«Ինձ չեն ճանաչելու». Սարգիս Գրիգորյանը՝ նոր ձևաչափով սերիալ նկարահանելու և իր տարբերվող կերպարի մասին

Սարսափ, դրամատիզմ ու փոքր-ինչ գրոտեսկային մոտեցում. դերասան Սարգիս Գրիգորյանը այսպես է նկարագրում հոգեբանական թրիլեր հիշեցնող իր նոր նախագծը, որում օգտագործված է ավստրիացի հոգեբան և հոգեվերլուծության  հիմնադիր Զիգմունդ Ֆրեյդի տեսությունը: Մեկ րոպե տևողությամբ սերիաներից կազմված նախագիծը  կոչվում է «Ֆրեյդ» և սեպտեմբերից կցուցադրվի Ինստագրամում:

Սարգիսը Tert.am Life-ին տրամադրել է լուսանկարներ նկարահանման հրապարակից և փորձարարական նախագծից մանրամասներ պատմել: «Ֆրեյդ» (Freud)  նախագծում Սարգիսը ներկայանում է ոչ միայն որպես գլխավոր դերակատար, այլև սցենարի հեղինակն է: Ռեժիսորը՝ Արմեն Միրզոյանն է: Դերասանը նշեց, որ նախագիծը տեսակով փորձարարական է և ի սզբանե նպատակուղղված է եղել համացանցի լսարանի համար:

«Մտածեցի ուսուցողական, իր տեսակի մեջ յուրօրինակ մի բան անել: Որոշեցինք սերիալի սիստեմն օգտագործել, բայց որ դա այնպիսի սերիալ չլինի, որը հանդիսատեսը սովոր է հեռուստատեսությամբ տեսնել: Այստեղ մարդիկ չեն տեսնի տղա, աղջիկ, սեր, տառապանք: Սա լրիվ ուրիշ ձևափափ է, որ դեռևս չի արվել: Վերցնելով  Ֆրեյդի փոքր-ինչ տարօրինակ լինելը և հոգեբանական մոտեցումը՝ սերիաների մեջ փոքրիկ լեգենդ ենք դրել՝ կապված Ֆրեյդի նամակների հետ: Ըստ Ֆրեյդի, (չգիտենք դա որքանով է իրականություն թե հորինվածք), կան նամակներ, որոնք ապացուցում են մարդու կատարյալ երջանիկ լինելու փաստը: Այս նախագիծը այդ նամակների փնտրտուքի և դրանց հասնելու մասին է: Ամեն ժանրից մի փոքր օգտագործել ենք: Այստեղ դիտողը կտեսնի և՛ սարսափ, և՛ դրամա, և՛ գրոտեսկային մոտեցում»,-ասաց Սարգիսը:

Դերասանը նշեց, որ 20 սերիա արդեն նկարահանել են, ևս 10-ն էլ պետք է  նկարահանեն: Նախագծում հանդես է գալիս 6 հիմնական կերպար, որոնք ամեն սերիայում հայտնվում են տարբեր իրավիճակների և գործողությունների կիզակետում: Դերասանական կազմում ընդգրկված են Լուիզա Մելքոնյանը, Լիլիթ Գալստյանը, Հովհաննես Հաջինյանը, Գագիկ Սուքիասյանը, Սարգսի դուստրը՝ Յանա Գրիգորյանը և այլք:

«Յանան ընդամենը մի քանի տեսարանում է նկարահանվել: Հիմնական կերպարներից է կին ոստիկանը, որին մարմնավորում է Լիլիթ Գալստյանը: Իմ կնոջ դերում հանդես է գալիս Լուիզա Մելքոնյանը, որը իմ խաղընկերն է «Կարմիր բլուր» հեռուստասերիալում: Կնոջս սիրեկանի դերում Գագիկ Սուջյանն է, տան աշխատակցուհու դերում՝ Ժաննա Ավագյանը: Ունենք նաև անօթևանի կերպար: Տարբեր բնավորության և մասնագիտության մարդիկ ուզում են հասկանալ՝ ինչ է կատարվում, իսկ Ֆրեյդը մանիպուլյացիայի է ենթարկում նրանց բոլորին,-ասաց դերասանը և ավելացրեց, որ նախագծում ինքը անճանաչելի կերպարով է հանդես գալիս,-Այնտեղ ինձ չեն ճանաչելու: Ուժեղ տղայի կամ սիրահարված մաչոյի չեն տեսնի, այլ կտեսնեն կիսախելառ և շատ իմաստուն մարդու, որը խաղում է բոլորի հետ»,-ասաց դերասանը:

Սարգսի խոսքով, «Ֆրեյդը» նախատեսված է 25 տարեկանից բարձր լսարանի համար: Դերասանը դժվարացավ նշել, հոգեբանական մոտիվներով նախագիծը որքանո՞վ կհետաքրքրի դիտողներին և հաջողություն կունենա. «Առաջին 5 սերիաների ցուցադրումից հետո, ինքս էլ դիտողականությունից կարող եմ հասկանալ, սա ընդհանարպես պե՞տք էր թե ոչ, շարունակում ենք նկարահանել, թե այդքանով կսամանափակվենք, այսինքն, ընթացքից պարզ կլինի»,-եզրափակեց նա: