«Մարդիկ չեն պատկերացնում, որ ես մեծացել եմ». Լիդուշիկը՝ ոճային փոփոխությամբ ներկայանալու և ավարտական քննությունների մասին

Երգչուհի Լիդուշիկն օրերս գերազանցությամբ ավարտել է Երևանի էստրադային և ջազային արվեստի պետական քոլեջը: Մինչ երգչուհին կստանա ավարտական դիպլոմը, արդեն նախապատրաստվում է Կոմիտասի անվան պետական Կոնսերվատորիայի ընդունելության քննություններին:

Tert.am Life-ը Լիդուշիկի հետ զրուցել է քննական շրջանը հաղթահարելու, երաժշտական կարիերայում սպասվող փոփոխության մասին:

Լիդուշիկի խոսքով՝ չնայած փոքր տարիքից բեմում է, քոլեջում ուսանելու 4 տարիների ընթացքում ավելի է հմտացել ու կրթվել որպես երգչուհի: Նրա փոխանցմամբ՝ քննաշրջանը հեշտ է հաղթահարել, հատկապես, մասնագիտական առարկայի քննությունը հանձնել է առանց լարվածության:

«Հունիսի 18-ին հանձնեցի քննություն մասնագիտական առարկայից, դերասանական բաժնի ուսանողների հետ էլ մի ներկայացման մեջ էի ընդգրկված, որը ևս ավարտական քննության շրջանակում էր: Կարելի է ասել՝ երկու պետական քննություն եմ ունեցել: Մասնագիտական առարկայի՝ վոկալի քննությանը, պատրաստվել էի հենց քոլեջոււմ: Լարվածություն չկար, քանի որ քննություն հանձնելն արդեն սովորական է դարձել: Պարզապես այս անգամ դա արեցինք պետական հանձնաժողովի ներկայությամբ, որի նախագահը Ռուբեն Մաթևոսյանն էր: Ես բազմիցս ելույթ եմ ունեցել նրա ներկայությամբ և նրա հետ, գուցե, այդ պատճառով լարված չէի: Հուզմունքս էր շատ, որ ավարտում եմ ու թողնում ևս մեկ պատմություն՝ գնալով կյանքի հաջորդ փուլ»,- ասաց նա:

Հանգստանալու ժամանակ երգչուհին դեռ չի ունեցել: Հիմա էլ պատրաստվում է ընդունելության քննություններին: Նա ցանկանում է դառնալ Կոմիտասի անվան պետական Կոնսերվատորիայի ուսանողուհի: Երգչուհու խոսքով, այս փուլում իր համար ամենակարևորը քննությունները բարեհաջող հանձնելն ու այդ ցանկությունն իրականացնելն է:  Լիդուշիկը նկատեց, որ ուսմանը զուգահեռ շարունակելու է դեռևս տարիներ առաջ սկսած երաժշտական կարիերան և պասիվանալու մտադրություն չունի:

«Այս շրջանում շատ տեսահոլովակներ չեմ նկարահանել, հիմնականում համերգային շրջագայությունների եմ եղել: Առաջիկայում կներկայացնեմ նոր երգեր ու տեսահոլովակ»,- ասաց նա:

Երգչուհուց հետաքրքրվեցինք, արդյոք շատերի մոտ մանկական կերպարով տպավորված Լիդուշիկին նոր աշխատանքում կտեսնենք ավելի հասուն աղջկա կերպարում. «Ճիշտն ասած, այդ փոփոխությունը մի քանի անգամ ցանկացել ենք անել, բայց չի ստացվել: Հիմա, իհարկե, ուզում ենք փոփոխություն աճի առումով՝ նոր սանրվածք, հագուստ և այլն, բայց դա չի լինելու կտրուկ փոփոխություն, որով մարդկանց կհասկացնեմ՝ ես արդեն մեծացել եմ: Ինքս էլ դեռ չեմ կարողանում ինձ այդպես ընկալել: Իմ մարմնի չափսերն ու դեմքի արտահայտությունն էլ են դա փաստում:)»:

Նա հայտնեց, որ երգերի թեմատիկ փոփոխությունն  էլ կլինի. «Իհարկե, չեմ պատրաստվում տառապած սիրո մասին երգել: Ինձ թվում է, երբ սիրո մասին երգում ես, պետք է զգաս այդ սերը: Երբ սիրո մասին իմ առաջին երգն էի ձայնագրում, ինձ համար մի փոքր դժվար էր. պետք է արտահայտես այդ զգացողությունները, որպեսզի լսողն էլ նույնկերպ զգա քո երգը: Այդ առումով ինձ մոտ իրավիճակ չի փոխվել:) Ես փորձում եմ երգել այն, ինչ ինձ հոգեհարազատ է: Օրինակ՝ վերջին երգերս կյանքի, Հայաստանի մասին են»:

Լիդուշիկը շուտով կնշի իր 19-ամյակը, երգչուհին ինքն էլ խոստովանում է, որ մինչև օրս շատերն իր տարիքի հետ չեն համակերպվում և չեն կարողանում իրեն ընկալել որպես «մեծ աղջիկ»: Նրա խոսքով, այդ փաստից չի նեղսրտում: «Մարդիկ չեն պատկերացնում, որ մեծացել եմ: Դա բնական է, քանի որ փոքր տարիքից եմ հանդիսատեսի աչքի առաջ և այդպիսին եմ տպավորվել նրանց մոտ:  Նույնիսկ, երեկ, երբ մասնակցում էի «Արևիկ»-ի սաներից մեկի 20-ամյակի խնջույքին, ներս մտա, շատերն ինձ չճանաչեցին, այդ թվում` իմ մանկության ընկերներից մի քանիսը: Իրենք ինձ դեռ ավելի փոքր են պատկերացնում, չնայած միասին ենք մեծացել»,-եզրափակեց երգչուհին: