիստի չի մեկնի։ Մի անգամ նման փորձ ունեցել է, ինչի համար իրեն չի ներում։

«Ես պատրաստ եմ ամեն անգամ  անցնել այդ բարդությունների միջով, երիտասարդական հանգիստ չկազմակերպել, որպեսզի որդիս կողքիս լինի։ Առանց իմ Ալեքսանդրի էլ ոչ մի տեղ չեմ գնա։ Ես ու Լիլիթը մի անգամ երկուսով մեկնել էինք Դուբայ, դա մեծ սթրես էր ինձ համար։ Ամեն անգամ մի լավ բան անելիս, համեղ ուտեստ փորձելիս մտածում էի` ինչու որդիս մեզ հետ չէ, վիճում էի Լիլիթի հետ, թե ինչու Ալեքսանդրիկին չբերեցինք։ Այլևս չեմ կրկնի այդ սխալը»,– ընդգծեց դերասանը։

Ալեքսանդրը նկատեց, որ հանգիստն իր դրական ազդեցությունն է ունենում նաև ընտանեկան հարաբերությունների վրա։ Դերասանի փոխանցմամբ` իրենց առօրյան Հայաստանում էլ միապաղաղ չի անցնում, սակայն տարատեսակ խնդիրներն ազդում են առօրյայի, հարաբերությունների վրա. «Այդ փոքրիկ բացասական ազդեցությունները հանգստի ժամանակ, վերանում են, էլ չեմ ասում, որ Փարիզի պես քաղաքում հարաբերությունները չեն կարող լավ չլինել։ Այնտեղ ամեն քայլափոխի սեր է տարածված, ի վերջո, Փարիզը սիրո քաղաք է»։

Դերասանը նախկինում առիթ ունեցել էր ասելու, որ լավ հանգիստ ունենալու համար պետք է թանկարժեք հանգիստ ունենալ։ Նա նկատեց, որ լավ հանգիստն իր գինն ունի, սակայն դա չի նշանակում, որ միայն գումարի առկայությամբ կարելի է այն կազմակերպել։ «Ցանկացած լավ հանգստի համար պետք է գումար ծախսես։ Փարիզի պես քաղաքում պետք է տեսնես պատմական վայրերը, օրինակ, Վերսալի թագավորական պալատ 2 անգամ գնացի, քանի որ տեսնելու շատ բան կար, պետք է համտեսես տեղի խոհանոցը։ Դրանք բավականին թանկ հաճույք են, էլ չեմ ասում, որ գնային առումով Փարիզի նման թանկ քաղաք իմ շրջագայությունների ընթացքում չէի տեսել։ Միևնույն ժամանակ, լավ հանգիստ ունենալու համար միայն գումար ծախսելը բավարար չէ, պետք է կարողանաս գեղեցիկ, համեղ, լավ հանգիստ կազմակերպել։ Պետք է օպտիմալ օգտագործես ժամանակդ ու գումարդ»,– եզրափակեց նա։