«Տղաս ԱՄՆ քաղաքացի է, բայց կուզեմ Հայաստանում մեծանա». Դելոն` Հայաստան այցի և սպասվող նորության մասին

ԱՄՆ-ում բնակվող դերասան Վահագն Ստեփանյանը՝ Դելոն, օրերս ընտանիքի հետ ժամանել է Հայաստան: Դերասանն ասում է, որ չնայած անցյալ տարի եղել է Հայաստանում, միշտ կարոտում է հայրենիքը: Tert.am Life-ը զրուցել է Վահագնի հետ ու պարզել, որ այս անգամ այցի նպատակը նաև աշխատանքային է:

Վահագնն ասաց, որ Հայաստանում կլինի մինչև սեպտեմբերի վերջ: Նրա խոսքով, Հայաստան այցի առաջին իսկ րոպեները՝ սկսած օդանավակայանից, շատ ջերմ ու էմոցիոնալ են եղել:

«Օդանավակայանում հանդիպեցի ընտանիքիս բոլոր անդամներին ու ամենամտերիմ ընկերներիս: Շատ դրական, բարի ու էմոցիոնալ հանդիպում ստացվեց: Ոտքս այստեղ դնելու առաջին պահից զգացի, որ ես տանն եմ: Միշտ կարոտում եմ Հայաստանը, հենց այդ կարոտն է, որ ինձ բերում է այստեղ,-ասաց նա և ավելացրեց, որ հարազատ ընկերների շարքում իրեն դիմավորել են նաև դերասան Վարշամ Գևորգյանը, հաղորդավար Ֆելիքս Խաչատրյանը,- Ինձ համար այս տարի շատ ուրախալի բան եղավ, որ Ֆելիքսը հայր դարձավ, ու մենք արդեն նույն «լեվելի» վրա ենք:) Դեռ չեմ հասցրել երեխային տեսնել, հենց հիմա գնում եմ նրան տեսնելու»:

Վահագնը նշեց, որ Հայաստանում կարոտել էր ամեն բան՝ սկսած ջրից. «Առաջին բանը, որ արել եմ, ծիրան ու եղբորս պատրաստած խորովածն ուտելն էր»։

Նրա խոսքով, ԱՄՆ-ում ամենից շատ պարզ շփման պակաս է ունենում: Հարցին, հանարավո՞ր է մշտական բնակության վերադառնա Հայաստան, նա պատասխանեց. «Ամեն օր երազում եմ այդ օրվա մասին: Դա սարերի հետևում չէ: Ճիշտ է, տղաս ծնվել է ՄՆ_ում և այնտեղի քաղաքացի է, բայց ինձ համար կարևոր է, որ  իմ երեխան մեծանա որպես իսկական հայ: Իհարկե, այդ երկիրը շատ հնարավորություններ ունի և կապերը խզելն անիմաստ է, բայց փորձելու եմ այնպես անել, որ տարվա ընթացքում ավելի շատ այստեղ լինեմ, քան ԱՄՆ-ում: Շատ կուզեմ, որ իմ երեխան մեծանա եղբորս երեխաների հետ ու ապրի այն մանկությունը, որը մենք ենք ունեցել: Ես չեմ  ցանկանում քննադատել, բայց ամերիկյան կենսակերպն այլ է: Այնտեղ երեխա-ծնող հարաբերություններում բոլորովին այլ հոգեբանություն է դրված»:

Այդուհանդերձ, Վահագնը նշեց, որ Հայաստան մշտական վերադառնալու հարցում ինքն ու կինը տարաձայնություն ունեն. «Երեխայի դաստիարակությանը վերաբերող շատ հարցերում իմ ու կնոջս կարծիքը համընկնում է, բայց այդ հարցում տարակարծություն ունենք: Դա նորմալ է, կարծիքները պետք է  տարբեր լինեն, որ հետաքրքիր լինի»:

Վահագնը նշեց, որ ծրագրել են Հայաստանում տոնել որդու՝ Նարեկ-Քրիսոտյի 2-ամյակը, որը կլինի սեպտեմբերին: Դերասանը նկատեց, որ ժամանակին հորեղբոր պարտականություններն էր հաճույքով կատարում, հիմա` ծնողական։ Վահագնի խոսքով` ցանկանում է մեծ ընտանիք ունենալ. «Ընտանիքի համալրման հարցը թողել ենք Աստծո կամքին»:

Դերասանի համար Հայաստան հերթական այցը նաև գործնական ուղղվածություն ունի: Նա նշեց, որ Հայաստան է եկել ԱՄՆ-ում գործող այն փրոդաքշնի կազմով: Նրա խոսքով, ստեղծագործական թիմը հետաքրքիր մտքեր ու ծրագրեր ունի, որոնց մասին առայժմ չի կարող բարձրաձայնել:

«Անցյալ տարի սեպտեմբերին մեր թիմը կազմակերպեց «Ռեինկարնացիա» խմբի բարեգործական առաջին մենահամերգը ԱՄՆ-ում: Մեր փրոդաքշնի կազմում ընդգրկված են տարբեր ոլորտի մարդիկ: Ես իմ հերթին կատարում եմ ինչպես պրոդյուսերական, այնպես էլ  դերասանական գործունեություն: Այստեղ ենք հետաքրքիր գաղափարներով, բայց այդ մասին կխոսենք այն ժամանակ, երբ արդեն իրականացնենք մեր ծրագրերը: Պետք է նշեմ, որ Հայաստանը ստեղծագործական առումով ավելի հետաքրքիր է: ԱՄՆ-ի հայկական շուկան այն որակը չունի, ինչն այստեղ է»,-ասաց դերասանը:

Վահագնը նշեց, որ անկախ փրոդաքշնի հետ համագործակցությունից, ՄՆ-ում գտնվելու առաջին իսկ օրվանից ակտիվ գործունեություն է ծավալել, թեև որպես դերասան դրսևորվելու հնարավորություն այդքան շատ չի ունեցել.« ԱՄՆ –ում ես նկարահանվել եմ գովազդներում, թատրոնից առաջարկ եմ ստացել ու խաղացել եմ,  միջոցառումներ եմ կազմակերպել: Ավելի խառը գործունեություն եմ ծավալել, բայց որպես դերասան մշտական դրսևորվելու տեղ չկար այնտեղ, իսկ ես դա շատ եմ կարոտել: Հիմա եկել եմ, որպեսզի նաև այդ կարոտս բավարարեմ: ԱՄՆ-ում նաև լսարանի որակները, մտաածելակերպն է տարբեր, թեև հայը ամենուր հայ է և պահանջկոտ է հատակապես հումորին առնչվող հարցերում: Իմ կարծիքով, դու պետք է կարողանաս այնպիսի բան անել, որը կլինի ոչ թե միայն տեղի հայ համայնքի, այլ տարբեր երկրներում բնակվող հայության և ավելի լայն զանգվածի համար»:

Դիտարկմանը, թե հնարավո՞ր է արդյոք Դելոյին հեռուստադիտողը տեսնի հայաստանյան որևէ նախագծում, դերասանը չբացառեց: «Ինձ մոտ այդ առումով բաց դաշտ է: Ես միշտ էլ յուրաքաչյուր լավ առաջարկի կողմ եմ եղել և բաց եմ համագործակցության համար: Դեռ ինքս էլ չեմ հասցրել շատերին տեսնել, շատ մարդիկ էլ տեղյակ չեն, որ արդեն Հայաստանում եմ: Կարծում եմ, եթե իմանան, գուցե առաջարկներ լինեն»,-եզրափակեց նա: