Իննա Խոջամիրյանի և Հասմիկ Խոջյանի հանգստի հետաքրքիր, վտանգավոր պահերն ու բացահայտումները

Դերասանուհիներ Իննա Խոջամիրյանն ու Հասմիկ Խոջյանն օրերս են վերադարձել Արաբական Միացյալ Էմիրություններից, որտեղ վայելել են իրենց ամառային հանգիստը, իսկ տպավորությունների մասին պատմել են Tert.am Life-ին։

«Հանգիստը չի կարող լավ չանցնել, բավարար է միայն այն, որ առանց զարթուցիչի ես քնում։),– ասաց Իննան, ապա նկատեց, որ նկատեց, որ որոշել էր պասիվ հանգստի մեկնել, քաղաքային աժիոտաժից կտրված, ծովափնյա ու հանդարտ։ Տարբերակներում Եգիպտոսն էր, Շրի Լանկան և Միացյալ Արաբական Էմիրությունները։ Կանգ առանք վերջին տարբերակի վրա, առանց երկար մտածելու գնեցինք տոմսերն ու թռանք։ Իհարկե, պասիվ հանգիստն, այնուամենայնիվ, խախտվեց, բայց միանշանակ մեր կամոք։ Չէինք կարողանում ուղղակի պառկել օվկիանոսի ափին ու լիցքաթափվել. ինչպես չբարձրանալ Բուրժ Խալիֆայի՝ աշխարհում ամենաբարձր շինություններից մեկի գագաթը, չայցելել մայրաքաղաք Աբու Դաբի, ջրային կենդանաբանական այգի -աքուարիում գնալ....Այնքան բան հասցրեցինք տեսնել»։

Հասմիկն էլ ընդգծեց, որ ամառային հանգստն իր համար ստացված է համարվում, երբ կա արև, ավազ ու ծով, բայց հանգիստը կարող է լինել նաև իդեալական՝ երբ այդ ամենին գումարվում են մշակութային նոր բացահայտումներն ու լավ ընկերները. «Որևէ երկիր մեկնելուց առաջ միշտ փորձում եմ ծրագրել ամբողջ  ընթացքը, որպեսզի հասցնեմ ամեն ինչ տեսնել, այս անգամն էլ բացառություն չէր: Այս տարվա գլխավոր բացահայտումս Էմիրատներից եղել է Շեյխ Զայեդի տաճարը` մայրաքաղաք Աբու Դաբիում: Այդ ճերմակ տաճարում անկախ կրոնական պատկանելությունից զգում էի հավատի հզոր ուժը յուրաքանչյուրի մեջ, ներաշխարհի խաղաղությունը ու մաքրությունը... Դրախտային շքեղություն ուներ, աննկարագրելիորեն տպավորված եմ»։

Աղջիկներն այստեղից մուսուլմանական հագուստով լուսանկարներ էին հրապարակել, ինչը լայն քննարկման առարկա դարձավ։ Իննան շեշտեց, որ այս անգամ իր բացահայտումները սպեցիֆիկ էին և համարձակ, սակայն հետաքրքիր ու չափազանց ճանաչողական. «Մեծագույն բացահայտումս կրոնական կոնտեքստի մեջ է։ Ինչքան բան կա կրոններից, դրանց պատմությունից, որոնցից շատերս անտեղյակ ենք, որոնց հանդեպ սխալ դիրքորոշումներ ու մոտեցումներ ունենք։ Վերջերս արաբական հագուստով Շեյխ Զայեդի մզկիթից լուսանկար տեղադրեցի սոցիալական էջերումս, որը բուռն բացասական արձագանքի արժանացավ, կապված մուսուլմանական հանդերձանքի և իսլամական «եկեղեցի» այցելելու հետ։ Ես մոլի քրիստոնյա եմ և հստակ կարող եմ ասել՝ բացահայտելն ու ճանաչելն ամենևին կապ չունեն դավանելու կամ հետևելու հետ։ Մի օր, երբ ոտքս Հնդկաստան ընկնի՝ իրենց աղոթատեղի էլ կայցելեմ, միգուցե, հնդկական հագուստով։ Բայց ես հայ եմ, քրիստոնյա, Աստվածահավատ և Աստվածավախ։  Խորհուրդ եմ տալիս ոչ ոքի չանհանգստանալ իմ փոխարեն. ես բոլոր քննադատներից վստահաբար ավելի շատ եմ Աստվածաշունչ եմ կարդում, պատարագների մասնակցում ու ապրում հայ առաքելական եկեղեցական կյանքով, պարզապես, բացահայտում եմ դրան զուգահեռ այն, ինչ կարող եմ ինձ թույլ տալ»։

Հասմիկն էլ պարզաբանեց, թե ինչու են նման զգեստներ հագել. «Սովորաբար, երբ նայում էի արաբ կանանց, նրանց նմանեցնում էի իրար` նույն սև հագուստն ունենալու պատճառով ու անցած տարիներին աբայայի խանութների կողքով անցնելիս միշտ մտածում էի, թե ինչու են նույն զգեստից այդքան օրինակներ դնում ցուցափեղկերի վրա, արի ու տես, որ պետք էր։)  Որոշ տաճարներ մուտք գործելու համար ավանդական հագուստը պարտադիր էր, այսպիսով, ստիպված եղանք գնալ աբայա գնել: Հավատացնում եմ, որ դրանք իսկապես տարբեր են ու մենք էլ զարմանալիորեն երկար ընտրեցինք, թե որը գնենք, ինչը, իսկապես, զվարճալի էր քրիստոնյա աղջիկների համար»։

Հասմիկը հայտնեց, որ Արաբական Էմիրություններում առաջին անգամ չէր ու վստահաբար գիտեր, որ այն հանգիստը, որն իրեն պետք է, կարող է գտնել այնտեղ: «Ավելի հաճախ, բնականաբար, փորձում եմ չկրկնել արդեն այցելած երկրների ցանկը ու նորերն ավելացնել դրանց, բայց այս անգամ նոր բացահայտումները այնքան շատ էին, որ իսկապես արժեր երրորդ անգամ լինել այնտեղ»,– նկատեց նա։

Աղջիկները վերջին տարում են ծանոթացել և մտերմացել, իսկ ճանապարհ առաջին անգամ էին գնում։«Ճանապարհորդությունը լավագույն միջոցն է մարդուն բացահայտելու` այն էլ, մինչև այդ փակ ու ինտիմ կողմերը։ Վերջին 8 օրերի ընթացքում ամենազավեշտն այն էր, որ կմնայինք-կմնայինք Հասմիկի հետ անկախ մեկս մյուսից նույն վայրկյանին նույն բանից կսկսեինք խոսել կամ նույն արտահայտություններն անել։ Թեկուզ նախորդ թեմայի հետ բացարձակ կապ չունեցող կամ անսպասելի որևէ արտահայտություն.... ասում են, երբ միաժամանակ նույն արտահայտությունն եք ասում, պիտի բռնես կողակցիդ մազից, հարցնես գալիք օրերից ո՞րն է հաջողակ օրդ, երբ մի երջանիկ իրողություն կլինի։ 8 օր քաշքշեցի Հասմիկի մազերը»,– ծիծաղելով պատմեց Իննան։

Հասմիկն էլ ընդգծեց, որ շատ կարևոր է իմանալ, թե ում հետ ես ճանապարհ գնում: «Ես այնքան էլ համամիտ չեմ, որ մարդուն կարելի է նորովի բացահայտել միայն ճանապարհ գնալով։ Մարդկային հատկանիշները կարելի է բացահայտել ամեն օր և կարևոր չէ` դա կլինի Հայաստանո՞ւմ, թե՞ դրա սահմաններից դուրս:  Պարզապես պետք է նախ ճանաչել մարդուն, հետո մտածել` արժե՞ արդյոք նրա հետ անցկացնել տարվա ընթացքում տրվող ամենաազատ մի քանի օրը։ Մեզ հետ էր նաև իմ մանկության ընկերուհին՝ Աննան, ում հետ առաջին անգամը չէր, որ ճանապարհորդում էի»,– ասաց դերասանուհին։

Իննան, որ հայտնի է իր ձախորդություններով, այս անգամ էլ զերծ չի մնացել միջադեպերից. «Ջրի հանդեպ ունեցած վախս փորձեցի դայվինգի միջոցով հաղթահարել՝ չստացվեց։ Մոտ 10 մետր խորության վրա, օվկիանոսի հատակին, թթվածինս անջատվեց ու մասնագետի ցուցումներից ոչ մեկ չօգնեց կարգավորել օդամղիչ համակարգը։ Մինչ կբարձրանայինք ջրի վրա՝ հասցրեցի պատկառելի քանակով ջուր կուլ տալ։ Չեմ ուզում պատմել հաջորդ մի քանի ժամերի ինքնազգացողությանս մասին, բայց օրվա վերջում մտածում էի՝ կարևորը ողջ եմ»։