«Հարյուրապատիկ ավելի շատ եմ սիրում կնոջս». Դավիթ Գրիգորյանը` զույգ երեխայի սպասելու մասին

Դերասան Դավիթ Գրիգորյանը, որը հեռուստադիտողներին հայտնի դարձավ «Աբելի քույրը», այնուհետև «Կյանքը շարունակվում է» հեռուստանախագծերով, պատրաստվում է հայր դառնալ։ Կինը` Մանուշակը, նրան  միանգամից 2 երեխա կպարգևի, երկուսն էլ աղջիկ։

Tert.am Life–ի հետ զրույցում Դավիթը պատմել է զգացմունքային խառնաշփոթի, դստրերի ծննդին նախապատրաստվելու և մեծ երջանկության մասին, որը հիմա ապրում է։

«Չէի պատկերացնում, որ կարող եմ հայրիկ դառնալ։ Քեզ թվում է` դեռ  շատ փոքր ես երեխա ունենալու համար, ինքդ դեռ երեխա ես։ Մի զանգ, մի ակնթարթ ու հասկանում ես, որ կյանքդ հաջորդ փուլ է մտնում։ Սկզբում իմացանք, որ բալիկի ենք սպասում, կրկնակի շոկ էր, երբ իմացանք, որ զույգ երեխայի ենք  սպասում»,– պատմեց Դավիթը, ում կինը հղիության լուրից շփոթված հեռախոսով է հայտնել նորությունը։

Մինչև երեխաների սեռը պարզելն ամուսիններն ունեին իրենց ենթադրությունները, որպես տղամարդ, Դավիթն ուզում էր տղա ունենալ ու պատրաստ էր նույնիսկ «գրազ գալ», որ երեխաներից առնվազն մեկը տղա է, սակայն պարզել են, որ երկուսն էլ աղջիկ են։

«Երբ իմացանք, որ զույգ են, ցանկություն առաջացավ ունենալ տղա և աղջիկ։ Ինչ խոսք, մենք ագահ ենք մեր ցանկություններում, ուզում ենք ամեն ինչ միանգամից լինի։ Ընտանիքիս բոլոր անդամները կանայք են, պարզվեց, փոքրիկներս` նույնպես, շարունակում եմ շրջապատված լինել աղջիկներով։ Առաջին հայացքից տանը միանգամից այդ քանակի աղջիկ ունենալը ծանր էր թվում, հետո հասկացա, որ ավելի լավ լինել չէր կարող, աղջիկներն ավելի շատ են սիրում պապային։ Հիմա անսահման երջանիկ եմ, որ աղջիկներ եմ ունենալու»,– ասաց դերասանը։

Փոքրիկների ծնունդը նախանշվում է սեպտեմբերի վերջին կամ հոկտեմբերի սկզբին։ Դավթի խոսքով` իր ուշադրությունը կնոջ հանդեպ չի փոխվել, քանի որ այդ դաշտում երբևէ խնդիր չեն ունեցել, սակայն հիմա կնոջը հարյուրապատիկ ավելի է սիրում։

«Ես մի ճշմարտություն եմ  հասկացել, եթե ժամանակին կարող էի ասել, որ 10 անգամ ավելի շատ եմ սիրում կնոջս, հիմա կարող եմ ասել, որ հարյուրապատիկ ավելի եմ սիրում։ Զգացմունքային դաշտդ է փոխվում. սկզբում դու իրեն ընկալում ես որպես կին, որը ողջ կյանքիդ ընթացքում կողքիդ է լինելու, ընկերդ է, հզորությունդ, երբ փաստվում է, որ ինքը նաև քո բալիկների մայրն է լինելու, զգացողությունները բացարձակ այլ ուղղությամբ են գնում։ Ամեն ինչ հազարապատկվում է։ Կարծում եմ` հղի կինն աշխարհի ամենագեղեցիկ, հմայիչ, խելացի կինն է։ Ավելի ֆանտաստիկ սրբություն գոյություն չունի։ Այդ 9 ամսվա ընթացքում ինքդ էլ ես ամբողջությամբ  մաքրվում, սպիտակում, երևակայությունդ բացվում է, սահմանները կոտրվում են։ Հասկանում ես, որ կյանք պարգևելու իրավունք և հնարավորություն ես ստացել, իսկ դա մեծագույն արժեք է։  Դու կարող ես շատ բարձունքների հասնել, բայց անհամեմատելի է, երբ կյանք ես տալիս մեկին, որը  հետագայում կերտելու է իր ճակատագիրը, մարդ, որը հետդ կռիվ է անելու, չի համաձայնելու, գալու է խորհրդիդ  հետևից։ Ընտանեկան մեծ համակարգ է, որի հետ նախկինում չես բախվել։ Մի  ակնթարթում հասկանում ես, որ կյանքդ հաջորդ փուլ է մտնում։ Ծնող դառնալը մեծ փիլիսոփայություն է, որի զարգացումների մեջ եմ հիմա»,– ասաց նա։

Դավիթը նկատեց, որ ծնող դառնալը մեծագույն պատասխանատվություն է, որին պետք է պատրաստ լինես. «Մինչև բալիկների մասին լուրն իմանալն ապրում ես ինքդ քեզ համար։ Դու ու կինդ երիտասարդ եք, մտածում եք շատ աշխատելու ու շատ ծախսելու, ճանապարհորդելու, բացահայտումներ անելու մասին։ Աշխատում եք զուտ կյանքը վայելելու համար։ Երբ ուսերիդ դրվում է ևս երկու մարդու պատասխանատվություն, սկսում ես այլ կերպ նայել բոլոր հարցերին։ Նույնիսկ ծախսերդ վերանայում, որպեսզի երեխաներիդ համար մի բան ավելին անես։ Սկսում ես սահմանափակել աշխատանքիդ տրամադրված ժամանակը, որպեսզի շտապես տուն ու ճտերիդ էլ ժամանակ տրամադրես։ Միանգամից հասունացման արագ շրջան է գալիս մոտդ»։

Փոքրիկների անունների ընտրության հարցն ամենաբարդն է ծնողների համար։ Իրենց մայրիկների անուններն ընտրելու ավանդական տարբերակին զույգը չի դիմի։ Դավիթը հայտնեց, որ թե՛ իր, թե՛ Մանուշակի մայրիկների անունը Կարինե է, սակայն երկուսն էլ դեմ կլինեն այդ ընտրությանը, քանի որ չեն սիրում այդ անունը, այնպես որ, հիմա լուրջ քննարկումների մեջ են։

Հայրիկը հաճախ է զրուցում 2 փոքրիկի հետ։ Ասում է` նրանցից մեկն ավելի չարաճճի է, դա երևում է իր շարժունությամբ։

«Մեկը մի քիչ ավելի  քիչ է շարժվում մյուսի համեմատ, բայց երբ երկուսով սկսում են շարժվել, դիսկոտեկ է  դառնում։ Կարծես ֆուտբոլի մի ամբողջ թիմ լուրջ խաղ անցկացնի, ֆանտաստիկ տեսարան է։ Երբ շատ են շարժվում ու նեղում մամային,  ջղայնանում եմ, միանգամից ուշքի են գալիս։) Արդեն ինքս ինձ էլ եմ դաստիրակում որպես հայրիկ»,– ոգևորությամբ նկատեց դերասանը։