«Դեպի մանկական Եվրատեսիլի» մասնակից Վովայի տեսահոլովակի շնորհանդեսն ու հայտնի հյուրերը

Մանկական սերը՝ խաղալիքների լեզվով. LEGGO՝ այսպես է կոչվում այն երգը, որով 9-ամյա Վովան կպայքարի Հայաստանը «Մանկական Եվրատեսիլ» մրցույթում ներկայացնելու համար: Սեպտեմբերի 1-ին կայացավ Վովայի եվրատեսիլյան երգի տեսահոլովակի շնորհանդեսը: Tert.am Life-ը ներկա է եղել միջոցառմանը, ֆիքսել հայտնի հյուրերին ու նրանց տպավորությունները և զրուցել փոքրիկ երգչի հետ:

 «Դեպի մանկական Եվրատեսիլ» նախագծի մասնակից Վովային՝ Վլադիմիր Հովհաննիսյանին, հանդիսատեսը կհիշի «Նվագախմբի երեխաները» մանկապատանեկան մյուզիքլից, որտեղ նա մարմնավորում էր Բեթհովենին։ Վովան երաժշտությամբ զբաղվել սկսել է 6 տարեկանից, 7 տարեկանում ընդունվել է Երգի պետական թատրոն ՝ Արթուր Գրիգորիչի մոտ։ Նրա մրցութային LEGGO երգի երաժշտությունն ու գործիքավորումը Մարտին Միզրոյանինն է, խոսքերը գրել է Գրիգոր Կյոկչյանը: Տեսահոլովակի ռեժիսորն ու սպասվող բեմադրության հեղինակը Արամայիս Հայրապետյանն է, պարուսույցը՝ Քրիստինա Հովակիմյանը, Վովայի look-երի հեղինակը Դիանա Շատվերյանն է:

Տեսահոլովակը նկարահանվել է մեկ կադրով և գիշերով։ Այնտեղ ներկայանում են փոքրիկ երգիչն ու ևս 30 երեխա: Ռեժիսոր Արամայիս Հայրապետյանը Tert.am Life-ի հետ զրույցում նշեց, որ երեխաների հետ աշխատելը մեծ ջանքեր է պահանջել ստեղծագործական թիմից, որպեսզի վերջնական արդյունքը գոհացնող լինի: «Վովայի հետ հեշտ է աշխատել, որովհետև խարիզմատիկ երեխա է, դրա համար էլ որոշեցինք մի կադրով նկարահանել տեսահոլովակը, որպեսզի ցույց տանք նրա թե՛ դերասանական, թե՛ պարային հմտությունները, ներկայացնենք կերպարն այնպիսին, ինչպիսին կա, ոչ թե փորձենք մոնտաժի միջոցով ստանալ դա»,-ասաց ռեժիսորը:

Թեև Վովան երգում է մանկական սիրո մասին, մեզ հետ զրույցում ասաց, որ դեռ սիրահարված չէ և երգը կոնկրետ հասցեատեր չունի։ «Փորձել եմ պատկերացնել, որ մեկին սիրում եմ ու այդպես անկեղծ է ստացվել իմ կատարումը»,-ասաց նա և ավելացրեց, որ «Մանկական Եվրատեսիլին» մասնակցելն իր երազանքն է:

Վովայի տեսահոլովակի շնորհանդեսին ներկա էին ինչպես իր տարեկից ընկերները, այնպես էլ հայկական շոու-բիզնեսի մի շարք հայտնի արտիստներ՝ Մանո Գրիգորյանը՝ դստրերի հետ, Լուիզա Ներսիսյանն ու Լիլիթիկը, Մանե Գրիգորյանը՝ դստեր հետ, լեգենդար ջազմեն Լևոն Մալխասյանը, Դիանա Շատվերյանը, Արսեն Գրիգորյանը, Անդոն և Ռաֆոն, Լիդուշիկը և այլք։ Լևոն Մալխասյանն իր սրտի խոսքն ուղղեց փոքրիկ երգչին. «Ես առաջին անգամ չէ, որ լսում եմ Վովային: Առաջին իմ լսածը շատ հետաքրքիր էր այն առումով, որ տղան, ըստ իս, ունի մեծ պոտենցիալ և հնարվորություն այս մրցույթում հաղթելու համար: Համոզված եմ, որ նա առաջին տեղով պետք է գնա, ուրիշ տեղ չեմ ուզում»:

Վովայի առաջին տեսահոլովակն ու հաստատուն քայլերը երաժշտական ասպարեզում հուզմունք, միաժամանակ ուրախության զգացումներ էին առաջացրել նրա ծնողների մոտ: Հյուրերից շատերն առաջին ու մեծ շնորհակալությունը հայտնեցին հենց նրանց: «Վովային դեռ շատ փոքր տարիքից գիտեմ, շատ հպարտ եմ ու ուրախ, որ այսօր նա արդեն հավակնում է ներկայացնել Հայաստանը երաժշտական մրցույթում: Ուզում եմ շնորհակալություն հայտնել նրա ծնողներին, որ այսպիսի հրաշք բալիկ են լույս աշխարհ բերել և պարգևել հայ ազգին: Ամենակարևորը՝ դուխով և վստահ, որովհետև ռիսկը գործի կեսն է»,-ասաց Ռաֆոն:

 Երգիչ Արսեն Գրիգորյանը նույնպես հաջողություն մաղթեց փոքրիկ երգչին, միաժամանակ մասնագիտական գնահատական տվեց նրան. «Ամենակարևորը՝ Վովան ունի արտիստիզմ, լավ դեմք, որը միանգամից կարող է յուրաքանչյուր հանդիսատեսի գրավել: Երգը պատրաստել են մեր երկրի ամենալավ մասնագետները, նա էլ արտիստիկ ու երաժշտական ամբողջ էությունը դրել է երգի մեջ: Մեծ հաջողություններ եմ մաղթում»:

Դիզայներ Դիանա Շատվերյանն էլ նկատեց՝ փոքրիկ երգիչը գիտի, թե ինչպես իրեն ներկայացնել. «Կարծում եմ, եվրատեսիլյան բեմում էլ է լավ ներկայանալու: Ուզում եմ անպայման հաղթի»:

Ներկաները տպավորված էին Վովայի առաջին աշխատանքից, միաժամանկ համոզված՝ հաղթանակը նման արդյունքով շոշափելի է:

Լուսանկարները՝ Էլեն Գասպարյանի