«Ես ու Սուրենը շատ տարբեր ենք». Յանա Դանիելյանը՝ ընտանիքի համալրման, հեռուստատեսային աշխատանքի և սերիալներում չնկարահանվելու պատճառի մասին

Հաղորդավարուհի Յանա Դանիելյանը հեռուտաէկրանին հայտնվել է 18 տարեկանից: Արդեն 12 տարվա հեռուստատեսային փորձի 6 տարիները հաղորդավարուհին անցկացրել է «խոհանոցում»՝ վարելով  «Ի՞նչ եփել այսօր» հաղորդումը: Յանայի խոսքով, հեռուստադիտողներից շատերը համոզված են, որ ինքը պրոֆեսիոնալ խոհարար է, մինչդեռ նա փաստում է՝ խոհանոցի հետ իրեն կապում է ընդամենը սերն ու հետաքրքրությունը պատրաստելու հանդեպ: 

Tert.am Life-ը այս ու այլ թեմաների շուրջ հետարքքիր զրույց է ունեցել հաղորդավարուհու հետ:

Յանան համոզված է, որ ցանկացած կնոջ համար, որն ունի ամուսին և երեխաներ, խոհանոցում գտնվելը անխուսափելի է, միաժամանակ՝ հետաքրքիր: Նրա խոսքով տեսախցիկների առաջ որևէ բան պատրաստելն ու միաժամանակ հաղորդում վարելը փոքր-ինչ բարդ է, քան տանը խոհանոցում պատրաստելը: Սակայն երկու դեպքում էլ Յանային օգնում է սերը դեպի խոհանոց:

«Աշխատանքիս մոտենում եմ այն տեսանկյունից, որ ես էլ սովորական տնային տնտեսուհի եմ, ինչպես իմ հեռուստադիտողները և կիսվում եմ նրանց հետ խոհանոցային գաղտնիքներով, հետաքրքիր բաղադրատոմսերով՝ փորձելով օգնել նրանց: Փոքրուց իմ մեջ եղել է  սեր դեպի խոհանոցը, հիմա էլ աղջկաս է դա գենետիկորեն փոխանցվել: Ես միշտ սիրել եմ պատրաստել, բայց իհարկե, երբևէ չեմ պատկերացրել, որ դա կդառնա իմ աշխատանքի բնույթը»,-ասաց հաղորդավարուհին:

Յանան նշեց, որ արդեն երկու տարի է հանդիսանում է «Հ2» հեռուստաընկերությամբ հեռարձակվող հաղորդաշարի ոչ միայն հաղորդավարուհին, այլև պրոդյուսերը: Հաղորդավարուհին պատմեց, որ հեռուստադիտողների դիտողությունների հիման վրա հաղորդման ներքին խոհանոցում որպես պրոդյուսեր փոփոխություններ է իրականացրել:

«Մենք  շատ զնագեր էինք ստանում հեռուստադիտողներից, ավելի շուտ՝ բողոքներ: Զանգահարում էին հենց հեռուստաընկերություն և ասում՝ մենք այսօր նույնիսկ գումար չունենք մի կտոր միս գնելու, իսկ դուք խոզի մսով կամ ծովախեցգետնով ուտեստներ եք պատրաստում: Դա մեզ շատ լուրջ մտածելու տեղիք տվեց: Եվ արդեն երկու տարի է, ինչ զբաղվելով հաղորդման պրոդյուսերությամբ՝ ես ընտրում և ներկայացնում եմ այնպիսի ուտեստներ, որոնց գնային սահմանը չի գերազանցում 2500-3000 դրամը: Դա որպես կանոն ենք սահմանել և աշխատում ենք պատրաստել այնպիսի ուտեստներ, որոնք հասանելի կլինեն բոլորին»,-ասաց նա:

Ի՞նչ եփել այսօր հարցի պատասխանը գտնելը կադրից դուրս, ընտանեկան կյանքում էլ հաղորդավարուհու համար առանձնապես բարդ չէ, թեև Յանան նշեց, որ ընտանիքում համային նախընտրությունները շատ տարբեր են և մեկ ուտեստով երբեք չեն բավարարվում. «Արդեն գիտեմ աղջկաս և ամուսնուս նախասիրությունները: Նրանցից ամեն մեկը տարբեր բաներ է սիրում, իսկ ես չեմ ուտում այն, ինչ իրենք են սիրում: Հետևաբար, ստիպված եմ մի քանի տեսակի ուտեստ պատրաստել: Շունիկ էլ ունենք, նրա համար էլ առանձին եմ պատրաստում :)»:

Յանայի խոսքով ամուսնու՝ հաղորդավար, դերասան Սուրեն Փահլևանյանի հետ ոչ միայն ուտեստների նկատմամբ ունեցած նախասիրություններն են տարբեր, այլև բնավորության շատ գծեր.«Ես ու Սուրենը շատ տարբեր ենք, բայց մեր ընտանիքի կայունության գրավականն այն է, որ միշտ կարևոր կետի հասնելիս կարողանում ենք զիջել: Սուրենը ավելի փափուկ է բնավորությամբ, հարմարվող տեսակ է: Նա կարող է շատ հարցերում զիջել, իսկ ես սիրում եմ, որ ամեն բան տեղը տեղին լինի և ավելի պահանջկոտ եմ թե՛ աշխատանքի մեջ, թե՛ ընտանեկան  կյանքում,-ասաց Յանան և ավելացրեց, որ դուստրը՝ 6-ամյա Ադելը բնավորության հենց այդ գծով ավելի շատ իրեն է նման,- Ես աղջկաս այդպես չեմ սովորեցրել, բայց զգում եմ, որ այդպիսին է: Եթե ինչ-որ բան իրեն դուր չի գալիս, օրինակ հենց ուտեստի հարցում, նրան որևէ կերպ չես կարող համոզել դա ուտել»:

Յանան նշեց, որ Ադելին երես տալու գործառույթը վերապահված է հայրիկին, իսկ ինքը ընտանիքում ուսուցչուհու կերպարում է՝ ավելի խստապահանջ: Նրա խոսքով, բոլոր պարտականությունները կատարելուց հետո, դստերը անպայման պարգևատրում են՝ նրան հետաքրքիր ժամանց ապահովելով կամ այլ տարբերակներով: Լինելով ընտանիքում միակ երեխան, Յանայի խոսքով, Ադելը տեսակով ամենևին էլ եսակենտրոն չէ: Մայրիկը փաստեց, որ քույր կամ եղբայր ունենալու խնդրանքով դուստրն իրենց երբևէ չի դիմել: Նրանք էլ առայժմ չեն մտածում ընտանիքի համալրման մասին. «Իմ ու Սուրենի պլաններում դեռ դա չկա: Առայժմ Ադելով և մեր աշխատանքով ենք զբաղված: Ժամանակ ունենք, չենք շտապում: Ոչնչից չենք վախենում, պարզապես ամեն ինչ ցանկության տիրույթում է: գուցե մի օր գա, հասկանանք ժամանակը եկել է ու դրան էլ կհասնենք»:

Տևական ժամանակ առաջ հաղորդավարուհին ներկայանում էր նաև որպես դերասանուհի: Յանայի խոսքով հեռուստասերիալներում նկարահանվելու առաջարկներ այս ընթացքում էլ ստացել է, սակայն մերժել է. «Առաջարկները այլ հեռուստաընկերությունների կողմից էին և ես իրավունք չունեի բացի մեր հեռուստաալիքից այլ հեռուտաընկերության եթերում լինելու, թեկուզ որպես դերասանուհի: Դա հրաժարվելուս միակ պատճառը չէ: Կարծում եմ՝ ճիշտ կլինի այդ գործով զբաղվեն դերասանները, իսկ ես ինձ հաղորդավարուհի եմ համարում,-ասաց  նա և ավելացրեց, որ ժամանակին ունեցած դերասանական փորձն իրեն այսօր էլ օգնում է հաղորդավարական աշխատանքում,- Կարծում եմ իմ ունեցած փորձն ինձ բավական է, բայց եթե լինեն հետաքրքիր, լավ առաջարկներ, գուցե համաձայնեմ»: