«Անձրևը խանգարեց ռոմանտիկ երեկոյին». Սուրեն Առուստամյանը՝ կնոջ տարեդարձի անակնկալի և ընտանեկան կյանքի մասին

Օգոստոսի 4-ին դերասան, հաղորդավար Սուրեն Առուստամյանի կնոջ՝ դերասանուհի Լիլիթ Տիտոյանի տարեդարձն էր, ինչի առթիվ Սուրենը  գեղեցիկ երեկո է կազմակերպել կնոջ համար:

Tert.am Life-ի հետ զրույցում նա պատմել է ինչպես խափանված անակնկալի, այնպես էլ ընտանեկան կյանքի ու նախանշված ամառային հանգստի մասին:

Դերասանը նշեց, որ կնոջ ծննդյան առթիվ ի սկզբանե մտածված անակնկալը անձրևոտ եղանակի պատճառով իրագործել չի հաջողվել: Նա ծրագրել էր բացօթյա, ռոմանտիկ ընթրիք կազմակերպել:

«Քանի որ եղանակային պայմանները խանգարեցին, Լիլիթի ծնունդը նշեցինք ռեստորանային համալիրներից մեկում: Ի սկզբանե  մտադրված էի ռոմանտիկ երեկո նվիրել նրան: Այնտեղ արդեն մեզ միացան մեր մտերիմ ընկերները՝ Անի Լուպեն ու Սենոն։ Շատ ավելի լավ ժամանակ անցկացրինք: Հաջորդ օրը շարունակեցինք նշել ծնունդը բարեկամական շրջապատով»,- պատմեց Սուրենը:

Նա նշեց, որ կնոջը ծաղիկներ և գեղեցիկ աքսեսուար է նվիրել, երեխաներն էլ իրենց հերթին յուրատեսակ նվեր են մատուցել մայրիկին՝ շնորհավորական բացիկի տեսքով: Սուրենի խոսքով, Լիլիթը շուտով կրկին կլինի էկրաններին և կշարունակի իր դերասանական գործունեությունը, սակայն առայժմ պարզ չէ, թե որ նախագծում հեռուստադիտողները կտեսնեն նրան: Նա նշեց, որ այս փուլում այդ ուղղությամբ աշխատանքներ են տարվում:

«Քանի որ մեր աղջիկն արդեն երեք տարեկան է և շուտով մանկապարտեզ կհաճախի, Լիլիթը կկարողանա վերադառանալ աշխատանքային գործունեությանը: Նրա դադարը պայմանավորված էր բացառապես երեխաներին դաստիարակելու հարցով: Կարծում եմ՝ փոքր հասակում երեխաների նկատմամբ առավել ուշադիր պետք է լինել»,- ասաց Սուրենը և հավելեց, որ ինքը երբևէ չի արգելել կնոջը զբաղվել սիրելի մասնագիտությամբ:

Դերասան–ամուսինների միջև բացի սերն ու ընտանեկան համերաշխությունը նաև մասնագիտական ամուր կապ կա: Սուրենը նշեց, որ թե՛ ինքը, թե՛ Լիլիթը խորհուրդներ են տալիս միմյանց, երբեմն, մասնագիտական դիտողություններ անում:

«Ինքդ քո խաղի մեջ շատ բան չես տեսնում, կողքի աչքը շատ ավելի հեշտ է նկատում բացթողումը: Քանի որ սովորել ենք նույն կուրսում, միասին ենք ամեն ինչ զրոյից սկսել ու իրար գիտենք մոտ 19 տարի, մեկս մյուսին տված խորհուրդները ավելի ճիշտ են: Եթե զգում եմ` ինչ-որ բան այն չէ, բնականաբար, առաջին մարդը, ում կարող եմ դիմել Լիլիթն է: Նույնն էլ իր դեպքում»,- ասաց Սուրենը: 

Դերասանի խոսքով, չնայած հագեցած աշխատանքային գրաֆիկին ու զբաղվածությանը, փորձում է որսալ ազատ ժամանակ և այն հատկացնել ընտանիքին: Նրա խոսքով, հատկապես երեխաները՝ 12-ամյա Հայկն ու 3-ամյա Արևը պահանջում են հայրիկի հետ երկար ժամանակ անցկացնել. «Աշխատում եմ այնպես անել, որ բացակայությունս շատ չերևա: Երբ տանն եմ լինում, ժամանակիս մեծ մասը երեխաներիս հետ շփմանն եմ նվիրում: Մեր ամենասիրելի զբաղմունքը առավոտյան կամ երեկոյան միասին զբոսնելն է»:

Սուրենի խոսքով, երեխաների խնամքի, դասերին հետևելու հարցով հիմնականում Լիլիթն է զբաղվում:Ավելի խիստ ծնողի դերակատարումը չեն բաժանել միմյանց միջև, երկուսն էլ փորձում են խստությունը պահել: «Երկկողմանի խստությունը, կարծում եմ, ճիշտ է, քանի որ ներկայիս սերունդը մեծանում է համացանցի թվայնացված ժամանակաշրջանում, հեշտությամբ կարող են շեղվել: Աղջիկս, իհարկե, դեռ փոքր է, բայց տղայիս անընդհատ խորհուրդ եմ տալիս ավելի շատ կարդալ, փորձում եմ նրան տանել դեպի գրքի հետ շփումը, որպեսզի ճիշտ ինֆորմացիա ստանա»,-ասաց նա:

Անդրադառանալով ամառային հանգստին՝ դերասանը նշեց, որ ընտանեկան հանգիստը կկազմակերպեն  ավելի ուշ՝ զբաղվածության և նկարահանումների պատճառով. «Ամենայն հավանականությամբ, սեպտեմբեր–հոկտեմբեր ամիսներին կմեկնենք հանգստի: Ուղղությունը դեռ հստակ չենք որոշել: Մի քանի տարբերակների շուրջ ենք մտածում՝ Հունաստան, Դուբայ կամ եվրոպական որևէ երկիր: Դա կախված է նրանից, թե որքան ժամանակով կկարողանամ բացակայել նկարահանումներից»:

Դերասանը նշեց, որ հանգստի համար նախատեսված ժամանակը որքան շատ լինի, այնքան լավ: Թեև նկատեց, որ սիրելի աշխատանքով զբաղվելն իրեն երբևէ չի հոգնեցնում։

«Եթե քո սիրած աշխատանքով ես զբաղվում, արդեն իսկ կարելի է ասել` հանգստանում ես: Ինձ համար աշխատանքն էլ է հանգիստ: Ուղղակի ժամանակ է գալիս, երբ թարմանալու կարիք ես ունենում»,- եզրափակեց նա: