Հայաստանը «Մանկական Նոր ալիք 2018»-ում ներկայացրած Վարդան Մարգարյանը ուժերը կփորձի «Դեպի Մանկական Եվրատեսիլում»

18:04 • 04.08.18

Շոուբիզնես

Tert.am Life-ն իր ընթերցողներին արդեն պատմել է, որ նոյեմբերի 25-ին Մինսկում կայանալիք «Մանկական Եվրատեսիլ» մրցույթին Հայաստանը ներկայացնելու համար կմրցեն 23 մասնակից՝ «Դեպի մանկական Եվրատեսիլ» հեռուստանախագծի շրջանակում:

Նախագծի մասնակիցներից է 9-ամյա Վարդան Մարգարյանը: Նրա մասին Tert.am Life-ն իր ընթերցողներին ավելի վաղ պատմել է: Նա «Մանկական Նոր ալիք 2018»-ի հայաստանյան ներկայացուցիչն էր: Վարդանը որոշել է իրագործել իր հաջորդ երազանքն ու հայտնվել «Մանկական Եվրատեսիլի» բեմում: Այս անգամ Վարդանի հետ զրուցել ենք «Դեպի մանկական Եվրատեսիլ»-ին նախապատրաստվելու, երգի, բեմադրության և իր սպասելիքների մասին:

Վարդանը բնակվում է Հրազդան քաղաքում, բայց նշեց, որ այս շրջանում օրվա մեծ մասն անցկացնում է Երևանում: Երգի ձայնագրություն, փորձեր՝ նախապատրաստական ամբողջ գործընթացն այստեղ է անցնում: «Դեպի մանկական Եվրատեսիլ»-ին նա կներկայանա ճանապարհի մասին երգով: Երգի երաժշտության հեղինակը Մանե Հակոբյանն է, խոսքերը գրել է Ավետ Բարսեղյանը, իսկ գործիքավորումը կատարել է Վարդանի պրոդյուսեր, երգիչ Դավիթ Բադալյանը:

«Երգս պարային է, Funk ոճի մեջ է: Ես ոչ միայն երգելու եմ, այլև կպարեմ: Պարային բեմադրությունը կլինի կա՛մ աղջիկների, կա՛մ տղաների խմբով: «Մանկական Եվրատեսիլի» բեմում հայտնվելը իմ երազանքն է և այս նախագծից շատ մեծ սպասելիքներ ունեմ: Ամեն ինչ կախված է իմ ելույթից»,-ասաց Վարդանը:

Նա նշեց, որ բեմական կերպարը ևս արդեն որոշել են, սակայն փակագծերը առայժմ չբացեց՝ նշելով, որ հետաքրքիր բեմադրություն է սպասվում: «Մանկական Նոր ալիքին» մասնակցությունը Վարդանի բեմական առաջին լուրջ փորձն է եղել, թեև նա պարբերաբար մասնակցում է Հրազդանում անցկացվող մշակութային միջոցառումներին, ելույթ ունենում համերգների ժամանակ:

« «Մանկական Նոր ալիքում» ես շատ մեծ փորձ ձեռք բերեցի, որը կարծում եմ ինձ կօգնի եվրատեսիլյան բեմում լավագույնս ներկայանալ: Մրցակցությունը թեժ է լինելու, որովհետև բոլորը տաղանդավոր երեխաներ են: Մասնակիցներից յուրաքանչյուրն էլ արժանի է հաղթանակի: Իհարկե ինձ համարհաղթանակը ցանկալի կլինի, բայց մասնակցությունը ևս կարևոր փորձ է»,-ասաց նա:

Վարդանը նշեց, որ «Դեպի Մանկական Եվրատեսիլին» մասնակցելու իր որոշումը մեծապես ողջունել են նաև ընկերները. «Ընկերներս ինձ նման շատ ոգևորված են: Նրանք էլ են առաջարկել, որ ես մասնակցեմ այս մրցույթին և անհամբեր սպասում են իմ ելույթին»:

Ի դեպ, Վարդանը բացի երգարվեստում լուրջ քայլեր անելն ու հայտնի երգիչ դառնալը իր համար մասնագիտական մեկ այլ ուղղություն էլ է ընտրել.« Ցանկանում եմ հագուստի մոդելավորող դառնալ: Այդ մասնագիտությունը կհամատեղեմ երաժշտական կարիերայի հետ»,-եզրափակեց նա: