«Մեքենա վարել սովորել եմ 6-րդ դասարանում». Նաիրա Մովսիսյանը՝ վարորդական փորձի և վթարային իրավիճակում հայտնվելու մասին

Երթևեկության ընթացքում  որևէ սխալ գործողություն նկատելիս կամ ոչ ճիշտ կայանված մեքենա տեսնելիս շատերը շտապում են եզրակացնել, թե վարորդը կին է, մինչդեռ կին վարորդները համառորեն շարունակում են կոտրել այս մտածելակերպը: Tert.am Life-ի «Ղեկին կանայք են» շարքում այս անգամ զրուցել ենք դերասանուհի Նաիրա Մովսիսյանի հետ:

Դերասանուհին նշեց, որ մեքենա վարել սովորել է դեռ 6-րդ դասարանում, իսկ վարել սկսել է այս տարվա մարտից.  «Այն ժամանակ եղբայրներս մեքենա վարել էին սովորում, ինձ էլ զուգահեռ սովորեցրին: Իսկ այս փուլում, քանի որ այլևս անհնար էր վարորդ պահելը կամ տաքսիներով երթևեկելու վրա այդքան գումար ծախսելը, որոշեցի մեքենա ձեռք բերել»:

Նաիրայի առաջին և առայժմ միակ ավտոմեքենան Nissan Tiida մակնիշի է: Դերասանուհին այն ձեռք է բերել Ճապոնիայից` բոլորովին նոր վիճակում. «Շատ հաճախ է լինում, երբ կարմիր լույսի տակ մեքենայով կայանած եմ լինում, ասում են՝ չէինք մտածում, որ դուք այս մեքենան կվարեք, երևի ես պիտի Porsce կամ Rolls-Royce  վարեմ, բայց այդ օրն էլ կգա :)»:

Նաիրան իրեն կարգապահ և օրինակելի վարորդ է համարում: Նա նշեց, որ մինչ օրս երբևէ իր մեքենան չի կանգնեցվել պետավտոտեսուչների կողմից: Դերասանուհին այս ընթացքում մեկ անգամ է հայտնվել վթարային իրավիճակում:  «Մարտ ամսին, երբ նոր էի վարում, հասցրել են երկու անգամ մեքենաս քերծել: Վթարային իրավիճակում էլ այդ ժամանակ եմ հայտնվել, երբ հարվածեցին մեքենայիս: Միանգամից զանգահարեցի ընկերուհուս ամուսնուն և կարողացանք տեղում բոլոր հարցերը կարգավորել, որովհետև իրականում ժամանակ էլ չեմ կարողանում տրամադրել մինչև ԱՊՊԱ-ն կժամանի»,-ասաց Նաիրան:

Դերասանուհին նույնպես հերքում է տեսակետը, թե կանայք իրենց վարորդական հմտություններով զիջում են տղամարդկանց. «Կանայք այնքանով են վատ վարորդներ, որ հազար անգամ ավելի լավ ու օրինական են վարում քան տղամարդիկ, իսկ դա տղամարդկանց դուր չի գալիս: Թեև երթևեկելիս մի քանի կին վարորդների սխալ վարելուն ականատես եղել եմ, բայց ընդհանուր առմամբ, թե՛ իմ և թե՛ ընկերուհիներիս օրինակով կարող եմ ասել, որ կանայք ավելի լավ են հետևում երթևեկության կանոններին ու առավել զգուշավոր են»:

 Լավ վարորդ լինելու համար Նաիրան մի քանի կարևոր նախապայման է թվարկում. «Առաջնահերթ կարևոր է հոտառություն ունենալ և հետո սովորել այն ամենը, ինչ հարկավոր է քննություն հանձնելու համար: Պետք է քննություն տալով ստանալ վարորդական իրավունքը և ոչ թե գնել այն»:

Նաիրան նշեց, որ մեքենայի կառուցվածքից ու ավտոպահեստամասերից տեղեկացված էև փորձում է անսարքության դեպքում ինքնուրույն խնդիրը շտկել. «Մինչ այս պահը որևէ խնդիր չեմ ունեցել: Մի անգամ պարզապես մեքենայիս անիվն էր նստել Արտաշատի ճանապարհին էի, բայց ինձ օգնեցին խնդիրը կարգավորվեց: Իսկ երբ դեռ մեքենա չունեի, եղել է դեպք, որ ինքս մեկ ուրիշի մեքենայի անիվն եմ փոխել»:

Դերասանուհին նշեց, որ վարելու ընթացքում իր հիմնական գործողություններից մեկը համացանցում live հեռարձակում անելն է, իսկ խցանումների ժամանակ Նաիրան, ի տարբերություն շատ վարորդների, չի նյարդայնանում, ավելին՝ հասցնում է կիսատ մնացած գործերն անել:  «Անկեղծ ասած, ես սիրում եմ խցանումները,  որովհետև այդ ընթացքում այնքան գործ եմ անում: Եթե չեմ հասցրել շպարվել, շպարվում եմ, գործնական զանգեր եմ անում, սելֆի եմ անում: Ես միշտ տանից մեկ կամ երկու ժամ շուտ եմ դուրս գալիս, այդ հաշվարկով ես երբևէ չեմ ուշանում»,-ասաց նա:

Դերասանուհու մեքենայում հիմնական ուղևորներն են դուստրը, մայրն ու ընկերները: Ամենաերկար ճանապարհը, որ իր մեքենայով և վարորդի կարգավիճակում նա գնացել է, եղել են Գյումրին ու Դիլիջանը: Նաիրան վարելու ընթացքում ոչ միշտ է երաժշտություն լսում, թեև ունի իր սիրելի կատարողների երգերի ձայնասկավառակը. «Ուիթնի Հյուսթոն, Շառլ Անզավուր, Էդիթ Պիաֆ, Ադել և շատ այլ արտիստների երգերն են հնչում մեքենայիս մեջ, բայց աշխատում եմ հիմնականում առանց երաժշտություն լսելու վարել, որովհետև առանց այդ էլ ուր գնում եմ, աղմկոտ վայրեր են»:

Նաիրայի խոսքով, թե՛ դրսից, թե՛ ներսի սրահից, դժվար կլինի տարբերակել, որ իր մեքենան կնոջ ավտոմեքենա է: Դերասանաուհին թվարկեց նաև հիմնական իրերը, որոնք միշտ մեքենայի մեջ են լինում. «Դրամապանակս, գրքույկս, վարորդական իրավունքս, տեխզննման գրքույկն ու ապահովագրական թուղթը»: