«Աղջիկս կարծես ընկերուհիս լիներ». Իվետա Եդիգարյանը՝ դստեր հետ ամառային հանգստի և տպավորությունների մասին

Դերասանուհի Իվետա Եդիգարյանն օրերս է վերադարձել Եգիպտոսից, որտեղ դստեր՝ Անգելինայի հետ անցկացրել է ամառային հանգիստը: Շարմ էլ Շեյխում անցկացրած 14 օրերի և իր տպավորությունների մասին դերասանուհին պատմել է Tert.am Life-ին:

Իվետան նշեց, որ  երկար էր սպասում այս հանգստին, քանի որ նախորդ ամռանը չէր հասցրել հանգստանալ: «Նախորդ ամռանը սկսվեցին «Անուղղելիները» սերիալի նկարահանումները և չկարողացա հանգստի մեկնել: Այս ամռանն իսկապես լիարժեք հանգիստ ունեցա: Եթե նկարահանումները ուշ սկսվեին, հավատացեք, 10 օր էլ կավելացնեի ու կվայելեի ծովափնյա հանգիստս»,-ասաց նա:

Իվետան նշեց, որ  նախընտրում է ծովափնյա հանգիստ, Եգիպտոսում երկու անգամ եղել է համերգային ծրագրով, բայց Շարմ էլ Շեյխում առաջին անգամ էր:

«Իհարկե, կցանականայի Իտալիա կամ եվրոպական այլ երկիր մեկնել հանգստի, բայց այնտեղ լիարժեք չես կարող հանգստանալ, քանի որ շատ հետաքրքիր, պատմական վայրեր կան, որ պետք է այցելես: Քանի որ դստերս հետ էի մեկնելու, կարծում եմ նա կհոգներ, այդ պատճառով էլ ընտրությունս կանգ առավ ծովափնյա հանգստի վրա»,– ասաց երգչուհին:

Դերասանուհու խոսքով` դստեր հետ հագեցած և գունեղ օրեր են ունեցել և նույնիսկ չեն նկատել՝ ինչպես է ժամանակն անցնում: Իվետան ասաց, որ երեխայի հետ հանգստի մեկնելը որևէ անհարմարություն կամ անհանգստություն չի առաջացրել. «Անգելինան ինձ հետ գրեթե ամեն տեղ գալիս էր, երբեմն նախընտրում էր սենյակում մնալ և հանգստանալ: Նա ինքնուրույն նախաճաշի էր իջնում կամ գալիս ծով:  Կարծես ընկերուհուդ հետ գնաս հանգստանալու: Ես չզգացի, որ ինձ հետ երեխա կա»,-ասաց նա:

Իվետան պատմեց, որ բացի ծովն ու արևը վայելելը, օգտվել են ժամանցի հնարավոր բոլոր տարբերակներից: Ընդհանուր առմամբ, նա իրենց հանգիստը բավականին ակտիվ որակեց:

«Հասցրել եմ լինել Սաֆարիում: Անապատում բարձր արագությամբ մեքենա վարելը ադրենալին էր, նաև ջրային դայվինգն եմ փորձել: Մինչև ութ մետր խորությամբ սուզվել եմ ջրի հատակը: Տեսարանը իսկապես հրաշալի էր, գունեղ ու տպավորիչ: Լրիվ ուրիշ աշխարհ էր ջրի հատակում: Հյուրանոցում էլ կային ժամանցի բազմաթիվ տարբերակներ: Առավոտյան նախավարժանք էր լինում, հետո ջրային շեյփինգ, պարի դասընթացներ՝ արևելյան պորտապար, բաչատա: Երեկոյան էլ համերգային շոու-ծրագրեր էին լինում, որին նաև ես մասնակցեցի, երգեցի»,-ասաց Իվետան:

Նա նշեց, որ Եգիպտոսից սիրելի մարդկանց՝ ծնողներին քույրիկին և մտերիմ ընկերներին հուշանվերներ է բերել: Դերասանուհին ասաց, որ վերադառնալուն պես անցել է աշխատանքային ռիթմին և նկարահանումներին: