«Ինձ չեմ տեսնում այդ կերպարում». Անի Պետրոսյանը՝ «Այրված անուրջներում» իր մասնակցության մասին

Դերասանուհի Անի Պետրոսյանին հեռուստադիտողները այսօրվանից կտեսնեն «Շանթ» հեռուստաընկերության եթերում մեկնարկող նոր՝ «Այրված անուրջներ» խորագրով հեռուստասերիալում: Անին Tert.am Life-ին պատմել է առաջարկը ստանալու, իր մարմնավորած կերպարի և խաղընկերների հետ աշխատանքի մասին:

Դերասանուհին ասաց, որ առաջարկը ստացել է դեռևս մարտ ամսին, երբ նկարահանվում էր «Ճակատագրի պատասխանը» հեռուստանովելում. «Այնտեղ գլխավոր հերոսուհուն էի մարմնավորում, համատեղելն ինձ համար շատ դժվար կլիներ, ուստի սկզբում հրաժարվեցի առաջարկից: Հետո հեռուտաընկերությունը համաձայնեց հարմարեցնել մեր աշխատանքը և ընդգրկվեցի սերիալում»:

Անին սերիալում մարմնավորում է Մարինեին, որը դերասանուհու խոսքով, շատ դրամատիկ կերպար է: Նա անկեղծացավ, որ ի սկզբանե իրեն այդ կերպարում չի պատկերացրել:  

«Ես ինձ չեմ տեսնում այդ կերպարում, նույնիսկ փորձնական վիդեոնկարահանմանը գնացել էի ուղղակի գնալու համար, որպեսզի ոչ ոքի չնեղացնեմ, բայց ի վերջո ինձ ընտրեցին այդ դերը խաղալու համար: Մարմնավորում եմ մի կնոջ, որն ամուսնացել է վաղ տարիքում և արդեն մեծ երեխաներ ունի, ապրել ու ապրում է շատ դժվար կյանքով: Ինձ համար շատ դժվար է մարմնավորել այդ կերպարը: Ամեն դեպքում փորձել եմ անկեղծ լինել և հանդիսիատեսը կդատի»,- ասաց նա և ավելացրեց, որ հեռուտասերիալի սյուժեն հետաքրքիր է ու չկրկնվող, ինչն իրեն, որպես դերասանուհի, գրավել է,- Ընդհանուր առմամբ, հեռուստասերիալը փոքր-ինչ սոցիալական հարցերի է անդրադառնում: Ցույց է տալիս այն, թե ինչպես են մեր հասարակության մեջ վերաբերվում մարդկանց, որոնք կյանքի ինչ-որ փուլում սայթաքել են, ինչպիսի հարձակումներ կարող են լինել նրանց ընտանիքի անդամների նկատմամբ»:

Դերասանուհու խոսքով՝ ստեղծագործական թիմի անդամներից շատերի հետ համատեղ աշխատանքի առիթ արդեն ունեցել է նախորդ հեռուստասերիալում, իսկ իր հիմնական խաղընկերների մեջ կան մարդիկ, որոնց հետ առաջին անգամ է աշխատում: Նրա ամուսնու կերպարը մարմնավորում է Սուրեն Առուստամյանը, իսկ դստեր դերում հանդես է գալիս երիտասարդ դերասանուհի Մարիամ Ալեքսանյանը:

«Ուրախ եմ, որ հենց իրենք են հիմնական խաղընկերներս: Մարիամը շնորհալի դերասանուհի է, որի հետ աշխատելը շատ հեշտ է: Նույնը կարող եմ ասել Սուրենի մասին: Նկարահանման հրապարակում լավ գործընկերներ ունենալն ինձ համար շատ կարևոր է: Չեմ կարող խաղալ մի մարդու հետ, որը զգացմունք ու խաղի փորձ չունի: Իմ համաձայնության հիմնական պատճառն այն է, որ այստեղ նկարահանվում են փորձառու, ինտելեկտով մարդիկ»,- ասաց դերասանուհին և ավելացրեց, որ  նոր առաջարկներ ընդունելիս իր համար կարևոր է նաև  հոնորարը:

Անին նշեց, որ այս ընթացքում գեղարվեստական ֆիլմերում նկարահանվելու առաջարկներ ևս ստացել է, սակայն չի ընդունել։ «Այս տարի եղավ Արշալույս Հարությունյանի՝ «Մեղրամիս» ֆիլմի պրեմիերան, որտեղ ես էլ եմ խաղում: Այլ առաջարկներ ունեմ, բայց եթե անկեղծ լինեմ, այսօր Հայաստանում շատ լուրջ դրամատիկ, խորիմաստ  ֆիլմեր նկարահանելու միտում չեմ տեսնում՝ ավելի շատ կոմերցիոն գործեր են: Հրաժարվել եմ երկու գործից, որոնցից մեկն այս պահին արդեն նկարահանվում է»,- եզրափակեց դերասանուհին: