«Ժյուրիի ու հանդիսատեսի արձագանքից մտածում էի՝ կհաղթեմ, բայց վերջում ինչ-որ բան կատարվեց». Գևորգ Հարությունյանը՝ «Նոր ալիք 2018»-ից տպավորությունների և նոր առաջարկների մասին

Սոչիում անցկացված «Նոր ալիք 2018» երաժշտական մրցույթից Հայաստանը ներկայացնող Գևորգ Հարությունյանը վերադարձավ՝զբաղեցնելով երկրորդ հորիզոնականը: Գևորգին հաղթանակից բաժանեց ընդամենը մեկ միավոր: Նա երեք մրցութային օրերին հավաքեց 297 միավոր և Ռուսաստանի ներկայացուցիչ Դարյա Անտոնյուկի հետ կիսեց երկրորդ հորիզոնականը: 

Tert.am Life-ի հետ զրույցում Գևորգը կիսվել է մրցույթից ստացած տպավորություններով, պատմել գործնական առաջարկներ ստանալու և հետագա ստեղծագործական ծրագրերի մասին: Գևորգի խոսքով, «Նոր ալիք 2018»-ում կարողացավ ելույթ ունենալ ճիշտ այնպես, ինչպես պատկերացնում էր: Երգիչը դա հասկացել է նաև ժյուրիի ու հանդիսատեսի արձագանքներից: 

«Արդյունքների հետ կապված ի սկբզանե մտածում էի, որ Հայաստանը անցյալ տարի 100 տոկոսանոց արդյունք գրանցեց, մի փոքր դժվար էր լինելու կրկնել այդ արդյունքը, չնայած ժյուրիի վերաբերմունքից ու ընդհանրապես այնտեղ թե՛ կազմակերպիչների, թե՛ հանդիսատեսի արձագանքներից մտածում էի, որ վերջին մցրութային օրը, միգուցե, հաղթեմ, բայց վերջնական արդյունքից ընդհանրապես չեմ տխրել: Միայն տխրեցի նրա համար, որ մարդիկ էին շատ սպասում այդ հաղթանակին:  Ես արդեն կոփվել եմ մրցույթներում և գիտեմ, որ  անսպասելի, անկանխատեսելի, երբեմն, ոչ օբյեկտիվ արդյունքներ կարող են լինել, այդ պատճառով էլ հանգիստ էի, պարզապես մի փոքր ափսոսանք ես զգում, երբ հաղթանակը քոնն է, բայց քեզ չեն տալիս: Ավելի շատ տխրել էի հանդիսատեսի, մարդկանց համար, որոնք այդ րոպեներին ինձ ապրումակցում էին»,-ասաց նա:

Գևորգը նշեց, որ երրորդ մրցութային օրվա ելույթից հետո ժյուրիի գնահատականները իր տպավորությամբ, հստակ հաշվարկի արդյունք են եղել: Հայաստանի մասնակիցը նկատել է, որ ինչ-որ բան այն չէ. « Վերջում այնտեղ ինչ-որ բան պատահեց: Նրանց գնահատականները ընդհանրապես իմ ելույթից կախված չէին: Ժյուրիի ներսում ինչ-որ բան կատարվեց, որովհետև կային մասնագետներ, որ 9-ը գնահատեցին, բայց վերջում ինձ մոտեցան ու ասացին, որ դու ես հաղթողը: Բացահայտ էր, որ ինչ-որ բան է տեղի ունեցել: Մի քանի րոպե մտածել, թե մասնակցին ինչ են գնահատում, թիվ բարձրացնել, իջեցնել. դա բացահայտ հաշվարկ էր: Իրենց էլ եմ ասել այդ մասին: Իրենք էլ ասացին՝ թեթև տար, սա խաղ է, որը կոչվում է շոու-բիզնես»:

Այդուհանդերձ, Գևորգը ասաց, որ մրցույթի արդյունքները վիճարկելու փորձ չի արել, սակայն նրա խոսքով, ակնհայտ է, որ ինքը եղել է մրցույթի ֆավորիտը և հաղթանակն էլ շոշափելի է եղել: «Ես դեռ «Դեպի Եվրատեսիլից» սկսած հասկացա, որ մրցույթներին վախով չեմ վերաբերվելու: Ինձ մոտ բացակայում է սթրեսը և ես  պարզապես դուրս եմ գալիս համերգային դահլիճ ելույթի համար: Նույնը «Նոր ալիք»-ի ժամանակ էր: Ես իսկապես շատ հանգիստ էի և ուղղակի բեմը վայելում էի: Ինձ համար կարևորը լավ ելույթ ունենալն էր և համացանցում մարդկանց այդքան դրական արձագանքն ու գնահատականը, իմ վիդեհոլովակների տասնապատիկ ավելի դիտումները»,-ասաց նա:

Գևորգը դժվարացավ առանձնացնել ժյուրիի որևէ անդամի կարծիքն ու գնահատականը իր ելույթի հետ կապված, միայն նշեց, որ բոլորն էլ պրոֆեսիոնալ մասնագետներ են. «Իգոր Կրուտոյն ինձ համար ավելի գնահատելի է, որովհետև կոմպոզիտոր է, իսկ ես այնտեղ առիթ ունեցա  ներկայացնելու նաև իմ կոմպոզիտորական երգը: Կրուտոյն ու Ֆիլպ Կիրկորովը նույնիսկ զարմացել էին, որ Stand up երգի հեղինակը ես եմ»:

Գևորգի խոսքով մրցույթը իրեն մեծ ճանաչում բերեց ու նաև գործնական առաջարկներ ստանալու հնարավորություն տվեց. «Հիմա բազմաթիվ առաջարկներ կան, նույնիսկ Ռուսաստանի հետ կապված, բայց դեռ չեմ կարող մանրամասնել, մինչև շոշափելի չլինեն: Այս շրջանը ինձ մոտ շատ հագեցած է, քանի որ մեկ ամիս առաջ էլ նշանակվել եմ Կապանի Մշակույթի պալատի տնօրեն և դեռ չգիտեմ ինչպես եմ համատեղելու գործունեությունս: Լավ կլիներ, իմ կողքին պրոդյուսեր ունենայի: Ես ինչպես մենակ գնացի մրցույթին իմ հարազատների, ընկերների միջոցով, այդպեսլ էլ վերադարձել եմ, բայց ոչինչ, երբ դժվար ճանապարհով գնում ես, հաջողությունները ավելի շոշափելի են լինում»,-եզրափակեց նա: