«Славянский базар»–ի հաղթող Աննա Մկրտչյանը՝ «Դեպի մանկական Եվրատեսիլին» կներկայանա Նադեժդա Սարգսյանի հեղինակած երգով

16:55 • 21.08.18

Շոուբիզնես

Tert.am Life-ը շարունակում է իր ընթերցողներին ներկայացնել, թե ովքեր են մասնակցում «Դեպի մանկական Եվրատեսիլ» նախագծին, որի հաղթողը Հայաստանը կներկայացնի «Մանկական Եվրատեսիլ 2018»–ին: 23 մասնակցի շարքում է 11-ամյա Աննա Մկրտչյանն Ուկրաինայից: Աննան Tert.am Life-ի հետ զրույցում պատմել է մրցույթին նախապատրաստվելու, իր երգի, մինչև այս ունեցած հաջողությունների և սիրելի ուսուցչուհու՝ Նադեժդա Սարգսյանի խորհուրդների մասին:

Աննան ծնվել և ապրում է Ուկրաինայի Խարկով քաղաքում, սովորում է համար 13 գիմնազիայում՝ 6-րդ դասարանում: Երգով զբաղվում է 6 տարեկանից: Նա երգեցողության դասերի հաճախում է ինչպես Ուկրաինայում, այնպես էլ Հայաստանում:

«Երգն ինձ համար կյանք է: Առանց երգի ինձ չեմ պատկերացնում»,- ասաց փոքրիկ երգչուհին և պատմեց, որ արդեն բազմաթիվ միջազգային մրցույթների է մասնակցել: 2015 թվականին Աննան մասնակցել է Kharkiv International Song Forum մրցույթին և զբաղեցրել առաջին հորիզոնականը, 2016-ին նա մասնակցել է Ուկրաինայի Голос Дети 3 նախագծին, որտեղ ընդգրկված է եղել Թինա Կարոլի խմբում: Աննան հասել է մինչև երկրորդ փուլ: Փոքրիկ երգչուհին հաղթանակ է գրանցել հուլիսին Վիտեբսկում կայացած «Славянский базар» մրցույթում:

«Իմ եղբայրը՝ Էրիկ Մկրտչյանը, 2017-ին «Славянский базар» մրցույթին ներկայացրեց Հայաստանն ու հաղթեց: Ես շատ ոգևորվեցի նրա հաղթանակից և որոշեցի ինքս էլ մասնակցել: Եկանք Հայաստան, անցա նախընտրական փուլն ու ինձ էլ հաջողվեց մրցույթի հաղթող դառնալ,- ասաց Աննան և ավելացրեց, որ «Մանկական Եվրատեսիլին» որոշել է մասնակցել իր երազանքն իրականացնելու համար,- Դա մեծ բեմ է, բոլոր երեխաները երազում են այդպիսի մեծ բեմերում ելույթ ունենալ: Ես շատ եմ ուզում իմ երկիրը ու երգը ներկայացնել ողջ աշխարհին: Իմ երազանքն է գնալ «Եվրատեսիլ» և հաղթանակը բերել Հայաստան»:

Երգչուհու պրոդյուսերը Վրեժ Կիրակոսյանն է: Աննան «Դեպի մանկական Եվրատեսիլ» նախագծին կմասնակցի Music box պարային, ռիթմիկ երգով: Երգի երաժշտության հեղինակը լուսահոգի Նադեժդա Սարգսյանն է, խոսքերը գրել է Ավետ Բարսեղյանը, գործիքավորումն արել է Նիկ Էգիբյանը:

«Արդեն երկու ամիս է՝ աշխատում եմ երգիս և պարային բեմադրության վրա: Հաճախում եմ Մշակույթի պետական քոլեջ երգեցողության դասերի, իսկ պար սովորում եմ Վիկա Մարտիրոսյանի մոտ: Բեմական շոուի ռեժիսորը Արթուր Մանուկյանն է, հագուստիս ոճաբանը` Արմեն Գալյանը: Ես ունեմ շատ հզոր թիմ, որը աշխատում է ինձ հետ, ոգեշնչում է ինձ ու խորհուրդներ տալիս: Ամենակարևորը ասում են՝ չհուզվեմ, հավատամ իմ ուժերին և ներկայացնեմ այն ամենը, ինչ սովորել եմ»,- ասաց Աննան:

Աննայի մայրիկը ՝ Աստղիկ Շարբաթյանն էլնշեց, որ թեև իրենք ապրում են Ուկրաինայում, Հայաստան հաճախ են գալիս և իր երկու երեխան ներկայացնում են Հայաստանը տարբեր մրցույթներում: Նրա խոսքով, Աննայի երաժշտական կրթության և բեմական պահվածքի գործում մեծ դերակատարում է ունեցել Նադեժդա Սարգսյանը: «Славянский базар» մրցույթից առաջ դստեր հետ տևական ժամանակ նա է պարապել:

«Ցավոք, մրցույթից մի քանի օր առաջ, երբ արդեն պետք է մեկնեինք, նա մահացավ և չհասցրեց տեսնել Աննայի ելույթը,- ասաց Աննայի մայրիկն ու ավելացրեց, որ Նադեժդա Սարգսյանը հատուկ Աննայի համար է գրել այն երգը, որով նա պետք է մասնակցի «Դեպի մանկական Եվրատեսիլին»,- Նադեժդա Սարգսյանի երազանքն էր երեխային տեսնել այդ երգով բեմում: Նույնիսկ իր հիվանդ վիճակում, պարի շարժումներն էր ցույց տալիս, ուղղորդում, թե ինչպես ներկայանա: Վերջին շրջանում նա այդ երգով ապրում էր և հիմա նրա դուստրը՝ Էմմին է հետևում այդ ամենին, որպեսզի մայրիկի վերջին գործը լավագույնս ներկայացվի, անթերի ու բարձր մակարդակի լինի»: