«Կերպարս հայկական մենթալիտետին բնորոշ չէ». Անատի Սաքանյանը՝ ստեղծագործական նորության և ամառային հանգստի մեկնելու մասին

Դերասանուհի Անատի Սաքանյանը դեռևս չի մեկնել ամառային հանգստի, թեև այս ընթացքում հասցրել է լինել մի քանի երկրներում՝ Հունաստանում, Վրաստանում և ՌԴ-ում: Tert. am Life-ի հետ զրույցում Անատին պատմել է իր ուղևորությունների նպատակի, ստեղծագործական նորություն ունենալու, ինչպես նաև նախանշված ամառային հանգստի մասին:  

Դերասանուհին նշեց, որ ամառն անցկացրել է աշխատանքային ռիթմի մեջ: Նա հայտնեց, որ նկարահանվում է «Ժամանակն է» նոր գեղարվեստական ֆիլմում, որի պրեմիերան նախատեսված է հոկտեմբերին: Դերասանուհին նշեց, որ ֆիլմը կցուցադրվի նաև Եվրոպայում, ԱՄՆ-ում և ՌԴ-ում: Թեև սա Անատիի՝ գեղարվեստական ֆիլմում նկարահանվելու առաջին դերասանական փորձը չէ, բայց նրա խոսքով, բավականին հետաքրքիր է և մյուս դերակատարումներից տարբերվող:

«Չեմ ցանկանա սյուժետային փակագծեր բացել, միայն կնշեմ, որ ֆիլմում ես հայուհու կերպար չեմ մարմնավորում և խոսում եմ ռուսերեն: Ինձ համար այդ կերպարն այնքանով էր հետաքրքիր, որ հայկական մենթալիտետին բնորոշ, ավանդական ոչինչ չկար: Այդ կերպարին մարմնավորելը ինձ համար հետաքրքիր էր նաև այն պատճառով, որ իմ հոր դերում հանդես է գալիս Ալեքսանդր Խաչատրյանը: Ինձ համար մեծ պատիվ էր նրա հետ խաղալն ու նույն միջավայրում աշխատելը»,-ասաց դերասանուհին:

Անատին նշեց, որ ֆիլմի նկարահանումները ծրագրված է իրականացնել 5 երկրում և հենց այդ նպատակով ստեղծագործական թիմի հետ միասին նա մեկնել է մի քանի երկրներ. «Արդեն հասցրել ենք նակարհանումներ ունենալ Հունաստանում, Մոսկվայում և Թիֆլիսում: Օգոստոսի 15-ին էլ պատրաստվում ենք մեկնել Ստամբուլ: Ստեղծագործական թիմն այնտեղ երկու օր կմնա, իսկ ես կմիանամ ընկերներիս, փոքր-ինչ կհանգստանամ հետո կվերադառնամ Հայաստան»,-ասաց Անատին և ավելացրեց, որ նկարահանումների ժամանակ թե՛ Հունասատանում, թե՛ Վրաստանում հասցրել է մի փոքր հանգստանալ:

Դերասանուհու խոսքով, ամառային հանգիստը կվայելի սեպտեմբերին, հավանաբար՝ Եգիպտոսում: Անատիի համար հանգստի թե՛ ակտիվ թե՛ պասիվ տարբերակներն էլ ցանկալի են: Դա կախված է տվյալ շրջանում նրա տրամադրվածությունից և հոգնածության աստիճանից:

«Եթե շատ լարված եմ լինում տարվա ընթացքում թե՛ աշխատանքային ռիթմի, թե ընդհանրապես առօրյա կյանքում, նախընտրում եմ միայնակ և պասիվ հանգիստը՝ ծովի ափին, իսկ եթե այդքան էլ լարված շրջան չեմ ունեցել, նախապատվությունը տալիս եմ ընկերներիս շրջապատում հանգստանալուն: Դա ավելի ուրախ, ակտիվ և էքստրեմալ հանգստի տարբերակ է»,-եզրափակեց դերասանուհին: