«Կյանքում շատ անգամ եմ հուզվել, բայց այս անգամ անբացատրելի էմոցիաներ էին». ծնվել է Վարդան Հովսեփյանի առաջնեկը

Դերասան Վարդան Հովսեփյանն ու կինը՝ Կարինե Նուրիջանյանը, երեկ՝ սեպտեմբերի 3-ին, ծնողներ են դարձել: Այս տարվա փետրվարին պսակադրված զույգի  առաջնեկը տղա է, որին անվանակոչել են Մաքս: Երջանիկ հայրիկը Tert.am Life-ին պատմել է իր զգացողությունների մասին:

Վարդանը նշեց, որ երեխան ծնվել է 3 կգ քաշով և 51 սմ հասակով: Դերասանը որդուն առայժմ միայն նկարներով է տեսել: «Հենց երեխան ծնվել է, նկարներով արդեն տեսել եմ, լացն էլ եմ լսել, բայց մեր կենդանի հանդիպումն առայժմ չի կայացել, քանի որ սահմանված կարգ կա և չեն թույլատրում ներս մտնել,-ասաց նա և ավելացրեց, որ որդու ծնվելու լուրն իմանալու պահին անբացատրելի կերպով հուզվել է,-Այդ պահի էմոցիաները աշխարհում ամենաանհասկանալին ու անբացատրելին են: Ես շատ անգամ եմ հուզվել կյանքի տարբեր իրավիճակներում, նաև թատրոնում, կինոյում, զինվոր տեսնելիս, հարսանիքի ժամանակ, բայց երբ քեզ զանգում են ու ասում, որ դու արդեն հայր ես դարձել, չեմ կարող ասել, թե դա ինչ տեսակ զգացողություն է, անբացատրելի էր: Ես անընդհատ ապրումների մեջ էի, կնոջս հավասար տանջվում էի: Ինձ համար ամենակարևորը, որ նա հեշտությամբ ծննդաբերեր և ամեն բան բարեհաջող անցներ»:

Վարդանի խոսքով, թե՛ կինը, թե՛ երեխան իրենց լավ են զգում և հավանաբար մոտ օրերս դուրս կգրվեն հիվանդանոցից: Նորաթուխ հայրիկը պատմեց, որ երեխային արդեն հասցրել են իրեն նմանեցնել. «Երեխայի ծնունդն ընդունող բժիշկը, երբ տեսել է նրան ծնվելու պահին, ասել է՝ մի քիչ էլ մորուք ավելացնեինք, կդառնար Մոսոն, երևի տղաս ջղային դեմքով է եղել:  Մոսոն իմ խաղացած կերպարն է «Կարմիր Բլուր» հեռուստասերիալում: Ամեն դեպքում լավ է, որ որդիս հայրիկին է ուզում նմանվել»,-ասաց դերասանը:

Վարդանը նշեց, որ երեխան ծնվել է իրենց համար խորհրդանշական ժամին. «Որդիս ծնվել է 10-ից 10 պակաս: 10-ը մեր սիրած թիվն է ու ամեն ինչ այդ թվի հետ է կապված: Երևի ֆուտբոլիստ էլ կդառնա ու հանդես կգա 10 համարի ներքո: Մնում է՝ Եվրոպայում խաղա»:

Դերասանը ասաց,  որ Մաքս անունը իր ու կնոջ համատեղ ընտրությունն է երկար փնտրտուքներից հետո: Նրա խոսքով, երեխայի անվան հետ կապված վերջնական համաձայնության եկել են հիվանդանոցի ճանապարհին:

Երջանիկ հայրիկն առայժմ չի մտածել՝ ինչ անակնկալ մատուցել կնոջը, բայց վստահեցրեց, որ ամեն բան անելու է հավուր պատշաճի նրանց դիմավորելու համար: