«Սպասելիքներս մեծ են». Աշոտ Կարապետյանը՝ Costa Blanca fashion week մոդելային մրցույթում կներկայացնի Հայաստանը

14:27 • 12.07.18

Շոուբիզնես

Tert.am Life-ն իր ընթերցողներին պատմել է, որ Իսպանիայում կայանալիք «Կոստա Բլանկա միջազգային նորաձևության դիզայներական շաբաթ» (Costa Blanca fashion week) մրցույթին Կովկասը կներկայացնի Իլոնա Նուրիբեկյանը, Հայաստանը` Անուշիկ Ավագյանը: Այս անգամ ներկայացնում ենք մրցույթին Հայաստանը ներկայացնող տղա մոդելին: Նա 24-ամյա Աշոտ Կարապետյանն է:

Tert.am Life-ի հետ զրույցում Աշոտը պատմել է մասնակցության առաջարկը ստանալու, նախապատրաստական աշխատանքների և ակնկալիքների մասին:

Նա պատմեց, որ երկար ժամանակ է, ինչ զբաղվում է մոդելային աշխատանքով՝ մասնավորապես ֆոտոմոդելինգով: Աշոտը սովորել է Երգի Պետական թատրոնում հաղորդավարության բաժնում, այնուհետև Թատրոնի և Կինոյի պետական ինստիտուտում: Նրա խոսքով` փորձում է համատեղել երեք մասնագիտությունը:

«Մրցույթին մասնակցելու առաջարկը ստացա հաղորդավար Տիգրան Հարությունյանից: Համաձայնեցի, քանի որ որոշ չափով ինձ պատկերացնում եմ մոդելային ասպարեզում: Որոշեցի բաց չթողնել այս հնարավորությունը: Ես ավելի շատ զբաղված եմ ֆոտոմոդելինգով, քանի որ նկարահանվում եմ տարբեր ապրանքանիշների գովազդային ֆոտոշարքերում: Տարիներ առաջ պոդիումային մոդելինգի փորձ ունեցել եմ, բայց չեմ խորացել այդ ուղղությամբ»,-ասաց նա:

Աշոտը նշեց, որ դեռ փոքր հասակից է հետաքրքրված եղել դերասանի և մոդելի մասնագիտություններով: Նրա խոսքով` մեկը մյուսին լրացնում և օգնում է. «Մոդելային ասպարեզը փոքր-ինչ ռիսկային է, որովհետև այստեղ պետք է բարդույթներ չունենաս, ինքնավստահ լինես: Իմ դերասանական կրթությունն ինձ շատ է օգնում այդ հարցում: Ես բարդույթներից ազատվել եմ: Ինձ համար հեշտ է տեսախցիկների հետ անկաշկանդ աշխատելը, ես կարողանում եմ հնարավորինս ինքնավստահ ու ճիշտ ներկայանալ»:

Աշոտը հայտնեց, որ Costa Blanca fashion week մրցույթին ներկայանալու են երեք փուլով՝ ազգային տարազով, երեկոյան համազգեստով և լողազգեստով: Նրա փոխանցմամբ`հագուստների ընտրությունը վերջնական որոշված չէ, իսկ մրցույթին նախապատրաստվելու աշխատանքները վաղուց է սկսել:

«Հունվար ամսից հաճախում եմ մարզասրահ: Ֆիզիկական պատրաստվածության և անհրաժեշտ կազմվածքի հետ մեկտեղ հաճախում եմ անգլերենի դասընթացների: Այնպես եմ կազմել գրաֆիկս, որ կարողանամ լիարժեք հասցնել մրցույթին նախապատրաստվել բոլոր առումներով: Շուտով նաև մոդելային քայլքի դասընթացներ ենք անցնելու»,- ասաց նա:

Աշոտը մրցույթին մասնակցում է բարձր արդյունքներ գրանցելու ակնկալիքով. «Ամեն դեպքում վստահություն կա: Ես ամեն ինչ անում եմ կատարելագործվելու համար: Մրցույթից սպասելիքներ ունեմ: Հուսամ՝ ամեն ինչ լավ կլինի»:

Հիշեցնենք, որ Costa Blanca fashion week միջազգային մրցույթը կանցկացվի հոկտեմբերի 5-15-ը, Հայաստանից կներկայանա 4 մասնակից: