«Կինս անակնկալ ձևով ինձ հայտնեց հղիության լուրը». Տիգրան Կարապետյանը շուտով հայր կդառնա

13:14 • 02.08.18

Շոուբիզնես

«Հայաստանի ձայնը» 4-րդ նախագծից հայտնի դարձած երգիչ Տիգրան Կարապետյանը և կինը՝ Անի Աղաջանյանը, սպասում են իրենց առաջնեկին: Երգիչ Սարոյի քավորությամբ ապրիլին ամուսնացած զույգն արդեն պարզել է փոքրիկի սեռը։

Ուրախալի լուրը Տիգրանն առաջինը հայտնել է Tert.am Life-ին և խոսել կնոջ անակնկալի, իր զգացողությունների և բալիկի սեռի մասին:

Երգչի խոսքով` փոքրիկը կծնվի հունվարին: Սպասված լուրը կինը նրան հայտնել է յուրատեսակ անակնկալ մատուցելով: «Վաղ առավոտյան կինս ինձ երեխայի կոշիկներ նվիրեց: Սկզբում չհասկացա, քանի որ դեռ կիսաքնած էի, քիչ ուշ գլխի ընկա, որ բալիկի ենք սպասում: Բնականաբար, հուզվեցի, միաժամանակ շատ մեծ ուրախություն և երջանկություն ապրեցի»,-ասաց Տիգրանն ու նշեց, որ դժվար է բառերով նկարագրել այն զգացողությունները, որ ապրել է հայր դառնալու լուրն իմանալուց հետո:

Զույգը տղայի է սպասում, թեև Տիգրանի խոսքով, ինքը ներքին համոզմունք է ունեցել, որ առաջնեկն աղջիկ է լինելու. «Կինս էլ վստահ էր, որ տղա ենք ունենալու: Նույնիսկ գրազ էինք եկել այդ հարցի շուրջ, բայց ես պարտվեցի»:

Երեխայի սեռը առաջինը պարզել են ոչ թե ծնողները, այլ նրանց հարազատաները: Տիգրանը պատմեց, որ այդ մասին ևս իրենց հայտնել են անակնկալ ձևով: «Կնոջս մայրիկն է իմացել երեխայի սեռը: Մեր հարազատ մարդիկ, ընկերները փոքրիկ հավաքույթ էին կազմակերպել, որի ժամանակ էլ յուրահատուկ ձևով մեզ հայտնեցին այդ մասին: Մեծ փուչիկի միջից կապույտ փուչիկներ դուրս եկան և արդեն պարզ էր, որ տղա ենք ունենալու»,- ասաց նա:

Տիգրանը հայտնեց, որ փոքրիկի համար կնոջ հետ անվան մի քանի տարբերակ են քննարկել, բայց առայժմ վերջնական չեն կողմնորոշվել: Տիգրանի խոսքով, կնոջ նկատմամբ ուշադրության չափաբաժինն այս փուլում ավելացրել է. «Չնայած կնոջս հանդեպ ուշադրությունս միշտ մեծ է եղել, հղիության շրջանում, բնականաբար, փորձում եմ առավել ուշադիր լինել նրա նկատմամբ»: