Դերասան Հայկ Պետրոսյանը` երկրորդ անգամ հայր դառնալու, սերիալներում չնկարահանվելու պատճառի և որպես հաղորդավար հանդես գալու մասին

Դերասան Հայկ Պետրոսյանը երկրորդ անգամ հայր է դարձել: Սեպտեմբերի 3-ին ծնվել է դերասանի երկրորդ որդին: Tert.am Life-ի հետ զրույցում Հայկը պատմել է  ընտանիքի համալրման, ինչպես նաև խոսել հեռուստասերիալներում չնկարահանվելու պատճառների և որպես հաղորդավար հանդես գալու մասին:

Հայկը նշեց, որ որդին ծնվել է 3.8կգ քաշով եւ 55 սմ հասակով: Ծնողները փոքրիկին անվանակոչել են Արեգ: Երջանիկ հայրիկը ասաց, որ երեխայի անվան հարցում ինքն ու կինը՝ Անին, երկար են մտածել, իսկ վերջնական ընտրությունը կատարել է բալիկի հետ առաջին հանդիպման ժամանակ. «Փոքր-ինչ երկար ենք մտածել, որովհետև շատ տարբերակներ են եղել, բայց ես մտածում էի՝ կնայեմ երեխայի դեմքին ու մեր ընտրած անուններից որն իրեն սազի, դա էլ կդնենք: Երեխայիս ծնվելու հաջորդ օրը մոտ մեկ ժամ նայեցի նրա դեմքին ու հասկացա, որ ինքը Արեգ անունն է ունենալու»:

Թեև Հայկը երկրորդ անգամ է ճաշակում ծնողական բերկրանքը, բայց նշեց, որ նույնչափ հուզմունք ու հաճելի զգացողություններ է ապրել: «Ինչ –որ անբացատրելի զգացումով ես պարուրվում, որ ևս մեկ էակ է լույս աշխարհ գալիս, որի հանդեպ դու ունես շատ տարիների պարտավորություն և պետք է կարողանաս այդ հաճելի, շատ պատասխանատու ու լավ իմաստով ծանր բեռի տակից պատվով դուրս գալ»,-ասաց նա:

Հայկի ավագ որդին՝ Նարեկը արդեն 4 տարեկան է: Դերասանը նշեց, որ եղբոր ծննդին Նարեկն անհամբերությամբ է սպասել, իսկ երեխաներին հատուկ խանդի որևէ դրսևորում այս ընթացքում չի ցուցաբերել. «Մեծ տղաս շատ հանգիստ և բարի երեխա է: Իմ ու կնոջս անդադար զրույցներից նա հասկացել էր, որ փոքր եղբայր է գալու, որը դեռ ոչինչ չի հասկանում և ունենալու է իր օգնության կարիքը: Նարեկի մոտ խանդի դրսևորում դեռ չեմ նկատել, ընդհակառակը՝ նա օգնում է եղբորը օրորել, քնեցնել»:

Հայկի խոսքով, չկա որևէ բան, ինչը չի հասցրել տալ առաջնեկին և փորձի բացը լրացնել երկրորդ բալիկի դեպքում. «Իմ երեխաների միջև եղավ 4 ու կես տարվա տարբերություն, որովհետև եթե ես թե՛ հոգեբանական, թե՛ ֆինանսական և թե՛ ժամանակի առումով լիարժեք զգայի, որ երկու երեխային կարող եմ  տալ այն, ինչ ես եմ ուզում, միգուցե ավելի շուտ ունենայինք, բայց ես մտածեցի՝  ավելի լավ է  չշտապել,-ասաց նա և ավելացրեց, որ որդիների դաստիարակության հարցում մի քանի կարևոր սկզբունքով է առաջնորդվում,- Պիտի չստեն, հարգեն մեծերին: Ես մի կարևոր բան եմ փորձում դեռ մանկուց սերմանել Նարեկի մեջ, նույնն էլ փոքր որդուս դեպքում եմ անելու, լինել բարի և ունենալ շնորհակալ լինելու ձգտումը: Ամենակարևորը ինձ համար, որ երեխաներս լինեն իմ առաջին ընկերները, իսկ ես նրանց՝ չմոռանալով նաև հայր և որդի հարաբերության մասին»:

Անդրադառնալով ստեղծագործական կյանքին՝ Հայկը նշեց, որ այժմ բավականին զբաղված է թատրոնում, իսկ սեպտեմբերից հանդես է գալիս որպես հաղորդավար «Երկիր մեդիա» հեռուստաընկերության «Բարև երկիր» ծրագրում. «Հաղորդավարական շատ քիչ փորձ ունեցել եմ, բայց սա իր ձևաչափով նոր նախագիծ է ինձ համար: Ես շատ ուրախ եմ, որովհետև պիտի անկեղծանամ, սերիալում նկարահանվելու ցանկություն, առհասարակ, չունեի: Նույնիսկ վերջերս բավականին բարձր վարկանիշ ունեցող սերիալում նկարահանվելուց հրաժարվեցի»,-ասաց նա:

Հեռուստադիտողներին բազմաթիվ հեռուստասերիալներից հայտնի դերասանը նշեց, որ այս փուլում նախընտրում է չնկարահանվել որևէ սերիալում, իսկ որոշակի դադարը, Հայկի խոսքով, իր նախընտրությամբ է եղել և ոչ թե առաջարկների բացակայությամբ պայմանավորված:

 «Մեկ տարուց ավելի է որևէ սերիալում չեմ նկարահանվում: Ես կատեգորիկ չեմ դիտարկում այս հարցը, ինչու ոչ, եթե օրինակ ամեն ինչ լինի երկու կողմերի ցանկությամբ, ես միանշանակ նորից սիրով կնկարահանվեմ սերիալներում, որովհետև դա ինչ-որ տեղ իմ գործի բաղկացուցիչ մասն է  կազմում: Ես սիրում եմ փոփոխություններ անել և կարոտել այն աշխատանքը, որը երկար ժամանակ անում էի: Սերիալը շատ արագ տեմպ ունի, ավելի ռոբոտացված վիճակ է և մտածելու քիչ ժամանակ ես ունենում, դրա համար այս ընդմիջումը հաստատ ճիշտ է և արժե, որ որպես դերասան փոքր-ինչ բազա հավաքես, թեկուզ նորից սերիալում նկարահանվելու համար»,-եզրափակեց Հայկը: