«Երբ տեսա բալիկիս, սկսեցի լաց լինել». Սիդնի Գրիգորյանը առաջնեկի ծննդի և ամուսնու անակնկալի մասին

Tert.am Life-ն իր ընթերցողներին արդեն հայտնել է, որ ծնվել է երգչուհի Սիդնի Գրիգորյանի առաջնեկը: Սիդնին և ամուսինը՝ Ցոլակը, արու զավակ են ունեցել, որին անվանակոչել են Դավիթ: Mայրանալուց հետո երգչուհին իր զգացողությունների մասին պատմել է Tert.am Life-ին:

Սիդնին նշեց, որ երեխան ծնվել է նախատեսված ժամկետից մի փոքր շուտ՝ հունիսի 26-ին, անակնկալ անելով ծնողներին: «Մինչև վերջին օրն աշխատել եմ: Այդ օրվա համար էլ նախապես գրանցումներ ունեի արված, բայց պատահական գնացի հիվանդանոց և ինձ պետք է վիրահատեին»,- պատմեց նորաթուխ մայրիկը:

Սիդնին ասաց, որ որդին ծնվել է 3 կգ քաշով և 47 սմ հասակով: Նրա խոսքով, երեխայի հետ առաջին հանդիպումը բավականին հուզիչ է եղել:

«Դա այնպիսի զգացողություն է, որը բառերով նկարագրել չես կարող: Երբ բալիկիս տեսա, սկսեցի լաց լինել: Այդ պահին ուղղակի հասկանում ես՝ ինչ է իրենից ներկայացնում իրական երջանկությունը: Դրանից այն կողմ կնոջ համար կարևորագույն ոչինչ չկա»,-ասաց նա:

Սիդնիի խոսքով` ամուսնու և երեխայի առաջին հանդիպումն էլ պակաս հուզիչ չի եղել: Սիդնին այդ պահին ականատես չի եղել, սակայն ավելի ուշ տեսել է տեսանյութը. «Քանի որ ինձ ուրիշ հիվանդասենյակ էին տեղափոխել, իրենց հանդիպմանը ներկա չեմ եղել: Ամուսինս բուժաշխատողներին համոզելով մտել էր երեխայի մոտ ու տեսել մեր բալիկին: Ավելի ուշ ինձ ուղարկեց վիդեոն, որի միջոցով ես էլ առաջին անգամ մանրակրկիտ տեսա երեխայիս»:

Ավելի վաղ մեզ հետ զրույցում, Սիդնին նշել էր, որ երեխայի անվան ընտրության հարցում ինքն ու ամուսինը դեռ չեն կողմնորոշվել: Երգչուհին ասաց, որ Դավիթ անունն ընտրել են ամուսնու ցանկությյամբ, ինքը դեմ չի եղել: Սիդնին և բալիկն արդեն տանն են: Ասում է՝ իրենց լավ են զգում, պարզապես մի փոքր անսովոր կարգավիճակ է:

«Մեզ շատ գեղեցիկ ձևով դիմավորեցին նախ` հիվանդանոցից դուրս գրվելիս, հետո՝ տանը: Ամուսինս անակնկալ էր պատարստել: Զարդարել էր մեր ննջարանը: Տանն էին նաև մեր բոլոր հարազատներն ու ընկերները: Շատ ջերմ ու հաճելի ընդունելության արժանացանք»,-ասաց Սիդնին:

Նա նշեց, որ չի պատրաստվում երկար դադար վերցնել, շուտով կրկին աշխատանքի կվերադառնա, իսկ երեխայի խնամքի հարցում շատ օգնականներ ունի: «Ես այդ առումով հանգիստ եմ, որովհետև նախ՝ քույրս արդեն երկու բալիկ ունի և փորձառու մայրիկ է, բացի այդ, մայրս ու ամուսինս ինձ կօգնեն»,-եզրափակեց նա: