«Երազանքս է հայտնվել «Եվրատեսիլի» բեմում». 12-ամյա Մելիսան՝«Դեպի մանկական Եվրատեսիլ» նախագծի մասնակից

Tert.am Life-ը իր ընթերցողներին ներկայացրել է, թե ովքեր են այս տարի մասնակցում «Դեպի մանկական Եվրատեսիլ» նախագծին, որի միջոցով էլ կընտրվի նոյեմբերի 25-ին Մինսկում կայանալիք «Մանկական Եվրատեսիլ» մրցույթի`  Հայաստանի ներկայացուցիչը: 23 մասնակիցների շարքում է 12-ամյա Մելիսան: Երգչուհին Tert.am Life-ի հետ զրույցում պատմել է «Դեպի մանկական Եվրատեսիլին» նախապատրաստվելու, իր երգի և մրցույթից ակնկալիքների մասին:

Մելիսա Գևորգյանը ծնվել և ապրում է Երևանում: Սովորում է Անանիա Շիրակացու անվան ճեմարանում: Այս տարի փոխադրվել է 7-րդ դասարան: Նա պատմեց, որ երգել սկսել է 6 տարեկանից: Արդեն վեց տարի է հաճախում է նաև Հայկանուշ Դանիելյանի անվան արվեստի դպրոց, որտեղ սովորում է դաշնամուրի բաժնում:

«Սկզբում ես հանդես էի գալիս քույրիկիս՝ Մարիայի հետ: Մեր առաջին տեսահոլովակն էլ միասին է եղել, հետո արդեն սկսեցի իմ անհատական երաժշտական ուղին: Ունեմ 5 տեսահոլովակ, որոնցից վերջինը «Ընկերություն» երգի հիման վրա է նկարահանվել»,-ասաց Մելիսան:

Չնայած վաղ տարիքից սկսած երաժշտական գործունեությանը, Մելիսայի համար «Դեպի մանկական Եվրատեսիլին» մասնակցությունը առաջին լուրջ փորձն է լինելու միջազգային մրցույթին ներկայանալու առումով. «Մինչ այս միայն մեկ միջազգային մրցույթի եմ մասնակցել, որն անցկացվել է Հայաստանում: Դա «Happy Planet» մրցույթն էր, որտեղ զբաղեցրել եմ երկրորդ հորիզոնականը: Այս տարի որոշեցի ուժերս փորձել «Դեպի մանկական Եվրատեսիլ» նախագծում, քանի որ տարիներ շարունակ իմ երազանքն է եղել «Մանկական Եվրատեսիլին» մասնակցելը: Ես մշտապես հետևել եմ այդ մրցույթին, Հայաստանի մասնակիցների ելույթներին և շատ կցանկանամ ինքս հայտնվել այդ բեմում, ապրել այդ զգացողությունները»:

«Դեպի մանկական Եվրատեսիլ» նախագծում Մելիսան կներկայանա գույների մասին երգով, որը POP ժանրում է: Երգի երաժշտության և բառերի հեղինակը Դավիթ Բադալյանն է: Այն ժամանակակից, պարային ռիթմերով երգ է: Մելիսան նշեց, որ հետաքրքիր պարային բեմադրություն է արված. «Պարի բեմադրիչը Արտյոմ Գևորգյանն է: Ինձ հետ բեմում կլինեն նաև մի քանի պարողներ: Մենք արդեն սկսել ենք ակտիվ փորձերը»:

Մելիսան ասաց, որ նախագծի ոչ բոլոր մասնակիցներին է ծանոթ, բայց նշեց, որ չնայած սպասվող թեժ մրցակցությանը, հաղթելու հույս ունի. «Կարծում եմ մասնակցությունը ավելի կարևոր է, քանի որ որպես երգչուհի մեծ փորձ ձեռք կբերեմ և աճ կգրանցեմ,-ասաց նա և ավելացրեց, որ ապագայում մտադիր է շարունակել երգչուհու կարիերան և այլ մասնագիտություն ընտրելու ուղղությամբ չի մտածում: