«Փորձում եմ չմտածել բաժանման մասին». Արփիի որդու առաջին լուսանկարներն ու կապվածությունը մայրիկի հետ

Մայիսին լույս աշխարհ եկավ երգչուհի Արփիի և թմբկահար Ալբերտ Հովհաննիսյանի երկրորդ փոքրիկը։ Երկու ամսական Ակսելն անցել է իր անդրանիկ ֆոտոշարքը, որն Արփին առաջինը տրամադրել է Tert.am Life–ին ու պատմել որդու ծննդից հետո կյանքի փոփոխությունների մասին։

Մինչև որդու ծնունդը Արփին միշտ նշում էր, որ իրեն չի պատկերացնում որպես տղա երեխայի մայրիկ, որդու ծննդից հետո, սակայն, երգչուհու պատկերացումները փոխվել են։ Նա հասկացել է, որ տղա երեխա ունենալն իսկական երջանկություն է։

«Ես խոսքերս հետ եմ վերցնում։ Իսկապես, տղան այլ կապվածություն ունի մամայի հետ։ Ակսելն ընդհանրապես լացկան երեխա չէ։ Լուսավոր, խաղաղ բալիկ է։ Այնուամենայնիվ, երբ մի քիչ  նվնվում է, հենց գրկում եմ, անմիջապես հանգստանում է։ Անբացատրելի կապվածություն է։ Կարող է ոչ ոքի մոտ չմնա, հենց ես գրկեմ, միանգամից հանգստանա։ Ամուսինս սրտնեղում է դրանից, բայց, կարծում եմ, դա նորմալ է։ Հիմա նա ավելի շատ իմ խնամքի կարիքն ունի, երևի, ժամանակի հետ իրենց կապվածությունն ավելի կխորանա։ Ամեն դեպքում, Արևիկն էլ Ալբերտի հետ է շատ կապված։ Պապայի ու դստեր հարաբերությունները բոլորովին այլ են»,– ասաց Արփին ու վստահություն հայտնեց, որ հոր և որդու ընկերությունն ավելի ուշ կձևավորվի, երբ փոքրիկը մի քիչ մեծանա, նկատելի լինեն հետաքրքրություններ։

Խոսելով երեխաների փոխհարաբերությունների, դստեր` եղբոր հանդեպ վերաբերմունքի մասին` երգչուհին նկատեց, որ 3-ամյա աղջնակը շատ է սիրում եղբորը, բայց ունենում է խանդի իր դրսևորումները։

«Երբ եղբայրը սոսո է ուտում, գալիս, ասում է` ես էլ եմ ուզում կամ փորձում է խցկվել սայլակի մեջ, ասում է` ես էլ եմ պուճուր։ Երբեմն, երեխային տիկնիկի տեղ է դնում,  թևն է քաշում, մազն է քաշում։ Երբ քնած է լինում, ասում եմ` կամաց խոսիր, ապերը քնած է, կանգնում է կողքին ու սկսում գոռալով երգել,– ժպիտով պատմեց մայրիկն ու հավելեց, որ դրանից չեն անհանգստանում, քանի որ այդ երեխաներին հատուկ են նման դրսևորումները։ –Մեր ընկերներից շատերն ասում են, որ իրենց երեխաներն էլ են այդպես արել, երբ տանը երկրորդ երեխա է հայտնվել։ Կարծում եմ` սա ժամանակավոր բնույթ է կրում։ 3 տարեկան երեխա է, ինչ կարող ես ասել։ պետք է ուղղակի ուշադիր լինես, որ ակամա չվնասի փոքրիկին»։

Երգչուհին նկատեց, որ հիմա ավելի փորձառու և կոփված մայրիկ է, թեև այժմ էլ որոշակի  մտավախություններ ունի, հաճախ դիմում է մեծերի խորհուրդներին։

Երկրորդ երեխայի ծննդից հետո Արփին հրաժարվել է ակումբային ելույթներից, քանի որ դրանք  շատ են էներգիա խլում, սակայն աշխատել չի դադարել։ Նա հայտնեց, որ հիմնականում զբաղված է երեխայի խնամքով, մասնակցում է միայն կորպորատիվ երեկոների, որոնք իրենից 2-3 ժամ են պահանջում։

Վաղն Արփին կմեկնի Կանադա, որտեղ ելույթ  կունենա Summer Fest Armenia-ի շրջանակում։  Երգչուհին պատրաստվում է երկու երեխաներին թողնել հայրիկի խնամքին, թեև դժվարությամբ է պատկերացնում, թե ինչպես է դիմանալու կարոտին։ Արփիին տխրեցնում է հատկապես այն փաստը, որ դստեր 3-ամյակի օրը Հայաստանում չի լինելու, Ակսելից էլ առաջին անգամ է հեռու լինելու։ «4 օր է, հուսով եմ` կդիմանան առանց ինձ։ Փորձում եմ չմտածել բաժանման մասին, բայց այսօր առավոտյան նայում էի երկուսին, շատ դժվար էր պատկերացնել, որ 4 օր կողքիս չեն լինելու։ Շատ եմ նեղվում, որ ելույթս Արևիկի ծննդյան օրն է, բայց ինչ արած»,– ասաց նա։