«Չափից դուրս երկար դադար եղավ, որն ազդում էր իմ հոգեվիճակի վրա». Նիկոլայ Եղիազարյանը՝ տևական դադարից հետո նոր հեռուստասերիալում նկարահանվելու մասին

Հեռուստատեսային տևական դադարից հետո դերասան Նիկոլայ Եղիազարյանը հեռուստադիտողներին կներկայանա նոր՝ «Թունավր սեր» 25-մասանոց հեռուստասերիալում, որն այսօրվանից կցուցադրվի  Ucom ցանցում գործող «Արմենիա Պրեմիում» հեռուստաալիքի եթերում:

Tert.am Life-ը դերասանի հետ զրուցել է հեռուստատեսային դադարի պատճառների, նոր սերիալում ներգրավվելու, իր մարմնավորած կերպարի և ստեղծագործական թիմի հետ աշխատանքի մասին:

Նիկոլայը նշեց, որ հեռուստատեսային դադարը պայմանավորված է եղել ոչ թե իր նախընտրությամբ, այլ առաջարկների բացակայությամբ. «Դադար եղավ, որը չափից դուրս երկար տևեց: Դա ինչ-որ տեղ ազդեց նաև իմ հոգեվիճակի, առողջության վրա, որովհետև դժվար է, երբ ակտիվ շրջանից հետո երկար ժամանակ չես զբաղվում քո մասնագիտությամբ: Ես 2009 թվականից երկար ժամանակ էկրաններին եմ եղել, իսկ այս դադարին ամեն դեպքում նորմալ եմ վերաբերվում, քանի որ նոր, երիտասարդ դեմքերին նույնպես պետք է  դրսևորվելու հնարավորություն տալ»:

Դերասանը նշեց, որ տեսակով կոնֆլիկտային չէ և երբևէ խնդիրներ չի առաջացրել իր աշխատանքային գործունեության ընթացքում: Առաջարկներ չստանալու պատճառը , Նիկոլայի խոսքով, այդ հարթության մեջ փնտրել չարժե:  Նա նշեց, որ բազմիցս ինքն էլ է բարձրաձայնել զբաղվածություն չունենալու և սերիալում նկարահանվելու ցանկության մասին: Անդրադառանալով «Թունավոր սեր» հեռուստասերիալում նկարահանվելու  առաջարկին՝ նա ասաց, որ երկարատև դադարից հետո սա շատ լավ հնարավորություն էր իր համար:

«Ստեղծագործական թիմից ինձ զանգահարեցին, ասացին, որ Հարութ Շատյանը նոր հեռուստասերիալ է նկարահանում, ուզում է հանդիպենք: Հանդիպեցինք, քննարկեցինք առաջարկը, ծանոթացա սյուժեին, կերպարիս և այնպես ստացվեց, որ սկսեցինք աշխատել: Անկեղծ կասեմ մի բան՝ իրոք շատ շնորհակալ եմ, որ հնարավորություն ունեցա աշխատելու այս թիմի հետ: Այնպիսի խումբ է հավաքված, որի յուրաքանչյուր անդամի կողմից լուրջ մոտեցում կա աշխատանքի հանդեպ:  Ականատես լինելով ստեղծագործական այդ մթնոլորտին ու մոտեցմանը՝ յուրաքանչյուրս մեզ վրա պատասխանատվություն էինք վերցնում մեր գործը լավ անելու համար: Ամեն բան իր տեղում էր և դա ավելի էր ոգեշնչում կերպարդ հասկանալու և նրան հնարավորինս ճիշտ մատուցելու համար»,-ասաց նա:

Դերասանը նշեց, որ սա իր առաջին համագործակցությունն է ռեժիսոր Հարութ Շատյանի հետ, իսկ սերիալում ներգրավված դերասաններից շատերի հետ նա արդեն այլ նախագծերում համատեղ աշխատանքի փորձ ունեցել է: Խոսելով իր մարմնավորած կերպարի մասին՝ Նիկոլայը նկատեց, որ իր հետ ընդհանրապես նմանություն չունի, ինչն աշխատանքն ավելի հետաքրքիր է դարձրել: Հեռուստադիտողներից շատերը նրան սովոր են տեսնել բացասկաան կերպարներում: Այս անգամն էլ բացառություն չի լինելու:

«Սերիալում ես մարմնավորում եմ Գոգայի կերպարը: Նա Բժշկական համալսարանի ուսանող է: Շատ հետաքրքիր կերպար է: Չեմ ուզում ամբողջությամբ բացահայտել: Հեռուստադիտողն ինքը կտեսնի շատ անսպասելի զարգացումներ և ինտրիգ՝ կապված իմ կերպարի հետ: Հեռուստադիտողներին ավելի շատ հայտնի եմ բացասական կերպարներով, չկառավարվող, չենթարկվող տեսակով: Դա ինձ դուր է գալիս և խաղարկային տեսանկյունից ավելի էմոցիոնալ է ստացվում դերակատարումը»,-ասաց նա:

Սերիալում Նիկոլայի հիմնական խաղընկերներից է դերասանուհի Թամարա Գևորգյանը, ում հետ աշխատանքը դերասանի խոսքով, նույնպես շատ հաճելի էր ու հետաքրքիր. «Շատ կարևոր է, երբ հասկացված ես լինում խաղընկերոջդ կողմից: Այդ առումով Թամարայի հետ աշխատելն իսկապես հաճելի էր,-ասաց նա և ավելացրեց, որ 25-մասանոց հեռուստաաերիալում առաջին անգամ է նկարահանվում,- Կարծում եմ՝ 25-մասանոց սերիալները հեռուստադիտողները  համար ավելի հետաքրքիր են, ձանձնացնող չեն: Իհարկե, չեմ ուզում ասել, որ երկարատև հեռուստաերիալները ձանձրացնում են, քանի որ ինքս էլ բազմիցս նկարահանվել եմ այդ սերիալներում»:  

Նիկոլայը վստահեցրեց, որ հեռուստադիտողներին հետաքրքրիր ու անսպասելի իրադարաձությունների շարք է սպասվում և հույս հայտնեց, որ դրանում իր դերակատարումը կարժանանա հեռուստադիտողի հավանությանը: