Աստղիկ Սաֆարյանը նոր տեսահոլովակ է նկարահանել Փարիզի կենտրոնում

Երգչուհի Աստղիկ Սաֆարյանը վաղն իր երկրպագուներին կներկայացնի նոր տեսահոլովակ, որը նկարահանել է Փարիզում։ Երգչուհին նոր աշխատանքի առաջին մանրամասներն ու լուսանկարները վստահել է Tert.am Life–ին ու պատմել, որ նոր տեսահոլովակը նկարահանել է նոր «Դու Ուժեղ ես» երգի հիման վրա։ Երգի երաժշտության և խոսքերի հեղինակն ինքն է, գործիքավորումն արել է STUDIOina-ն։

«Երգը պատրաստ էր դեռ 2017-ին, արդեն հասցրել եմ կատարել այն իմ համերգների և տարբեր ելույթների ընթացքում։ Կարող եմ վստահ ասել, որ այն հասցրել է սիրվել իմ լսարանի կողմից։ Հուսամ` նույնքան կսիրվի նաև երգի տեսահոլովակը, որը նկարահանվել է նախորդ ամռանը,  իմ ամենասիրելի քաղաքում ՝ Փարիզում։ Տեսահոլովակներ նկարահանել էի Բարսելոնայում, Մադրիդում, Փարիզում էլ դեռ 2009-ին իրականացրել եմ իմ 2-րդ ձայնասկավառակի համար նախատեսված ֆոտոշարքը, բայց առաջին անգամ էի տեսահոլովակ նկարահանում իմ ամենասիրելի քաղաքում»,– ասաց երգչուհին։

Լսարանը սովոր է Աստղիկին տեսնել հետաքրքիր կերպարներով։ Այս անգամ ևս նա ինքնուրույն է զբաղվել կերպարների ընտրությամբ. «Քանի որ տեսահոլովակը նկարահանել ենք Փարիզում, փորձել եմ չչարաշահել կերպարներս և լինել մնայուն դասական ոճում։ Փարիզն իրենով նրբաճաշակություն է պահանջում»։

Տեսահոլովակի ռեժիսորը ֆրանսահայ Քրիստիան Աջեմյանն է, որի հետ Աստղիկը ծանոթացել է Փարիզում բնակվող վաղեմի ընկերներից մեկի միջոցով։ Ասում է` անմիջապես հասկացան, որ կարող են համագործակցել և ստեղծել հետաքրքիր մի աշխատանք։

«Լինելով ճանաչված և որակյալ ռեժիսոր` նրա ֆիլմերը շատ են ներկայացված եղել Կաննի կինոփառատոնին։ Մտածեցինք, որ տեսահոլովակի համար հատուկ սյուժե պետք չէ, պետք չեն նաև հերոսներ, քանի որ երգը հոգեպես ուժեղ լինելու մասին է։ Պետք էր ուղղակի ներկայացնել հոգեպես ուժեղ, ազատ, հպարտ հոգեվիճակ, որը շատ համահունչ էր աշխարհի մայրաքաղաքում տիրող տրամադրությանը։  Աշխատեցինք Քրիստիանի ֆրանսիական անձնակազմի հետ, ունեցանք լուրջ նկարահանումներ, արդյունքում` փարիզյան շատ գեղեցիկ, գունեղ, տրամադրող տեսահոլովակ»,– ասաց նա։

Նկարահանումներն իրականացրել են Փարիզի կենտրոնում և Փարիզից դուրս,  չնայած շատ կադրեր և տեսարաններ չեն օգտագործել։

«Աշխատել ենք  3 օպերատորական թիմով և օդային տեսախցիկներով։ Հետաքրքիր է, որ տեսահոլովակը նկարվել է անցած ամառ, սակայն մոնտաժային պրոցեսում անընդհատ խնդիրներ էին առաջ գալիս, ինչը չէր թողնում, որ գործն արագ առաջ գնա։ Հիմա եմ հասկանում, որ այդպես էր լինում, որովհետև դեռ ժամանակը չէր հասունացել։ Զգում եմ, որ տեսահոլովակը հիմա պատրաստվեց, որովհետև հիմա է խորհրդի փոխանցման ամենաճիշտ ժամանակը։ Երգի խորհուրդն ավելի համապատասխան է մեր ներկայիս հոգեվիճակին։ Երբ մեր կյանքում ինչ–որ բան փորձում ենք ու չի ստացվում, պայքարում ենք, բայց չենք հասնում մեր ուզած հաջողությանը, փնտրում ենք մեր սերը, բայց չենք գտնում,երբ հոգնում ես բոլոր մեծ ու փոքր պայքարներից, գալիս է հուսահատության մի պահ, ուզում ենք թողնել ամեն ինչ։ Այստեղ օգնության է գալիս հոգուց բխած գերբնական ներքին ուժ։ Երգը հենց այդ ուժի մասին է, որը խորհուրդ է տալիս երբեք չդնել վերջակետ։ Եթե անցնում ես ստեղծված իրավիճակի միջով, ուրեմն քո մեջ ունես` պայքարողի հզոր ուժ և պետք է վստահես ինքդ քեզ, հավատաս քո ես-ին, անկախ ամեն ինչից` քո ուժեղ լինելուն»,– եզրափակեց երգչուհին։