«Ոսկե դպրոցից» Գոշը՝ գեղարվեստական նոր ֆիլմում խաղալու և էքստրեմալ նկարահանումների մասին

«Ոսկե դպրոց» սիթքոմից հեռուստադիտողներին հայտնի դարձած Գոշը շուտով կներկայանա գեղարվեստական ֆիլմում, որտեղ մարմնավորում է գլխավոր հերոսին: Ստեղծագործական նորության առաջին մանրամասները դերասանը վստահել է Tert.am Life-ին և պատմել իր մարմնավորած կերպարի, էքստրեմալ պայմաններում անցած նկարահանումների ընթացքի մասին:

«Անմոռանալի օր» խորագրով կատակերգությունը նախատեսված է ընտանեկան դիտման համար: Ֆիլմի ռեժիսորն ու պրոդյուսերը Հենրի Քոչարյանն է, սցենարի հեղինակները նա և Արմեն Վարդանյանն են:  Ֆիլմի սյուժեն կառուցված է չորս ընկերների պատմության շուրջ:

«Ֆիլմի ընթացքում նրանցից մեկը սիրահարվում է, բոլորը սկսում են պայքարել, որպեսզի իրենց ընկերը կարողանա գերել այդ աղջկա սիրտը»,-ասաց Գոշը:

Սա Գոշի առաջին փորձն է նկարահանվել  գեղարվեստական ֆիլմում. «Ֆիլմում նկարահանվելու առաջարկը հեռախոսազանգով ստացա, հետո, ըստ կարգի, անցա քասթինգը: Գլխավոր դերի համար 15-ից ավելի դերասան էր եկել, ընտրությունը կանգ առավ ինձ վրա»: 

Ֆիլմում Գոշը մարմնավորում է 26-ամյա Արմանին, որը, նրա խոսքով, տարբերվում է իր խաղացած նախորդ կերպարներից. «Իմ կերպարը մյուսներից այնքանով է տարբերվում, որ ավելի լուրջ ու հավասարակշռված մարդ է, բայց անընդհատ զավեշտալի պատմությունների մեջ է հայտնվում։ Ընկերների օգնությամբ փորձում է դուրս գալ այդ ամենից»:

Ըստ Գոշի` իր նախորդ հերոսից՝ Դավթից հետո 26 տարեկան, լուրջ հատկանիշներով տղայի մարմնավորելը հեշտ չէր. «Սիթքոմը, բազմասերիանոց ֆիլմն ու գեղարվեստական ֆիլմը իրարից շատ են տարբերվում: Գեղարվեստական ֆիլմն ավելի մանրակրկիտ մոտեցում է պահանջում»:

Գոշը նշեց, որ ֆիլմում ներգրավված են դերասաններ նաև մարզային թատրոններից:  Ֆիլմի նկարահանումներն իրականացվում են Երևանից 230 կմ հեռավորության վրա՝ Ալավերդու գյուղական բնակավայրերից մեկում: Դերասանն ասաց, որ նկարահանումներ արվել են տեխնիկապես բարդ ու էքստրեմալ պայմաններում:

«Բարդ էր այնքանով, որ գյուղում բացակայում էին կենցաղային այն պայմանները, որոնց մենք սովոր ենք քաղաքում: Բացի այդ, եղանակային պայմաններն էին կտրուկ փոխվում: Կարող էր անձրև գալ, նույնիսկ ձյուն տեղալ: Պատկերացրեք, օգոստոս ամսին ձյուն է գալիս: Ես պատրաստ չէի այսպիսի էքստրեմալ նկարահանումներին: Անընդհատ ասում էի՝ վե՛րջ, հանձնվում եմ, էլ չեմ կարողանում, բայց, փաստորեն, դիմացա և ստացվեց:)»,-ասաց Գոշը:

Նա նշեց, որ այս օրերին ստեղծագործական թիմը դեռ Ալավերդիում է, մի քանի օրից կվերադառնան: Ֆիլմի պրեմիերան նախատեսվում է հոկտեմբերին: Այն կցուցադրվի ինչպես երևանյան, այնպես էլ մարզային կինոթատրոններում: