Սարգիս և Մանո Գրիգորյանների դուստրը կներկայանա որպես երգչուհի. Յանան և Լիդուշիկը զուգերգ են ձայնագրել

Սարգիս և Մանո Գրիգորյանների դուստրը՝ Յանան, հասցրել է իրեն փորձել դերասանական ոլորտում և որոշակի հայտնիություն ու լսարան ձեռք բերել: Յանայի առաջին քայլը որպես դերասանուհի «Դեպի վայրէջք» 25 մասանոց հեռուստանովելում էր, որտեղ փոքրիկը խաղում էր հոր՝ Սարգսի հետ: Շուտով Յանան լսարանին կներկայանա նաև որպես երգչուհի: Երգարվեստում նրա առաջին քայլը կլինի զուգերգով: Մանո Գրիգորյանն առաջինը Tert.am Life-ին է պատմել դստեր նոր համագործակցության մասին: 

Յանան զուգերգով հանդես կգա երգչուհի Լիդուշիկի հետ`«Բարի օր» կոչվող երգով: Երաժշտության հեղինակը Մանե Հակոբյանն է, խոսքերը գրել է Ավետ Բարսեղյանը, գործիքավորումն արել է «Կարեն/Սևակ» փրոդաքշնը: Մանոն նշեց, որ համագործակցությունն ի սկզբանե մտածված չի եղել, գաղափարը ծնվել է հերթական խոսակցության ժամանակ։

«Շատ վաղուց Լիդուշիկին պար եմ դասավանդել: Վերջերս էլ գործնական հանդիպում ունեցանք, խոսեցինք անցյալից, ներկայից և խոսակցության ընթացքում միտք առաջացավ, որ կարելի է հետաքրքիր զուգերգ անել իմ աղջկա հետ»,– ասաց նա"

Մանոյի խոսքով, զուգերգում շեշտադրված է, որ շատերի համար մինչ օրս փոքրիկ երգչուհի համարվող Լիդուշիկն անցնում է ավելի հասուն փուլ՝ Յանային փոխանցելով մանուկների աշխարհը. «Ամբողջ երգի իմաստն այն է, որ Լիդուշն իր փոքրերի աշխարհը, ինչպես կոչվում էր նրա ամենահայտնի երգերից մեկը, փոխանցում է Յանային: Երգի մեջ էլ հենց այդպիսի բառեր կան՝ Տուր ինձ քո ձեռքը, տուր, որ երգենք մեր երգը»:

Մանոն նշեց, որ զուգերգը տեսահոլովակով կներկայացնեն, նախապատրաստական աշխատանքներն արդեն սկսել են: Պրեմիերան, հավանաբար, դստեր ծննդյան օրը՝ հոկտեմբերի 7-ին կլինի: Տեսահոլովակի սյուժեն Մանոն է մտածել, սակայն պարային բեմադրությամբ, ի զարմանս շատերի, ինքը չի զբաղվել:

«Պարերի բեմադրությամբ ես չեմ զբաղվում, որովհետև ինձ համար այս դեպքում շատ դժվար էր: Երբ հարցն առնչվում է քո երեխային, ուզում ես ամեն բան շատ լավ լինի, ես այդ մտքից ավելի շատ եմ լարվում: Ինչ անում էի, ինձ դուր չէր գալիս, միգուցե շատ լավ էր ստացվում, բայց մայրական բնազդը մի փոքր ինձ խանգարում էր: Պատասխանատվությունն այս պարագայում կրկնակի է: Այդ պատճառով մտածեցի, որ ավելի հեշտ կլինի, եթե մեկ ուրիշը զբաղվի դրանով, ես կողքից կուղղորդեմ: Այսպիսով, պարային բեմադրությամբ զբաղվում է Արման Խաչատրյանը, որի հետ ծանոթացանք Յանայի տեսահոլովակի հետ կապված աշխատանքների ժամանակ: Նա շատ արագ կյանքի կոչեց պարի հետ կապված իմ մտքերը»,-ասաց Մանոն:

Նա նշեց, որ տեսահոլովակում հայտնի դեմքեր չեն նկարահանվի, ստեղծագործական ողջ գործընթացն էլ իրականցնելու են իրենց ուժերով և ընկերների օգնությամբ:

Մանոյի խոսքով, դստեր երաժշտական հակումները նոր չեն հայտնվել: Յանան արդեն մեկ տարի է` հաճախում է վոկալի «Հայ արևներ» խմբում։ Մանոն վստահեցնում է`երգչուհու կարիերա սկսելու հատուկ նպատակադրում չեն ունեցել:

«Հատուկ մտադրություն չկար, որ ինքը պետք է երգի կամ որպես բլոգեր հանդես գա: Այդ ամենը մենք չենք մտածել, պարզապես մեկը մյուսին հաջորդելով ստացվել է: Յանան, ինքնըստինքյան, իր ճանապարհը հարթելով առաջ  է գնում։ Քանի որ մենք ստեղծագործող մարդիկ ենք, հասկանում ենք, թե ինչն է իր մոտ լավ ստացվում և նպաստում ենք, որ դա կյանքի կոչվի: Վստահաբար, այդ խնդիր չունենք իրեն ճանաչված դարձնելու: Եթե իր մոտ որևէ բան չստացվի, դա պարզապես չի արվի: Պրեմիերայից հետո հանդիսատեսն ինքը կդատի, թե որքանով է ստացվել նոր աշխատանքը»,- եզրափակեց Մանոն: