«Շատ լավ ենք հաղթահարել սիրային տեսարանները». Հասմիկ Վերդյանը՝ Արշալույս Հարությունյանի ֆիլմում նկարահանվելու և իր դրամատիկ կերպարի մասին

Դերասանուհի Հասմիկ Վերդյանը ստեղծագործական նորություն ունի: Հարաբերական դադարից հետո դերասանուհուն հեռուստադիտողը կտեսնի նոր նախագծում: Նա նկարահանվում է ռեժիսոր Արշալույս Հարությունյանի՝ 16 մասից բաղկացած ֆիլմում, որը կցուցադրվի Առաջին ալիքի եթերում: Tert.am Life-ի հետ զրույցում Հասմիկը պատմել է Արշալույսի հետ առաջին համագործակցության և իր կերպարի մասին:

Դերասանուհին ասաց, որ ֆիլմը ավելի շատ տղամարդկանց և քրեական աշխարհի մասին է: Այնտեղ ներկայացվում են տարբեր պատմություններ, որոնցից մեկում հանդես է գալիս Հասմիկը: Նա նշեց, որ առաջարկն իր համար շատ հետաքրքիր, միաժամանակ պարտավորեցնող է եղել:

«Երբ առաջարկը եղավ, ասացին, որ շատ բարդ կերպարի համար են ինձ ընտրում՝ հաշվի առնելով, որ այդ բարդությունը ես կարող եմ հաղթահարել: Այդ փաստից ես շատ էի ուրախացել և մեծ հետաքրքրությամբ համաձայնեցի: Ի սկզբանե իմ կերպարը երկարատև մասնակցություն չէր ունենալու ֆիլմում, բայց ընթացքում որոշվեց երկարեցնել և նկարահանումները դեռ շարունակվում են»,-ասաց դերասանուհին:

Հասմիկը նշեց, որ առաջին անգամ է  աշխատում Արշալույս Հարությունյանի և ֆիլմում իր հիմնական խաղընկերների՝ Սուրեն Առուստամյանի ու Սարգիս Մանուկյանի հետ. «Շատ հետաքրքիր էր նման ռեժիսորի հետ աշխատելը: Արշալույսը ինձ համար շատ լավ ռեժիսոր է ու լավ մարդ: Մեծ բավանկանություն եմ ստացել համատեղ աշխատանքից: Սարգսի հետ էլ հաճույքով եմ խաղացել: Շատ լավ ենք հաղթահարել  թե՛ սիրային տեսարանները, թե՛ էմոցիոնալ պոռթկումները»:

Դերասանուհուն գրավել է նաև իր մարմնավորած կերպարը: Հասմիկը առաջին անգամ է ներկայանալու օտարազգի կնոջ դերում. «Ֆիլմում ես խաղում եմ վրացուհու կերպար և խոսում ռուսերենով: Նա ադրբեջանցու սիրած կին է հանդես գալիս: Այստեղ մենք փորձել ենք ադրբեջանցուն ավելի դրական ձևով ներկայացնել և այդ փոխհարաբերությունները ցույց տալ ոչ թշնամանքի ֆոնին: Կերպարս բավականին դրամատիկ է»,-ասաց նա:

Հասմիկը նշեց, որ երկու օր նկարահանումներ են անցկացրել նաև Վրաստանում: Դերասանուհին առաջին անգամ է եղել Թիֆլիսում և բավականին տպավորված  է վերադարձել: Նրա խոսքով, նկարահանումներին զուգահեռ բավականին հագեցած ու հետաքրքիր ժամանց են ունեցել:

Դերասանուհին պատմեց, որ իր մասնակցությամբ տեսարաններից մեկի նկարահանման ժամանակ հետաքրքիր դեպք է տեղի ունեցել. «Վրաստանում՝ օպերային շենքի մոտ նկարահանման ժամանակ հետաքրքիր բան ստացվեց: Ըստ սցենարի ես պետք է լաց լինեի և բացի նկարահանող խումբը, այդ պահին  բազմաթիվ մարդիկ էին հավաքվել տարածքում: Լինելով դերասանաուհի՝ ես մի պահ պապանձվեցի մարդկանց այդքան քանակից և չկարողացա լաց լինել: Այդ պահին ինձ մոտ ինչ-որ բարդույթներ էին առաջացել: Մի քանի կադր նկարահանեցինք, բայց զգացի, որ շատ վատ է  ստացվում: Արշալույսը այնպիսի իրավիճակ ստեղծեց, որ ես ազատվեմ բարդույթներից և ամեն ինչից կտրվելով մտնեմ կերպարիս մեջ: Այդպես էլ եղավ, -ասաց նա:

Դերասանուհին նշեց, որ այս շրջանում նկարահանվում է ևս մեկ նախագծում, որը եթերում կլինի ավելի ուշ: