Զարուհի Բաբայանի սաները՝ «Դեպի Մանկական Եվրատեսիլ» նախագծի մասնակից

Նոյեմբերի 25-ին Մինսկում կայանալիք «Մանկական Եվրատեսիլ» մրցույթի՝ Հայաստանի մասնակիցը կընտրվի «Դեպի մանկական Եվրատեսիլ» նախագծի միջոցով: Նախագծի մասնակիցների թիվը 23-ն է: Նրանց Tert.am Life- ն իր ընթերցողներին արդեն ներկայացրել է:

Նախագծին մասնակիցների թվում է «Սեկունդա» դուետը, որում ներգրավված են Զարուհի Բաբայանի սաները՝ Ալինա Սահակյանն ու Նաիրի Հովհաննիսյանը:  Դուետը ձևավորվել է երեք տարի առաջ:  Tert.am Life-ը զրուցել է «Սեկունդայի» անդամների և նրանց ուսուցչուհու հետ՝ մրցույթին մասնակցելու որոշման, նախապատրաստական աշխատանքների և ակնկալիքների մասին:

Դուետի կրտսեր անդամը Ալինան` 12 տարեկան է: Սովորում է Նիկոլ Աղբալյանի անվան հիմնական դպրոցում. «Պրոֆեսիոնալ վոկալով զբաղվում եմ արդեն չորս տարի: Ես և Նաիրին ծանոթացել ենք Զարուհի Բաբայանի՝ երգի ստուդիայում: Հենց այնտեղ էլ ընկերացանք և որոշեցինք դուետ ձևավորել,-ասաց Ալինան և ավելացրեց, որ  դուետային ձևաչափով աշխատելը դժվար չէ, թեև ինքն ու Նաիրին տարբեր երաժշտական նախընտրություններ ունեն,- Նաիրին ավելի շատ լիրիկական երգեր է սիրում, իսկ ես՝ ջազ, էստրադային, բայց դա մեզ չխանգարեց միավորվել: Երբեմն վիճում ենք հենց երաժշտական ուղղության հետ կապված, բայց վերջում միևնույն է  հաղթում է ընկերությունը»:

Ալինան նշեց, որ իրենք մասնակցել են տարբեր համերգների և ունեն համատեղ ևս մեկ երգ ընկերության մասին: Ալինայի խոսքով, դուետային ձևաչափում սա իրենց առաջին լուրջ փորձն է լինելու միջազգային մրցույթին մասնակցության առումով, թեև երկուսն էլ հասցրել են մասնակցել տարբեր միջազգային փառատոնների և հաջողություններ գրանցել:

 « «Դեպի մանկական Եվրատեսիլին» մասնակցում եմ մայրիկիս խորհրդով: «Մանկական Եվրատեսիլն»  ինձ համար շատ հետաքրքիր մրցույթ է: Իհարկե, շատ կցանկանանք, որ հաղթենք, բայց մասնակցությունն էլ պակաս կարևոր չէ,-ասաց Ալինան և ավելացրեց, որ այս փուլում ակտիվ նախապատարստվում են նախագծին լավ ելույթ ունենալու համար,-Այդ հարցում մեզ շատ է օգնում Զարուհի Բաբայանը: Նա կարծես մեր երկրորդ մայրը լինի, ոչ միայն երաժշտության ուսուցչուհի է, այլև ընկեր: Ես և Նաիրին ոչ միայն վոկալի վրա ենք աշխատում, այլև պարային բեմադրության փորձերի ենք մասնակցում: Բեմադրության հեղինակը Տաթև Միքայելյանն է»:

Սեկունդայի մյուս անդամը՝ Նաիրի Հովհաննիսյանը 13 տարեկան է: Ապրում է Արարատի մարզի Դիմիտրով  գյուղում և հաճախում է տեղի միջնակարգ դպրոցը: Նա նաև սովորում է Մխչյանի երաժշտական դպրոցում դաշնամուրի և ջութակի բաժիններում: Նաիրին նշեց, որ այս օրերին հիմնականում Երևանում է լինում՝ մրցույթին նախապատրաստվելու համար: «Երաժշտությամբ զբաղվում եմ դեռ փոքր հասակից: Ապագայում էլ ցանկանում եմ երգչի կարիերա սկսել, իսկ «Դեպի մանկական Եվրատեսիլ» նախագծին որոշեցի մասնակցել, որպեսզի փորձեմ ստանալ հնարավորություն իմ երկիրը ներկայացնելու միջազգային մրցույթին: Ես և Ալինան ակտիվորեն պատրաստվում ենք նախագծին լավ ներկայանալու համար: Նրա հետ աշխատելը շատ հեշտ է: Մեր շանսերը բարձր եմ գնահատում»,-ասաց Նաիրին:

«Սեկունդան» «Դեպի մանկական Եվրատեսիլ» նախագծին կներկայացնի Երևանի մասին երգ, որի երաժշտության հեղինակը Կարեն Անանյանն է, իսկ խոսքերը գրել է Արմինե Գրիգորյանը: Երգը էստրադային ժանրում է: Բեմում լավագույնս ներկայանալու հարցում սաներին իր մասնագիտական խորհուրդներով և գործնական միջամտությամբ օգնում է Զարուհի Բաբայանը: Երգչուհին նշեց, որ թեև սաները բազմաթիվ միջազգային փառատոնների են մասնակցել, նաև իր հետ հանդես եկել բարեգործական և այլ համերգների ժամանակ,  բայց այս անգամ պատասխանատվությունը մեծ է:

«Իրենք կենդանի հնչողությամբ են երգելու, միաժամանակ պարելու են, իսկ դա ենթադրում է լավ ֆիզիկական պատրաստվածություն թե՛ երգեցողության առումով, թե՛ բեմական պահվածքի: Հիմա աշխատում ենք հենց այդ ուղղություններով:  Ես, ընդհանրապես, մի համոզմունք ունեմ, որ երբ դու բեմում ինչ-որ բան անում ես սիրով և դա քեզ դուր է գալիս, չի կարող հաջողություն չլինել»,-ասաց երգչուհին և ավելացրեց, որ մրցույթին մասնակցությունը առաջնահերթ դիտարկում է որպես ևս մեկ փորձ աշակերտների համար,- Երբ մենք որոշեցինք մրցույթին մասնակցել, մեզ համար առաջնային նպատակը անպայման հաղթելն ու «Մանկական Եվրատեսիլում» Հայաստանի ներկայացուցիչը դառնալը չի եղել, այլ այն հանգամանքը, որ այս ընթացքում երեխաները աշխատելու են պրոֆեսիոնալ անձնակազմի հետ, շփվելու են երեխաների հետ, որոնք արդեն միգուցե եղել են մեծ բեմերում: Այսինքն սա իրենց համար նաև մեծ փորձ է: Ես երեխաներին ասել եմ, անկախ նրանից կընտրվեք թե ոչ, դուք պետք է  այնպես ներկայանք, կարծես դա ձեր վերջին հնարավորությունն է»,-եզրափակեց երգչուհին: