Էդգար Իգիթյանի ոչ ավանդական հարսանիքի հետաքրքիր դրվագներն ու հուզիչ պահը

18:41 • 16.09.18

Շոուբիզնես

«Էլենի օրագիրը» հեռուստասերիալից հայտնի դերասան Էդգար Իգիթյանն այսօր ամուսնացավ։ Էդգարը, որը միշտ ասում է, որ երջանիկ է, քանի որ գտել է իրական սեր, մոտ երկու տարի ընկերություն անելուց հետո կնության առավ Լուսինե Չոբանյանին, որը մարզասրահներից մեկում աշխատում է որպես մարզիչ։

Tert.am Life–ը ներկայացնում է զույգի ոչ ավանդական հարսանիքի մանրամասներն ու ֆոտոշարքը։

Մուղնու սուրբ Գևորգ եկեղեցում Էդգարն ու Լուսինեն միմյանց հավերժ սիրելու, Տեր և Հնազանդ լինելու երդում տվեցին և փոխանակվեցին ամուսնական մատանիներով։ Զույգը պսակադրվեց դիզայներ Արփինե Կոշտոյանի և ամուսնու` Հայկ Արզումանյանի քավորությամբ։ Նրանք նաև Էդգարի մկրտության քավորն են։

Էդգարն ու Լուսինեն զերծ են մնացել հայկական ավանդական հարսանիքի երկար երթուղուց։ Փեսան հարսին սպասում էր եկեղեցու բակում։ Tert.am Life–ի հետ զրույցում Էդգարն ասաց, որ մինչև վերջին վայրկյանը չգիտեր, թե սիրելին ինչ զգեստով է ներկայանալու հարսանիքին։

«Պահպանել էինք ավանդույթն ու նախապես չէի տեսել Լուսինեի զգեստը։ Եկեղեցու բակում նրան առաջին անգամ տեսա հարսի զգեստով, աննկարագրելի զգացողություններ ունեի։ Շատ գեղեցիկ է։ Հարսի զգեստը մաքրության խորհրդանիշ է։ Երբ սիրածդ աղջկան ես տեսնում այդ զգեստով, բոլորովին այլ ապրումներ ես ունենում»,– ասաց նորափեսան, որի համար այդ պահը հուզիչ էր։

Հարսնացուն ծաղկեփունջն ընտրել էր մանուշակագույնի համադրությամբ։ Նույն գույնի փողկապ էր ընտրել նաև Էդգարը։ Հարսանիքի նախապատրաստական աշխատանքները զույգը վստահել էր մասնագիտացված ընկերության, սակայն ամեն ինչ պատրաստվել էր իրենց ճաշակով և ցանկությամբ։

Եկեղեցու բակում տեղի ունեցավ նաև զագսի արարողությունը, որն ուղեկցվում էր ջութակի հնչյուններով։ Զույգը զերծ է մնացել նաև ռեստորանային խնջույքից։ Նրանք եկեղեցու բակում ֆուրշետ էին նախապատրաստել հյուրերի համար։

Ամուսնության արարողությունից հետո նորապսակները պատրաստվում են մեկնել մեղրամսի, որը կվայելեն Հունաստանում։