«Աշխատանքն ու հանգիստը համատեղում եմ». Ռաֆոն՝ ամառային հանգստի նախընտրելի տարբերակի մասին

Դերասան Ռաֆայել Երանոսյանը արդեն մի քանի տարի է ամառն անցկացնում է ակտիվ աշխատանքային ռիթմի մեջ: Ասում է՝ հատուկ հանգստի համար ժամանակ հատկացնել չի կարողանում, փորձում է համատեղել աշխատանքի հետ: Այս տարին ևս դերասանի համար բացառություն չէ: Ամռան շոգ օրերը մեծմասամբ անցնում են նկարահանման հրապարակում և թատրոնի բեմում:

Tert.am Life-ի հետ զրույցում Ռաֆոն պատմել է հանգստի նախընտրելի տարբերակի, Հայաստանում սիրելի հանգստավայրի և օգոստոսին իր հարազատ գյուղում հանգիստն ացնկացնելու ծրագրերի մասին:

Դերասանը նշեց, որ լիարժեք հանգստանալու ժամկետն իր դեպքում 10-ը օրն է: Դրանից հետո, Ռաֆոյի համոզմամբ, հանգիստը վերածվում է ձանձրույթի. «Ես ավելի շատ նախընտրում եմ ծովափնյա հանգիստը՝ ջուր, ավազ, արև ու աղջիկներ»:

Չնայած իր նախընտրությանը, Ռաֆոն նշեց, որ  հանգիստը ծովում անցկացնելու հնարավորություն վաղուց չի ունեցել, քանի որ զբաղվածությունը շատ է: Դերասանն ասաց, որ այս փուլում զբաղված է գեղարվեստական ֆիլմում նկարահանվելով, միաժամանակ թատրոնում փորձերով: Նա պատրաստվում է իր սթենդ-ափ ներկայացմանը, որը հանդիսատեսի դատին կհանձնի, հավանաբար, սեպտեմբերին:

«Մի ամիս է՝ ես առավոտյան ժամը 6-ին արթնանում եմ գնում նկարահանման և գիշերը 11-ին  վերադառնում եմ տուն ու քնում: Ես աշխատանքն ու հանգիստը համատեղում եմ: Եթե նկարահանումների բերումով քաղաքից դուրս ենք գնում, օրինակ՝ Ծաղկաձոր, փորձում եմ այդ  ընթացքում փոքր-ինչ հանգստանալ, վայելել բնությունը,-ասաց նա և ավելացրեց, որ ամեն դեպքում հոգնածություն զգում է,- Ես զգում եմ, որ ամեն օր աշխատում եմ և պարզապես մոռանում եմ ապրել, բայց ինչ արած՝ գործի մեջ ես ու քանի պահանջարկ ունես, պիտի աշխատես»:

Այդուհանդերձ, Ռաֆոն նշեց, որ խիտ աշխատանքային գրաֆիկից էլ հաջողացնում է 1-2 օր վերցնել ու հանգիստը կազմակերպել Հայաստանի տարածքում: «Հայաստանի յուրաքանչյուր վայր ինձ համար շատ սիրելի է: Հատկապես Դիլիջան եմ գնում՝ խաշ ուտելու կամ պարզապես երկու օրով քաղաքից կտրվելու համար»,-ասաց նա:

Դիտարկմանը, որ շատերը կես կատակ կես լուրջ նշում են, թե Հայաստանի տարածքում հանգիստն ավելի թանկ հաճույք է, քան որևէ այլ երկիր մեկնելը, Ռաֆոն արձագանքեց. «Ես գումար աշխատում եմ, դրա համար  Հայաստանում եմ հանգստանում»:

Դերասանը նշեց, որ ծրագրել է  նաև իր հարազատ՝ Արմավիրի մարզի Լենուղի գյուղ գնալ և մի քանի օր էլ այնտեղ անցկացնել հանգիստը. «Օգոստոսին եմ որոշել գնալ: Կարծում եմ այդ ժամանակ փոքր-ինչ թեթևացած կլինի աշխատանքային գրաֆիկս: Իսկ մինչ այդ  Անդոյի հետ պատրաստվում ենք Սևանում մեր նոր տեսահոլովակի նկարահանմանը, որը տեղի կունենա երկու օրից»,-ասաց Ռաֆոն և ավելացրեց, որ տեսահոլովակի պրեմիերան լինելու է հուլիսի 25-ին ՝ իր ծննդյան օրը: Նա նշեց, որ որևէ հատուկ միջոցառում չի նախատեսել, պարզապես ընկերներն են որոշել իրեն նման նվեր մատուցել: