Հրանտ Թոխատյանի և Ռոզի Ավետիսովայի առաջին համագործակցությունը Գյումրու թատրոնի նոր ներկայացման մեջ

Հոկտեմբերի 6-ին Գյումրու Վարդան Աճեմյանի անվան դրամատակիական թատրոնում տեղի կունենա «Bye Bye Լեդի» ներկայացման պրեմիերան: Երկու գործողությամբ կատակերգությունը բեմադրվել է Ալեն Ռեյնո-Ֆուրտոնի «Ամադեյի դասը» պիեսի հիման վրա: Ներկայացման մեջ առաջին անգամ որպես խաղընկերներ հանդես կգան ՀՀ ժողովրդական արտիստ Հրանտ Թոխատյանն ու դերասանուհի Ռոզի Ավետիսովան:  Ռոզին Tert.am Life-ի հետ զրույցում պատմել է առաջարկը ստանալու, իր մարմնավորած կերպարի և Հրանտ Թոխատյանի հետ համագործակցության մասին:

Ներկայացման բեմադրիչն ու երաժշտական ձևավորողը թատրոնի գլխավոր ռեժիսոր Լյուդվիգ Հարությունյանն է, նկարչական ձևավորումը արել է Անտոն Քեշիշյանը: Գլխավոր դերերում Հրանտ Թոխատյանի և Ռոզի Ավետիսովայի հետ հանդես են գալիս Գյումրու թատրոնի դերասանները՝ Արսեն Սաղաթելյանն ու Մանե Մխոյանը:

Ռոզին նշեց, որ ներկայացման մեջ խաղալու առաջարկը ստացել է Գյումրու թատրոնի տնօրեն Տիգրան Վիրաբյանից: Դերասանուհին անկեղծացավ, որ առաջարկն իր համար բավականին անսպասելի է եղել, միաժամանակ՝ հաճելի ու պարտավորեցնող. «Առանց մտածելու համաձայնել եմ: Մեծ ուրախություն և պատիվ է Գյումրու թատրոնում խաղալը, որովհետև այն հին, պատմություն ունեցող և այսօր պահանջարկ վայելող թատրոն է, ունի հասկացող և պահանջկոտ հանդիսատես»,-ասաց դերասանուհին:

Ֆրանսիական սիտուացիոն կատակերգության մեջ Ռոզին ներկայանում է, իր խոսքով, բոլորովին նոր և նախորդ դերերից տարբերվող կերպարով: Դերասանաուհին վատ բարոյական նկարագիր ու բացասական հեղինակություն ունեցող կնոջ է մարմնավորում. «Ես ունեցել եմ փորձ խաղալու կնոջ, որն ունի վատ հեղինակություն, բայց այս կերպարը բավականին տարբերվում է նախորդից: Իմ հերոսուհին մի քիչ բացասական գծեր է պարունակում: Մարմնավաճառ է, որը ինչ-ինչ իրավիճակներում հայտնվում է Հրանտ Թոխատյանի կերպարի տանը և այդ հանդիպումը շրջադարձային է լինում և՛ հերոսուհու, և՛ հերոսի կյանքը: Հերոսուհիս Էմման է, որի մասնագիտական անունը Էմմի է, բայց վերջում ինքը դառնում է Էմմա: Էմմիից Էմմա դառնալու էվոլյուցիան է տեղի ունենում ամբողջ ներկայացման ընթացքում»:

Հրանտ Թոխատյանը մարմնավորում է Ամադեյին, որը տարիքով, փորձառու մանկավարժ է: Նրա բնակարանում են հայտնվում մի խումբ մարմնավաճառներ և այդ իրադարձությունը փոփոխությունների է հանգեցնում հերոսների կյանքում:

Ռոզին նշեց, որ ներկայացման մեջ բաց տեսարաններ չկան, ինչը կարող էր ենթադրվել նրա մարմնավորած կերպարից և շոշափվող թեմայից. «Ներկայացումը ունի էրոտիզմի էլեմենտը և դա գալիս է ներկայացվող թեմայից, բայց պահպանված է չափի զգացողությունն ու թատերայնությունը: Հերոսուհիս շատ գունավոր, բավականին բաց և գրավիչ կերպով է հայտնվում բեմում»:

«Bye Bye Լեդին» Ռոզիի համար ոչ միայն կերպարային առումով է նորություն, այլև խաղընկերների հետ աշխատանքի: Նա նշեց, որ երբևէ ո՛չ նկարահանման հրապարակում և ոչ էլ բեմում, Հրանտ Թոխատյանի հետ համատեղ աշխատանքի փորձ չի ունեցել: Առաջին համագործակցությունը, դերասանաուհու խոսքով, բավականին հեշտ է ստացվել:

«Ինձ համար նրա հետ աշխատանքը նոր է, հետաքրքիր ու շատ հեշտ: Պարոն Թոխատյանը նախ շատ մեծ փորձ ունի և այդ փորձը աշխատանքային պրոցեսը հեշտացնում է այնքանով, որ նա չի լարում, չի ճնշում: Դա խաղընկերոջ համար շատ կարևոր է: Կան մարդիկ, որ գուցե ունեն նմանատիպ մեծ փորձ, բայց կարող են անհարմարության զգացողություն առաջացնել խաղընկերոջ մոտ: Պարոն Թոխատյանի հետ ամեն ինչ շատ հեշտ և թեթև է եղել: Դա շատ երանելի վիճակ է, երբ գործը թեթև ես անում, կերպարներն էլ հեշտությամբ են ծնվում: Պրոցեսը շատ հետաքրքիր է, հաճելի, խաղաղ և ստեղծագործական»,-ասաց Ռոզին:

Դերասանուհին հույս հայտնեց, որ ներկայացումը կխաղան նաև երևանյան հանդիսատեսի համար, համենայնդեպս, Ռոզիի խոսքով, արդեն իսկ նմանատիպ ցանկություն և դրական արձագաքներ կան: