«Ամեն բան արել եմ, որ հայրս հպարտանա ինձնով». «Միսս Հայուհի» Արենա Զեյնալյանը` մրցույթից առաջ հոր մահվան, հույզերի և «Միսս Աշխարհի» մասին

Tert.am Life-ն իր ընթերցողներին արդեն ներկայացրել է «Միսս Հայուհի 2018» գեղեցկության մրցույթի մանրամասներն ու հաղթող Արենա Զեյնալյանին: «Միսս Հայուհու» տիտղոսակրի հետ զրուցել ենք  մրցույթին մասնակցելու որոշման, դրան հաջորդած դժվարին փուլի՝ հոր կորստի, հաղթանակից հետո իր հույզերի, ինչպես նաև «Միսս Աշխարհում» Հայաստանն ըստ արժանվույն ներկայացնելու ցանկության մասին: 

24-ամյա Արենան ծնվել և մեծացել է Թեհրանում, ծնողներն այնտեղ են հաստատված: Մասնագիտությամբ կենսաբան է, բայց դեռ փոքր հասակից հետաքրքրված է նկարչությամբ, որով զբաղվում է մինչև հիմա: Նա պատմեց, որ նախորդ տարի Թեհրանում կայացել է իր առաջին անհատական ցուցահանդեսը: Արենան հիմնականում նկարում է աբստրակտ ոճում, զբաղվում է նաև ոսկերչությամբ` շարունակելով հոր գործը։

«Հայրիկս Թեհրանում շատ հայտնի ոսկերիչ է եղել: Այդ գործի հանդեպ հետաքրքրությունն իրենից եմ ժառանգել: Նա է ինձ սովորեցրել բոլոր նրբությունները: Ես մեծ սեր եմ ունեցել դիզայնի նկատմամբ: Սկզբնական փուլում նկարում էի, համակարգչով ոսկյա զարդերի դիզայն էի մշակում, հետո սկսեցի ինքս պատրաստել զարդերը: Ոսկյա զարդերի մի քանի շարք ունեմ»,- ասաց Արենան և ավելացրեց, որ մի քանի ամիս է` ոսկերչությամբ չի զբաղվում, բայց մտադիր է վերսկսել աշխատանքը:

Նա նշեց, որ Իրանում զբաղվել է մոդելային աշխատանքով, սակայն մեծ բեմերում հանդես չի եկել, «Միսս Հայուհին» իր առաջին մեծ փորձն էր։ «Իրանում մոդելային գործակալություն կար, որտեղից թրեյնինգներ անցնելու և որպես մոդել նկարահանվելու առաջարկ ստացա: Այնտեղ շատ հնարավորություններ չկան այս ոլորտում առաջ գնալու համար, քանի որ իսլամական պետություն է, մոդելինգը լուրջ չեն ընդունում: Իրենք փոքր մրցույթ ունեին, որին 11 հազար աղջիկ հայտագրվել էին, բայց անցել էին 40-ը: Ես նրանց թվում էի և առաջին հորիզոնականը զբաղեցրեցի մոդելային քայլքի համար»,- պատմեց Արենան:

Նրա խոսքով` տարին մեկ–երկու անգամ պարտադիր այցելել է Հայաստան, իսկ այս անգամ այցի բուն նպատակը մրցույթին մասնակցելն է եղել: Արենան նշեց, որ «Միսս Հայուհի» մրցույթն իրեն գրավել է առաջին հերթին այն հանգամանքով, որ իր հայրենիքում է կայանալու: Մրցույթին մասնակցելու որոշման հարցում նրան մեծապես քաջալերել է հայրիկը, որի անժամանակ կորուստը, սակայն, Արենային շատ է հուսահատեցրել, միաժամանակ, ստիպել հանուն հայրիկի հիշատակի չհրաժարվել մասնկացությունից և կատարել նրա ցանկությունը:

«Երեք ամիս առաջ եմ կորցրել հորս: Մենք ծրագրել էինք միասին գալ Հայաստան, բայց չստացվեց... նա սրտի խնդիր ուներ, բայց իր կորուստն անսպասելի էր։  Հայրս շատ ուրախ էր մասնակցությանս որոշման համար: Իր հիշատակի համար եմ եկել: Ամեն բան արել եմ, որ հպարտանա ինձնով: Իր մահից 10 օր հետո վիդեոհոլովակ ուղարկեցի Գոհար Հարությունյանին, որպեսզի հաստատեմ իմ մասնակցությունը: Հասկացա, որ նա ուրախ չէր լինի, եթե հրաժարվեի մասնակցությունից, քանի որ երազում էր տեսնել ինձ այդ բեմում: Ուժերս հավաքեցի և եկա Հայաստան: Ես վստահ եմ, որ ինքը ժպտում է ինձ վերևից՝ իմ հաղթանակը տեսնելով»,-ասաց նա:

Արենան նշեց, որ մրցույթին նախապատարստվել է իր համար շատ դժվարին փուլում, բայց ջանք ու եռանդ չի խնայել հնարավորինս լավ հանդես գալու համար: «Միսս Հայուհու» տիտղոսին արժանանալն ու թագադրվելը Արենայի երազանքն է եղել, որն իրականություն դարձավ:

«Ես շատ եմ ջանք թափել այդ ճանապարհին: Շատ եմ կարդացել, ուսումնասիրել մոդելային աշխարհին առնչվող հարցեր՝ սկսած ճիշտ դիմահարդարումից, զգեստի ընտրությունից: Անգամ, հայրիկիս մահվանից հետո հուսահատված գնացել էի զգեստ փորձելու: Մրցույթի զգեստն ինձ հետ Թեհրանից էի բերել: Ի սկզբանե չէի պատկերացնում, որ ես կհաղթեմ, որովհետև բոլոր աղջիկները շատ լավն էին թե՛ ներքուստ, թե՛ արտաքնապես: Բայց շատ էի ցանկանում հաղթել նաև մայրիկիս, տատիկիս ուրախացնելու համար: Ես դրա համար ամեն բան արեցի: Չգիտեի՝ արդյունքը ինչ է լինելու, բայց հոգուս խորքում միշտ երազել եմ այդ պահի մասին,- ասաց Արենան և ավելացրեց, որ բեմում իր անունը լսելիս մի պահ շոկի մեջ է ընկել,- Մի քանի վայրկյան չէի պատկերացնում, որ այդ ամենն իրական է: Հետո սկսեցի հուզվել, արցունքներս հոսեցին: Շատ մեծ ուրախություն ապրեցի»:

Արենան արժանացավ նաև «Միսս Համերաշխություն» տիտղոսին, որը շնորհվում է մրցույթի մասնակից աղջիկների ընտրությամբ: Նա նշեց, որ բոլոր աղջիկների հետ հասցրել է ընկերանալ և իր համար մեծ պատիվ է արժանանալ նաև նրանց գնահատականին. «Նրանցից յուրաքանչյուրին շատ սիրում եմ: «Միսս Համերաշխություն» ճանաչվելը ինձ մոտ նույնչափ հուզմունք առաջացրեց: Շատ շնորհակալ եմ աղջիկներին ինձ աջակցելու համար»:

«Միսս Հայուհին» նկատեց, որ առաջիկայում իրեն ավելի մեծ և պատասխանատու փորձություն է սպասվում: Նա նշեց, որ բոլոր ուժերը կենտրոնացնելու է «Միսս Աշխարհ» մրցույթում Հայաստանը լավագույնս ներկայացնելու համար: «Ես հավատում եմ, որ Հայաստանն արժանի է հաղթանակի: «Միսս Աշխարհ» մրցույթին գնում եմ ոչ թե պարզապես մասնակցության, այլ հաղթանակի համար: Ուզում եմ այնտեղ Հայաստանը ներկայացնել ոչ միայն որպես գեղեցիկ դեմք, այլև խոսել մեր երկրի պատմությունից, մեզ համար կարևոր հարցերից: Մենք փոքր երկիր ենք, բայց  պետք է մեր մասին լսելի դարձնենք աշխարհին: Ես օգտվելու եմ այս առիթից և ըստ արժանվույն ներկայացնելու եմ Հայաստանը»,-ասաց նա:

Արենան դեռ հստակ չգիտի, մրցույթին նախապատարստվելու շրջանում Հայաստանո՞ւմ կմնա, թե՞ կվերադառնա Թեհրան: Ասում է՝ շատ կցանկանար Հայաստանում ապրել, բայց այստեղ իր կացության խնդիրը պետք է լուծի: Ապագայում «Միսս Հայուհին» մտադիր է Հայաստանում բարեգործական հիմնադրամ ստեղծել և ղեկավարել, որը կօգնի կարիքավոր երեխաներին: