«Սկզբում մեզ գործն էր կապում, հետո մտերմացանք». Ջուլիա Եղշատյանը՝ Բեն Ավետիսյանի, Շուշաննա Թովմասյանի ու մյուսների հետ հարաբերությունների և ամառային հանգստի մասին

Երիտասարդ դերասանուհի Ջուլիա Եղշատյանը, որին հեռուստադիտողները ճանաչեցին «Երևի» հեռուստասերիալից, ամառային հանգստի մասին դեռ չի մտածել, քանի որ սերիալի նկարահանումները շարունակվում են: Նա ասաց, որ ստեղծագործական թիմով փորձում են աշխատանքը համատեղել հանգստի հետ:

Tert.am Life-ի հետ զրույցում Ջուլիան պատմել է «Երևի» սերիալի անձնակազմով Սևանում անցկացրած հանգստյան օրերի մասին, խոսել նրանց հետ մտերմության, առաջիկայում սպասվող ընտանեկան հանգստի և այլ հարցերի շուրջ:

Դերասանուհու խոսքով` ստեղծագործակական անձնակազմի հետ նկարահանման հրապարակից դուրս հավաքույթներ հաճախ են ունենում, օրինակ, հանգստյան օրերն անցկացրել են Սևանում: «Չնայած անձնակազմում կային մարդիկ, որոնց մինչև սերիալում նկարահանվելն արդեն ճանաչում էի, շատերը Թատերականում իմ կուրսընկերներն են եղել, սկզբում բոլորիս գործն էր կապում, հետո շատ մտերմացանք։ Սևանում երկու հիանալի օր ունեցանք, շատ ջերմ ու դրական մթնոլորտում: Մեր լավ ընկեր՝ Բեն Ավետիսյանը շատ հետաքրքիր խաղեր էր կազմակերպում: Բավականին ակտիվ հանգիստ ունեցանք»,-պատմեց Ջուլիան:

Ջուլիան ասաց, որ նախընտրում է ակտիվ հանգիստ ունենալ: Այս տարի նախատեսել է ծովափնյա հանգիստ ունենալ: Թեև դեռ հստակ չի ծրագրել` ուր է գնալու, նշեց, որ միանշանակ, արձակուրդն ընտանիքի հետ է անցկացնելու:  «Երբ ասում են հանգիստ կամ արձակուրդ, միանգամից ընտանիքի հետ եմ պատկերացնում: Դեռ չգիտեմ, թե երբ եմ արձակուրդ ունենալու, առայժմ փորձում եմ Հայաստանի սահմաններում հանգստանալ: Ընտանիքով տարբեր վայրեր ենք գնում, նաև քաղաքից դուրս՝ բնության գրկում ենք հաճախ լինում»,-ասաց նա:

Ջուլիան համոզված է, որ անկախ վայրից, կարող ես ունենալ հագեցած, հետաքրքիր հանգիստ ու վառ հիշողություններ, դա տեսակի հարց է: Նա նշեց, որ շատ է ցանկանում շրջագայել  եվրոպական երկրներում. «Ճամփորդել շատ եմ սիրում և կարծում եմ կհասցնեմ տարբեր երկրներում լինել»:

Ազատ ժամանակի մեծ մասը դերասանուհին անցկացնում է ընթերցանությամբ կամ լողով զբաղվելով: Վերջինը՝ Ջուլիայի մոտ սիրողական մակարդակի է  և, հատկապես, այս օրերին շոգի դեմ փրկօղակ է դառնում: Այդուհանդերձ, հանգստին լիարժեք տրվել, դերասանուհին դեռ չի պատրաստվում: Սիրելի մասնագիտությամբ զբաղվելն ու առաջին հեռուստատեսային քայլերն անելը Ջուլիային ոգևորում են մասնագիտության վրա ավելի շատ կենտրոնանալ։ Այնուամենայնիվ մասնագիտության մեջ նա ունի իր տաբուները։

«Միշտ պետք է ձգտեմ ավելիին, որ խաղս լինի էսթետիկ թե՛ բեմում, թե՛ էկրաններին: Միայն այդ պատճառով կհրաժարվեմ բաց տեսարաններում նկարահանվել: Մեր հասարակությունը դեռ պատարաստ չէ դա ընդունելու: Իհարկե, կան բաց տեսարաններ, որոնք հատուկ հնարքների միջոցով հնարավոր է ստանալ: Թատերական ինստիտուտում մենք դա սովորել ենք: Ես երկու անգամ խաղացել եմ համբույրի տեսարանում, որը նման հնարքների միջոցով ենք ստացել՝ առանց իրականում համբուրվելու: Այդպիսի տեսարանները կարող ես հաղթահարել պրոֆեսիոնալիզմի շնորհիվ,  բայց իրական համբույրի տեսարանում նկարահանվել դեռ պատրաստ չեմ»,-եզրափակեց նա: