«Իրենք բեմով են ապրում, ինչպես Մեգին». Իրինա Թովմասյանի փոքր աղջիկների հաղթանակը Caucasian championship -2018 միջազգային մրցույթում

18:28 • 12.07.18

Շոուբիզնես

«Միսս Հայաստան 2000» Իրինա Թովմասյանի դստրերը՝ 5-ամյա Ալյան և 3-ամյա Մարիան հուլիսի 9-ին մասնակցել են Caucasian championship -2018 միջազգային մրցույթ-փառատոնին և իրենց զուգերգով զբաղեցրել առաջին հորիզոնականը: «Քույրիկ ունեմ» երգով ճանաչվել են «Լավագույն դուետ»: Սա մրցույթի շրջանակում փոքրիկների միակ հաղթանակը չի եղել:

Tert.am Life-ի հետ զրույցում Իրինան մանրամասներ է պատմել մրցույթ-փառատոնին աղջիկների մասնակցության մասին, խոսել իր էմոցիաներիի և նրանց հետագա երաժշտական կարիերայի մասին:

Իրինան պատմեց, որ մրցույթ-փառատոնի շրջանակում փոքրիկները հանդես են եկել նաև անհատական կատարումներով` արժանանալով ժյուրիի բարձր գնահատականին: Ալյան «Մայրիկիս» երգով գրավել է առաջին հորիզոնականը 5-7 տարեկանների խմբում, իսկ Մարիան «Չաո» երգով զբաղեցրել է երկրորդ տեղը 3-5 տարեկանների խմբում: Մրցանակը եղել է մրցույթի խորհրդանշական արձանիկն ու պատվոգիրը:

«Մրցույթ- փառատոնն ուներ 50-ից ավելի մասնակից, որոնցից միայն 10-ը պետք է անցնեին Գալա համերգի փուլ, ևս 5-ը համերգին հրավիրված էին որպես հյուրեր, նրանց թվում էր նաև մեծ դուստրս՝ Մեգին»,-հայտնեց Իրինան:

Caucasian championship -2018 միջազգային մրցույթ-փառատոնը Հայաստանում անցկացվում է 5-րդ անգամ: Մրցույթի շրջանակում անցկացվում են պարի, երաժշտական գործիքների և երգեցողության մցրույթ-փառատոններ: Իրինան նշեց, որ այս տարի մրցույթին մասնակցել են ներկայացուցիչներ Վրաստանից, Մոլդովայից, Իսրայելից, Լիբանանից և Ղազախստանից: Ժյուրիի կազմում ևս եղել են ներկայացուցիչներ այդ երկրներից: Մրցույթը նախատեսված է մինչև 18 տարեկան կատարողների համար: Իրինան նշեց, որ դստրերը մրցույթ-փառատոնի կրտսեր մասնակիցներն են եղել: Մասնակցությունն ու հաղթանակը ինչպես փոքրիկներին, այնպես էլ մայրիկին շատ է ոգևորել:

«Ամեն դեպքում, փոքրիկների համար սա լավ ու ոգևորիչ փորձ էր: Ինձ համար էլ կարևոր էր տեսնել, թե իրենց մոտ ինչպես կստացվի: Հիմա մենք ոգևորված պատրաստվում ենք մասնակցել մրցույթների նաև Հայաստանից դուրս, որոնք կլինեն ավելի մեծամասշտաբ: Իհարկե, աստիճանաբար և փոքր քայլերով, բայց առաջ ենք գնում այդ ուղղությամբ»,-ասաց Իրինան:

Նա նշեց, որ Ալյան ու Մարիան զբաղվում են պրոֆեսիոնալ երգեցողությմաբ, հաճախում են վոկալային անհատական դասընթացների: Իրինայի խոսքով` երգելու ցանկությունը փոքրիկների մոտ շատ մեծ է, դրան նպաստել է նաև Մեգիի օրինակը. «Իրենք ապրում են բեմով, ինչպես մեծ աղջիկս: Իմ աչքի առաջ ամեն ինչ կրկնվում է: Եթե նրանց մեջ այդ ցանկությունը չլինի, չես կարող ստիպել 3 տարեկան երեխային երգել»:

Մեգին ոչ միայն մրցույթի օրն է իր երգով քաջալերել կրտսեր քույրիկներին, այլև նրանց օգնել է ու կիսվել գործնական խորհուրդներով. «Մեգին ամեն օր զբաղվում է իրենց հետ: Ամեն երեկո մեր տանը համերգներ են:)»:

Իրինան ասաց, որ փոքրիկների երաժշտական կարողությունները ոչ միայն մրցույթների շրջանակում դրսևորելու, այլև նրանց անհատական երաժշտական կարիերայով ապահովելու, տեսահոլովակներ նկարահանելու ցանկություն ունի։

«Մենք արդեն այդ ամենի մեջ ենք: Ես չէի կարող դրանից խուսափել, քանի որ նրանց ցանկությունը իսկապես շատ մեծ է: Միշտ մայրիկներին խորհուրդ եմ տալիս չանտեսել երեխաների ցանկությունները, ինքս էլ այդպես պետք է վարվեի: Եթե կա ցանկություն ու հատկապես համապատասխան ունակություններ, ափսոս է դրան չհետևելը»,- եզրափակեց Իրինան: