«Լուրջ վնասվածք չեմ ստացել». Էմմա Սապունջյանը՝ վթարի մեջ հայտնվելու, վարորդական փորձի և մեքենա նվեր ստանալու մասին

Կանայք շարունակում են կոտրել կարծրատիպը, թե  իրենք ղեկին զիջում են տղամարդկանց՝ ապացուցելով, որ առավել զգուշավոր և օրինակելի վարորդներ են: Tert.am Life-ի «Ղեկին կանայք են» շարքում այս անգամ զրուցել ենք դերասանուհի Էմմա Սապունջյանի հետ:

Երիտասարդ դերասանուհին նշեց, որ մեքենա վարել սկսել է 19 տարեկանից և արդեն երեք տարվա վարորդական կենսագրություն ունի: Էմմայի խոսքով, վարորդ դառնալու հավակնություն երբևէ չի ունեցել: Ամեն ինչ սկսվել է հայրիկի նվերից:

«Առաջին մեքենաս անսպասելի ձևով նվեր եմ ստացել հայրիկիցս: Մի օր տանը նստած էի, հայրիկս զանգահարեց ու ասաց պատուհանից դուրս նայեմ: Նայեցի՝ ասաց հավանո՞ւմ ես այս մեքենան, ասացի՝ այո, շատ սիրուն է: Ինքն էլ ասաց՝ քոնն է, գնա վարորդական դասընթացների, որ սկսես վարել: Մինչ այդ երբևէ մտքովս չի անցել մեքենա վարել: Նման ցանկություն չեմ հայտնել: Դա պարզապես հայրիկիս որոշումն էր: Նվերը ստանալուց հետո արդեն հաճախեցի վարորդական դասերի: Ինձ ասացին, որ բավականին ընդունակ եմ և 8 դասընթացից հետո վարժ տիրապետում էի վարորդական հմտություններին»,-պատմեց Էմման:

Նրա առաջին մեքենան եղել է կանաչ երանգի Mitsubishi iO մակնիշի: Երեք տարվա վարորդական փորձի ընթացքում Էմման երեք մեքենա է փոխել: Երկրորդ մեքենան կրկին նույն մակնիշի է եղել՝ սպիտակ երանգի, իսկ վերջինը՝ Mazda Verisa մակնիշի ավտոմեքենան է, որը դերասանուհուն երկու ամիս առաջ նվիրել է մայրիկը: «Մայրիկս գիտեր, որ շատ եմ սիրում այդ մեքենան և որոշեց ինձ անակնկալ մատուցել: Ինձ շատ դուր է գալիս այդ մեքենայի դիզայնը, թե՛ արտաքին տեսքն ու թե՛ ներսի սրահը»,-ասաց Էմման:

Դերասանուհին համոզված է՝ անկախ սեռից, մեքենա վարելու համար հարկավոր է գրագետ լինել, լավ տիրապետել երթևեկության բոլոր կանոններին: Հմուտ վարորդ լինելու համար, Էմմայի կարծիքով, կարևոր հատկանիշ է ուշադրությունը: Նա նշեց, որ երևանյան երթևեկության մեջ նյարդերը, երբեմն, տեղի են տալիս՝ հատկապես երթևեկության կանոններին չհետևող, կարգազանց վարորդների պատճառով, իսկ նրանք Էմմայի խոսքով, որպես կանոն հենց տղամարդ վարորդներն են:

 «Աշխատում եմ քիչ նյարդայնանալ, բայց դա անհնար է: Իհարկե, կարողանում եմ յուրաքանչյուր իրավիճակից դուրս գալու ճանապարհ գտնել: Այսքան ժամանակ դեռ չի եղել, որ աղջիկ վարորդն ինձ խանգարի, դիմացս կտրի կամ առանց մեքենայի թարթիչը միացնելու վերադասավորվի»,-ասաց Էմման:

Դերասանուհին նշեց, որ ընդամենը մեկ անգամ են պետավտոտեսուչներն իր մեքենան կանգնեցրել մոտ 2 ու կես տարի առաջ, երբ նոր էր սկսել մեքենա վարել. «Այդ ժամանակ տեխզննման կտրոնի հետ կապված խնդիր էր առաջացել: Ընդհանարպես, ես շատ օրինապաշտ վարորդ եմ, որևէ խախտում կամ տուգանք չունեմ,-ասաց Էմման, ապա ավելացրեց, որ վթարային իրավիճակում հաճախ չի հայտնվել, իսկ եթե լինում է, ապա ոչ իր մեղավորությամբ.  «Երկու օր առաջ եմ հայտնվել վթարի մեջ՝ նորից տղա վարորդի պատճառով: Նա անզգուշորեն հարվածեց մեքենայիս: Լուրջ վնասվածքներ չեմ ստացել: Ամեն ինչ ավարտվեց մեքենայիս թեթև քերծվածքով»:

Վթարային իրավիճակների կամ մեքենայի հետ կապված անսարքության ժամանակ Էմման առաջինը օգնության է կանչում հայրիկին: Ասում է՝ մեքենայի կառուցվածքից ու ավտոպահեստամասերից ինքնուրույն գլուխ չի հանում. «Միայն գիտեմ, թե որտեղի են մեքենայի յուղը կամ ջուրը լցնում, ինչն էլ յուրաքանչյուր վարորդ պարտադիր պետք է իմանա»,-ասաց նա:

Ամենաերկար ճանապարհը, որ Էմման գնացել է իր մեքենայով վարորդի կարգավիճակում եղել է Երևան-Արտաշատ ուղղությունը: Դերասանուհին ասաց, որ խուսափում է երկար ճանապարհ գնալ և նման դեպքերում ավելի նախնտրում է լինել ոչ թե վարորդի, այլ ուղևորի կարգավիճակում, իսկ իր մեքենայում ուղևորներ հաճախ չի ունենում:

«Մեքենայիս մեջ հիմնականում միայնակ եմ լինում, որովհետև ընտանիքիս բոլոր անդամները մեքենա ունեն, ընկերներիցս շատերն էլ վարորդներ են և շատ քիչ է լինում, որ իմ մեքենայում որպես ուղևոր լինեն:  Ես սիրում եմ մեքենայիս մեջ միայնակ լինել, քանի որ ոչ ոք չի խանգարում և կարողանում եմ երաժշտություն լսելով վարել,-ասաց Էմման և ավելացրեց, որ իր սիրելի երգերի playlist-ը միշտ մեքենայի մեջ է,- Ես շատ մելոման եմ: Ռաբիսից մինչև դասական երաժշտություն մեքեանյիս մեջ կարող է հնչել»:  

Էմմայի խոսքով, իր մեքենայի ուղևորը միանգամից կպատկերացնի, որ վարորդն աղջիկ է՝ այնտեղ առկա իրերից: « Մեքենայիս մեջ մշտապես ունեմ մաստակ, անձեռոցիկների տեսականի, օծանելիք»,-եզրափակեց Էմման: