«Արդեն որոշ չափով ընտելացել եմ ամերիկյան կյանքին». Out Dance-ից Մարիամ Հովհաննիսյանը՝ ԱՄՆ մշտական բնակության մեկնելու պատճառի և գործունեության մասին

Մշտապես ավելին սովորելու ձգտումն ու մասնագիտության մեջ կատարելագործվելը պարուհի Մարիամ Հովհաննիսյանի համար կարևոր սկզբունքներ են: Մարիամը լեզվաբան, մանկավարժ ու միջմշակութային հաղորդակցության մասնագետ է, սակայն նրա համար պարն է դարձել հիմնական մասնագիտություն և կենսակերպի անբաժան մաս: Պարուհին այժմ գտնվում է ԱՄՆ-ում: Նա մեկնել է մշտական բնակության:

Մարիամը Tert.am Life-ի հետ զրույցում պատմել է ԱՄՆ մեկնելու պատճառի, այնտեղ ծավալած գործունեության, ունեցած դժվարությունների և մասնագիտական նպատակների մասին:

Հեռուստադիտողներից շատերին Մարիամը հայտնի դարձավ «Շանթ» հեռուստաընկերության Out Dance նախագծից: Պարուհին նշեց, որ դերասանական կրթություն չունի և հենց այդ պատճառով է հրաժարվել սերիալներում ու ֆիլմերում նկարահանվելու շատ առաջարկներից. «Outdance-ը, իր ֆորմատով լինելով պարային և հումորային նախագիծ, ինձ շատ գրավեց նախ այն պատճառով, որ նախադեպը չունեցող էր և ամենակարևորը, որ անմիջական կապ ուներ իմ մասնագիտության հետ»:

Սիրելի մասնագիտությամբ գործունեությունը Մարիամն այսուհետև կշարունակի ԱՄՆ-ում: Այնտեղ մեկնելու հիմնական պատճառը պարուհու խոսքով, ընտանիքի կողքին լինելն է եղել: Նա նշեց, որ ընտանիքն արդեն մոտ մեկ տարի է ԱՄՆ-ում է՝ Կալիֆոռնիա նահանգի Փասադենա քաղաքում:

 «Իրարից հեռու ապրել ենք հինգ ամիս:  Բացի ընտանիքս, այստեղ են նաև բարեկամներիցս մի քանիսն ու ինձ շատ հարազատ ընկերներ, գործընկերներ և ծանոթներ։ Կալիֆորնիայում հայերս շրջապատի խնդիր, կարծում եմ, երբեք չենք ունենա: Իսկ նոր շրջապատ արդեն հասցրել եմ ձեռք բերել։ Ամեն դեպքում միշտ հաճելի է շփվել նոր ու հետաքրքիր մարդկանց հետ և նոր բաներ սովորել»,- ասաց նա:

Պարուհին նշեց, որ Կալիֆորնիայում արդեն սկսել է պարային ակտիվ գործունեությամբ զբաղվել, նաև՝ դասավանդել: «Դասավանդում եմ այստեղի Gold’s gym-ում և աշխարհահռչակ Fred Astaire պարային ստուդիայում։ Պլաններ ունեմ գործունեություն ծավալել նաև հեռուստասեսությունում, բայց դեռ փակագծերը բացել չեմ ուզում,-ասաց նա և ավելացրեց, որ շատերի նման ժամանակին ունեցել է ամերիկյան երազանք, որն ԱՄՆ հասնելուն պես վերածվել է նպատակի,-Նպատակ ունեմ իմ մասնագիտությամբ մեծ հաջողությունների հասնել: Աշխատում եմ այդ ուղղությամբ և հուսամ, որ կհասնեմ նրան, ինչին ձգտում եմ: Երբեք չեմ ձգտում հասնել ամենաբարձր կետին: Դա կտանի անկշտության, որից ամենաշատն եմ վախենում, պարզապես ձգտում եմ միշտ նոր բաներ սովորել, մասնագիտությանս մեջ  ավելի կատարելագործել, ստեղծել իմն ու լսելի դառնալ, իսկ թե ուր կհասնեմ, դա թող լինի Աստծո կամքով»։

Մարիամը նշեց, որ առաջին անգամ է  ԱՄՆ-ում: Բազմիցս փորձել է մեկնել, սակայն չի հաջողվել: Պարուհին հասցրել է լինել  Magic Mountain-ում, հեքիաթային Disney Land-ում, Universal studio-ի տաղավարներում, որտեղ նկարահանվել են հոլիվուդյան շատ հայտնի ֆիլմեր. «Եղել եմ նաև երազանքներիս քաղաքներից մեկում՝ Լաս Վեգասում, որն ինձ համար ամենտապավորիչն էր: Վաղուց էի երազում հայտնվել այնտեղ: Կարելի է ասել՝ կատարվեց իմ վաղեմի երազանքներից մեկը»:

Այդուհանդերձ, Մարիամի խոսքով, ԱՄՆ տեղափոխվելու սկզբնական փուլում դժվարություններ ունեցել է. մի կողմից կարոտն է հայրենիքի, հարազատների ու ընկերների նկատմամբ, մյուս կողմից՝ օտար միջավայրին ու ապրելակերպին հարմարվելը, օտարերկրացիների հետ աշխատելը: «Կարոտում ու հիշում եմ ամեն վայրկյան, բայց հույս ունեմ, որ կկարողանամ շուտով գալ ու կարոտս առնել բոլորից։ Հիմա, երբ արդեն որոշ չափով ընտելացել եմ այստեղի կյանքին, կենտրոնացել եմ կարիերայիս վրա: Փորձում եմ օգտագործել այն բոլոր լայն հնարավորությունները, որոնք տալիս է այս երկիրը մեծ հաջողությունների հասնելու համար»,-ասաց նա:

Կարիերայում հաջողությունների հասնելու ցանկության մասին խոսելով՝ Մարիամը անձնական կյանքի մասին նախընտրում է լռել: Տեսակով կարիերիստ լինելով՝ նա չի պատկերացնում երբևէ հայտնվել ընտանիք թե կարիերա ընտրության առաջ:  «Սա թերևս ամենաանընդունելի գաղափարն է ինձ համար, քանի որ մարդու արտաքին աշխարհն իր ներքինի արտացոլանքն է և չեմ կարծում, որ ընտանիքս այդքան դաժան կգտնվի և ինձ նման ըտրության առաջ կկանգնեցնի։ Այնուամենայնիվ, կասեմ, որ բնական է կընտրեմ ընտանիքս, որովհետև ինձ համար ընտանիքից առավել ոչինչ չկա այս կյանքում, բայց փոխարենը կկորցնեմ ինձ ու էությունս։ Չգիտեմ, կարծում եմ դրանք տարբեր բաներ են ու պետք չէ երբեք մարդուն նման ճակատագրական ու սթրեսային ընտրության առաջ կանգնեցնել»,- եզրափակեց նա: