«Հայաստանն ուրիշ երկիր է, սա մեզ համար ստեղծագործական մարտահրավեր է». Comedy Club-ը Երևան կգա ամբողջ կազմով

12:02 • 25.07.18

Շոուբիզնես

Tert.am Life–ն իր ընթերցողներին հայտնել է, որ սեպտեմբերի 15-ին և 16-ին Comedy Club փառատոնն առաջին անգամ կկայանա Երևանում` Կարեն Դեմիրճյանի անվան մարզահամերգային համալիրում։ Հայաստանյան հատուկ թողարկումները աշնանը կլինեն «THT»–ի եթերում։ Այսպիսով` Tert.am Life–ը ներկայացնում է նոր մանրամասներ միջոցառման մասին։ Կազմակերպիչները վստահ են` այդ օրերին Երևանը կվերածվի նաև հումորի մայրաքաղաքի:

Ստեղծագործական թիմը հայտնում է, որ ցանկացած Comedy Club փառատոն իրադարձություն է, որն, անպայման, դառնում է պատմություն։ Ռեզիդենտները (ինչպես փառատոնի հերոսներն են կոչում իրենք իրենց) արդեն անցկացրել են հումորի շաբաթ Յուրմալայում, մեքենաների շարժիչների որոտի ներքո ելույթ են ունեցել Սոչիում կայացած «Ֆորմուլա-1» մրցավազքի ժամանակ, այս անգամ նրանք կժամանեն Երևան, ընդ որում՝ քաղաքի 2800-ամյակի տոնախմբության օրերին։

Կազմակերպիչների փոխանցմամբ՝ ժամանելու են բոլորը՝ Պավել Վոլյան, Գարիկ Մարտիրոսյանը, Գարիկ Խառլամովը, Տիմուր Բատրուտդինովը, Դեմիս Կարիբիդիսը, Անդրեյ Սկորոխոդը, Միխայիլ Գալուստյանը, Ալեքսանդր Ռեվվան, Զուրաբ Մատուան, Անդրեյ Ավերինը, Դմիտրի «Люсёк» Սորոկինը, Մարինա Կրավեցը, «Սմիրնով, Իվանով, Սոբոլեվ» եռյակը, Դմիտրի Գրաչովը, նույնիսկ, USB խումբը, որի գործունեությունն արգելված է ՌԴ տարածքում, ինչը լավ նորություն է յուրահատուկ երաժշտության սիրահարների համար։

Միջոցառման գլխավոր իրադարձությունը Գարիկ Մարտիրոսյանի վերադարձն է։ Վերջին կես տարում նրա անվան շուրջ բազմաթիվ ասեկոսեներ էին պտտվում, սակայն սեպտեմբերին` հայրենիքում կայանալիք փառատոնի ժամանակ նա կրկին բեմ կբարձրանա և Պավել Վոլյայի հետ կշփվի հանդիսատեսի հետ։

Երևանյան այցի մասին Գարիկ Մարտիրոսյանն ասել է. «2018-ին Երևանը նշում է իր 2800-ամյակը։ Այն անհավանական քաղաք է՝ բաց ոգով և հարուստ պատմությամբ, և մենք ուրախ ենք, որ մեծ տոնի մասնիկ կդառնանք։ Comedy Club փառատոնը լայն աշխարհագրություն ունի, սակայն սա առաջին անգամն է, երբ մենք նոր թողարկումներ կնկարահանենք Երևանում՝ ռուսական «THT» ալիքի համար։ Ավանդույթի համաձայն, շատ աստղեր կլինեն, այնպես որ դուք էլ եկեք։ Մինչ հանդիպում Երևանում»։

Պավել Վոլյան իր հերթին նկատել է, որ Հայաստանն իրենց համար միշտ հարազատ է եղել և վաղուց էին ուզում այստեղ ելույթ ունենալ. «Չենք մոռանում, որ դա մի ուրիշ երկիր է, իր ուրույն մտածելակերպով։ Այդ իսկ պատճառով փառատոնը մեզ համար ստեղծագործական մարտահրավեր է։ Էլ ի՞նչ հետաքրքիր բան կլինի։ Կպատրաստենք հատուկ ծրագիր և ելույթ կունենանք առավելագույն կազմով, այսպես ասած, ոսկյա, արծաթե կազմով։ Անվանեք, ինչպես կուզեք»։

Կազմակերպիչները ներկայացնում են մի քանի հետաքրքիր փաստ Երևանում սպասվող փառատոնի մասին.

◘ Փառատոնի անցկացման վայրը երկար ժամանակ գաղտնի էր պահվում, որպեսզի բոլոր տոմսերը «եղբայրաբար» չբաժանվեն Գարիկ Մարտիրոսյանի ընկերների և բարեկամների միջև։

◘ USB խմբի Նիկիտան 35 հարցում է ուղարկել ղեկավարությանը, որպեսզի նրան թույլ տան ռեզիդենտների հետ նույն հյուրանոցում ապրել։

◘ Գարիկ Խառլամովը խոստացել է խորոված ուտելու համաշխարհային ռեկորդ սահմանել և արդեն կապ է հաստատել Գինեսի ռեկորդների գրքի գրասենյակի հետ։

◘ Ասում են, Քիմ Քարդաշյանը գաղտնի այցելելու է Երևան Տիմուր Բատրուտդինովի հետ ծանոթանալու նպատակով և խնդրելու է նրան իր բրենդի դեմքը դառնալ։ Մյուս կողմից ասում են, որ այդ լուրերը տարածում է ինքը Տիմուրը։ Առայժմ տեղեկությունները ճշտվում են։

◘ Շատ ուրախ է լինելու։