Անահիտ Սիմոնյանի նոր նախագծի շնորհանդեսը, հայտնի հյուրերը, շքեղ տորթն ու կարևոր պահին Հայկոյի բացակայության պատճառը

Երևանը, Հայաստանի գեղեցիկ անկյունները կամ հայրենի գյուղդ, փողոցդ քո տանը. երգչուհի, դիզայներ Անահիտ Սիմոնյանը նոր նախագիծ է իրականացրել` ստեղծելով Հայաստանի պատկերներով ֆոտոպոստերներ և ֆոտովարագույրներ տան դիզայնի համար։ Tert.am Life–ը ներկա է եղել երգչուհու նոր աշխատանքի շնորհանդեսին և ներկայացնում է ֆոտոշարքն ու մանրամասները։

Անահիտը Երևանում չի ծնվել և մեծացել, սակայն տարիներ առաջ Երևան տեղափոխվելուց հետո հասկացել է, որ այլևս չի հեռանա հարազատ քաղաքից։ «Ես այնքան եմ սիրում Երևանը, որ երբեք չեմ կարող ապրել որևէ այլ երկրում։ Այստեղ գալուց հետո հասկացա, որ չեմ կարող հետ վերադառնալ իմ ծննդավայր»,– ասաց երգչուհին, որը տարիների ընթացքում իր համար բացահայտել է Երևանն ու Հայաստանը։

Որպես դիզայներ գործունեության ընթացում Անահիտը հաճախ է օգտագործել հայկական տառեր, զարդանախշեր, այսօր արդեն նրա նոր նախագիծը նվիրված է սիրելի Երևանին։ Հին ու նոր Երևանը ներկայացնելուց զատ Անահիտը ներկայացրել է նաև Հայաստանի տարբեր անկյունները, եկեղեցիները։ Որպես նոր նախագծի խորագիր նա ընտրել է ամուսնու` Հայկոյի «Սիրո հավերժ քաղաք» երգի վերնագիրը։ Ասում է` Ավետ Բարսեղյանի գրած խոսքերը տպվել են իր մեջ և ոգեշնչել։

«Ավետի ստեղծած խոսքերը շատ խորն են։ Հայկոյի այս երգը շատ ճիշտ, երևանյան ստեղծագործություն է, որը լսելիս ավելի շատ ես սիրում Երևանը։ Որոշեցինք այս ամենը կապել իրար և ներկայացնել «Սիրո հավերժ քաղաք» խորագրով»,– ասաց երգչուհին ու նկատեց, որ նախագծի իրականացան փուլում ամուսինն իր ամենամեծ խորհրդատուներից մեկն է եղել։

Հայկոն ներկա չէր շնորհանդեսին, քանի որ այս օրերին ՈՒՀԱ «Նոր հայեր» թիմի անդամների հետ հանգստանում է Տանզանիայում։ Երեկոյի բացումն ազդարարելուց զատ, Անահիտին օգնելու պարտականությունները ստանձնել էր նրանց ընտանիքի ընկեր Ավետ Բարսեղյանը։  «Շատ եմ ցավում, որ այսօր Հայկոն կողքիս չէ։ Շատ հուզված էի, սակայն այսօր Ավետն այնքան ոգևորեց ինձ, որ Հայկոյի տեղը չեմ զգում։) Իրականում, շատ կցանկանայի, որ Հայկոն այսօր այստեղ լիներ, սակայն վաղը մեկնում եմ Միացյալ Նահանգներ, հնարավոր է, երկար ժամանակ այնտեղ լինեմ և շնորհանդեսը հետաձգել չէի կարող»,– ասաց երգչուհին, որը մեծ ոգևորությամբ էր նախապատրաստվել շնորհանդեսին։ Անահիտը ընտրած տորթն էլ խորհրդանշական էր` Օպերայի և բալետի ազգային ակադեմիական թատրոնի շենքի տեսքով։

Անահիտի համար ռիսկային է այսպիսի նախագիծ սկսելը, սակայն ասում է` հետաքրքրությամբ է աշխատում նոր գաղափարների վրա։ «Քանի որ միշտ զբաղվել եմ կամ երգեցողությամբ, կամ հագուստի դիզայնով, ինձ համար սա նոր ուղղություն է, որին հավատում եմ։ Գաղափարը ծնվեց, երբ ԱՄՆ-ում էի ու շատ ընտանիքներում տեսնում էի մեծ կարոտ։ Հասկացա, որ եթե իրենց տան մի հատվածում Հայաստանը, Երևանը, իրենց հարազատ տունը հիշեցնող ինչ-որ հատված լինի, իրենց լավ կզգային։ Հայաստան վերադառնալուն պես սկսեցի զբաղվել այս նախագծով։ Բնականաբար, չկա նոր աշխատանք, որը չունի իր ռիսկը, սակայն ռիսկը գործի կեսն է, և ես չեմ վախենում որևէ տեսակի նոր գաղափարներից, հակառակը, միշտ փորձում եմ ինձ նոր բնագավառներում»,– ասաց նա։

Երգչուհու խոսքով` իր մյուս աշխատանքները չեն տուժում, քանի որ կարողացել է լավ թիմ համախմբել իր շուրջը։

Անահիտը վաղը կմեկնի ԱՄՆ։ Երգչուհին խոստովանում է` հաճախակի շրջագայություններից ամենաշատը տուժում է իր և որդու սերը։ «Մենք ահավոր կարոտում ենք իրար։ Հատկապես հիմա , երբ Հայկոն էլ այստեղ չէ, ամբողջ օրն իրար համբուրելով ման ենք գալիս։ Որդիս իմ ընկերն է, մեզ ծնող–որդի չեմ ընկալում։ Հուսով եմ` մեր ընկերությունը չի տուժի բացակայություններիցս։ Տղաս դեռ փոքր է։ Հուսով եմ` ժամանակի հետ կհասկանա ինչու էր ինչ–որ շրջաններ ինձնից, Հայկոյից հեռու լինում»,– եզրափակեց երգչուհին, որն իր դիզայներական գործունեությունն ընդլայնելու նպատակ ունի։

Լուսանկարները՝ Էլեն Գասպարյանի