«Տարբերվող կերպարներով եմ ներկայացել». Մաշա Մնջոյանը՝ ակումբային ռիթմերով նոր տեսահոլովակի մասին

Երգչուհի Մաշա Մնջոյանը մոտ օրերս կներկայացնի իր նոր երգն ու տեսահոլովակը: Երիտասարդական, ժամանակակից, ակումբային ռիթմերով և ամառային տրամադրությամբ երգի հիման վրա նկարահանված տեսահոլովակում երգչուհին ներկայացել է բոլորովին նոր, տարբերվող կերպարներով:

Մաշան Tert.am Life-ին տրամադրել է լուսանկարներ տեսահոլովակի նկարահանման հրապարակից և մանրամասներ պատմել նոր աշխատանքից:  

Տեսահոլովակը նկարահանվել է Fire երգի հիման վրա, որի երաժշտության, խոսքերի և գործիքավորման հեղինակը Նիկ Էգիբյանն է: Երգը հայերեն և անգլերեն է: Անգլերեն բառերի հատվածը գրել է Մաշայի մտերիմ ընկերը: Տեսահոլովակը նկարահանել է Ռոբերտ Քոլոյանը, սակայն մոնտաժային աշխատանքները չի հասցրել ավարտին հասցնել՝ բանակ զորակոչվելու պատճառով:

«Մի փոքր հատված կար, որ չհասցրինք նկարահանել Ռոբերտի հետ: Այդ հատվածը նկարահանեց «Արցախի ձայներից» շատ տաղանդավոր տղա՝Ժոկան:  Մոնտաժային աշխատանքն էլ ինքն է անում: Ես էլ անհամբեր սպասում եմ պրեմիերային,-ասաց երգչուհին և ավելացրեց, որ տեսահոլավակը նկարահանել են մեկ օրում և տաղավարում,- Տեսահոլովակը սյուժետային գիծ չունի, քանի որ աշխույժ ռիթմերով երգ է, որոշեցինք այն մատուցել առանց որևէ սյուժեի և պատմության: Ցանկացանք  Fashion ոճի աշխատանք ներկայացնել»:

Մաշան նշեց, որ նոր տեսահոլովակում հանդես է եկել բոլորովին նոր, տարբերվող  ոճերում: Երգչուհին ոճային այդպիսի փոփոխությամբ դեռ չի ներկայացել իր հանդիսատեսին: «Իմ նախորդ աշխատանքներից տարբերվող կերպարներով եմ հանդես եկել, ինչը որոշ առումով նորություն կլինի դիտողների համար: Իհարկե կլինեն մարդիկ, որ կասեն սա ի՞նչ է, բայց այդ ամենին նորմալ եմ նայում, քանի որ միշտ էլ գտնվում են նման մարդիկ, որ ինչ աշխատանք էլ ներկայացնես, մի բան ասում են:  Ինձ թվում է՝ գեղեցիկ և չկրկնվող աշխատանք ենք ստացել»,-ասաց նա:

Մաշան ասաց, որ այս անգամ նույնպես համագործակցել է դիզայներ Վահան Խաչատրյանի հետ և տեսահոլովակում կրում է նրա հեղինակած զգեստները. «Կրկին համագործակցել եմ իմ հին ու հավատարիմ ընկերների հետ: Կրում եմ Վահան Խաչատրյանի հեղինակած զգեստները այն հավաքածուից, որը Հայաստանում առայժմ չի ցուցադրվել, դիմահարդարումս էլ ապահովել է Սյուզի Աղաբեկյանը: Առաջին անգամ էր, որ այդքան կերպար փոխում եմ ընդամենը 3 ու կես րոպեի ընթացքում»,-ասաց նա:

Երգչուհին հույս հանտնեց , որ նոր աշխատանքը կդառնա սիրված, ամառային հիթ հատկապես երիտասարդների համար: