«Շատերը չեն պատկերացնում, որ ես անչափահաս եմ». «Ավազե դղյակից» Անելյա Գուբրյանը՝ դպրոցն ավարտելու,15 տարեկանում մատուցողուհի աշխատելու և ապագա մասնագիտության մասին

Մոդել, դերասանուհի Անելյա Գուբրյանը, ում հեռուստադիտողները ճանաչեցին «Ավազե դղյակ» հեռուստասերիալից, երեկ ավարտել է դպրոցը: 17-ամյա դերասանուհին նշեց, որ այս փաստը շատերին զարմանալու առիթ է տվել, քանի որ իրեն բոլորն ավելի հասուն տարիքի են ընկալում: Անելյան դրանից չի նեղսրտում, ավելին՝ ինքն էլ է կարծում, որ ժամանակից շուտ հասունացել ու ինքնուրույն է դարձել՝ դեռ 15 տարեկանից աշխատելով: 

Երիտասարդ դերասանուհին Tert.am Life-ին պատմել է, թե ինչ աշխատանքով է զբաղվել մինչև այս ասպարեզում հայտնվելը և խոսել է դպրոցական կյանքին հրաժեշտ տալու, համալսարան ընդունվելու ու հայրիկի կողմից ստացած նվերի մասին:

Անելյան սովորել է Անդրանիկ Մարգարյանի անվան թիվ 29 ավագ դպրոցում, որն ավարտել է բարձր գնահատականներով: Նա նշեց, որ երեկ ստացել է դպրոցի ավարտական վկայանը, այսօր էլ հանձնել ընդունելության վերջին քննությունը:

«Ավագ դպրոց ընդունվելուս պահից անհամբեր սպասում էի՝ երբ եմ ավարտելու: Դպրոցը շատ եմ սիրել, պարզապես վերջին մեկ ու կես տարվա ընթացքում, երբ կարելի է ասել սկսվեց իմ կարիերան, զբաղվածության պատճառով չէի հասցնում դասերի հաճախել: Թե՛ տնօրինությունը, թե՛ ուսուցչական կազմը ինձ ընդառաջում էին և սատարում իմ գործունեությունը, ինչի համար շնորհակալ եմ»,-ասաց նա:

Մոդելը նշեց, որ արդեն բազմաթիվ շնորհավորանքներ և նվերներ է ստացել դպրոցն ավարտելու կապակցությամբ, որոնցից նա առանձնացրեց հայրիկի նվերը. «Միշտ երազել էի սպիտակ ոսկուց խաչ ունենալ և հայրիկս ինձ դա նվիրեց Վերջին զանգի օրը: Շատ հուզիչ պահ էր ինձ համար: Այն իմ թալիսմանն է դարձել և միշտ կրում եմ»:

 Անելյայի խոսքով դպրոցի ավարտական վկայականով լուսանկարը սոցիալական ցանցի իր էջերում մեծ աղմուկ է բարձրացրել ու հարուցել շատերի զարմանքը.  «Երեկ ստացել եմ մոտավորապես 250 հաղորդագրություն, որտեղ մարդիկ իրենց զարմանքն են հայտնում: 100-ից 98-ը ուղղակի չեն պատկերացնում, որ ես անչափահաս եմ ու դա արդեն ինձ համար սովորական է դարձել:  Չեմ կարող ասել հասակս է պատճառը, պահելաձևս թե մտածելակերպս, բայց ես փորձում եմ օգտվել այդ հանգամանքից և արդարացանել իրենց պատկերացումները,-ասաց Անելյան և ավելացրեց, որ ինքն էլ իրեն 17 տարեկանում բավականին հասուն և ինքնուրույն տեսակ է համարում,- Կարծում եմ՝ դրան նպաստել է նաև այն, որ ես դեռ 15 տարեկանից սկսել եմ աշխատել: Երևանի գինետներից մեկում երկու տարի մատուցողուհի եմ աշխատել: Շատ լավ ծանոթություններ եմ ձեռք բերել այդ ընթացքում, նաև հնարավորություն՝ որպես անհատ զարգանալու, մտածելու ավելի հասուն քան իմ տարիքն է»:

Անելյան ասաց, որ վաղ տարիքից աշխատելը ֆինանսական խնդիրներով և ընտանիքին օգնելու ցանկությամբ  պայմանավորված չի եղել: Նա նշեց, որ ընտանիքը իր այդ որոշմանը դեմ չի գնացել, ավելին՝ օգնել է այդ հարցում:

«Տարիքիս հետ կապված խնդիր կար և ինձ մեծ դժվարությամբ ընդունեցին: Հայրիկս միջնորդեց և նրա ընկերոջ ռեստորանում աշխատեցի: Ֆինանասկան խնդիր երբևիցե չեմ ունեցել:  Նույնիսկ  աշխատելուս ընթացքում իմ գումար ու ընտանիքիս գումար հասկացություն չի եղել: Ես պարզապես ուզում էի ինքնուրույնություն ձեռք բերել: Այդ փորձն ինձ օգնեց կյանքի նկատմամբ ավելի խելացի հայացքներ ունենալ, նաև մարդկանց ավելի հեշտ ճանաչել, քանի որ իմ աշխատանքում մարդկանց հետ շփումն առաջնային տեղ ուներ»,-ասաց նա:

Անելյան նշեց, որ կյանքի հաջորդ կարևորագույն փուլ մտնում է վճռական տրամադրված ու այն բազմաբովանդակ դարձնելու ակնկալիքով: Երիտասարդ դերասանուհին մասնագիտական բոլորովին այլ ուղղվածություն է ընտրել: Նա նշեց, որ մեկ ու կես տարի պարապել է Տնտեսագիտական համալսարան ընդունվելու համար, իսկ վերջին մի քանի ամիսներին կտրուկ փոխել որոշումը և ընտրել ԵՊՀ-ի Ժուռնալիստիկայի ֆակուլտետը: Անելյայի խոսքով լրագրողական աշխատանքն ու լրատվական դաշտն իրեն մշտապես հետաքրքրել են: Նա նշեց, որ չի պատրաստվում հրաժարվել մոդելի և դերասանուհու աշխատանքից և փորձելու է երեքն էլ համատեղել:

«Քանի որ ես մեծացել եմ ռուսախոս ընտանիքում, Ժուռնալիստիկայի ֆակուլտետն ինձ հնարավորություն կտա վարժ տիրապետել հայերենին և գրագետ խոսել: Ես ցանկանում եմ հեռուստատեսությունում որպես հաղորդավարուհի հանդես գալ և կարծում եմ, որ այս մասնագիտությունը լավ հիմք կլինի դրա համար»,-ասաց նա:

Դերասանուհին նշեց, որ «Ավազե դղյակ» հեռուստասերիալում նկարահանվելուց հետո այս ընթացքում բազմաթիվ առաջարկներ է ստացել, սակայն դրանք մերժել է քննաշրջանի մեջ գտնվելու պատճառով: «Այդ շրջանում ավելի շատ մտածում էի ընդունվելուս մասին: Նույնիսկ մոդելային ցուցադրությունների առաջարկներ եմ մերժել զբաղվածության պատճառով: Հիմա արդեն ազատ եմ և շարունակելու եմ մոդելային ու դերասանական գործունեությունս: Գուցե քննարկվեն այլ առաջարկներ»,-եզրափակեց նա: