Ռազմիկ Ամյանը, Լիլիթ Հովհաննիսյանը, Արմենչիկը, Ավրաամ Ռուսոն և այլ հայտնի արտիստներ՝ Սոչիում կայանալիք «Արմենիա TV»-ի «Տարվա երգ» մրցանակաբաշխությանը

15:55 • 25.09.18

Շոուբիզնես

Սեպտեմբերի 26-ին Սոչիի «Kонцертный зал Фестивальный» համերգասրահում տեղի կունենա երաժշտական սպասված իրադարձություն՝ «Արմենիա. տարվա երգ» մրցանակաբաշխությունը: Մրցանակաբաշխությունն անցկացվում է արդեն երկրորդ անգամ: Tert.am Life-ի հետ զրույցում «Արմենիա» հեռուստաընկերության երաժշտական պրոդյուսեր Իրինա Վարդանյանը որոշ մանրամասներ է պատմել սպասվող համերգային ծրագրից և նշել, թե այս տարի ովքե՞ր են լինելու մասնակից արտիստներն ու հատուկ հյուրերը:

Մրցանակաբաշխության նախաձառենողն է «Պոզիտիվ» փրոդաքշնը՝ Ամարաս Գասպարյանի գլխավորությամբ, որոնց հետ արդեն երկրորդ տարին սիրով համագործակցում է «Արմենիա» հեռուստաընկերությունը: Միջոցառման բեմադրիչ ռեժիսորը Գրիշա Գասպարյանն է:

Իրինայի խոսքով, միջոցառման հիմնական նպատակն է խրախուսել տարվա ընթացքում իրենց երաժշտական գործունեությամբ աչքի ընկած արդեն սիրված, հայտնի արտիստներին, ինչպես նաև հայկական շոու բիզնեսի նոր անուններին, որոնց երգերը ընթացիկ տարվա մեջ հիթ են դարձել: «Տարվա երգ» անվանակարգի բոլոր հաղթողները կստանան խորհրդանշական արձանիկներ:

«Բոլոր սիրված երգիչները կամ ինչու ոչ՝ նոր անունները, որոնք 2017-2018 տարվա ընթացքում ներկայացրել են հիթային կատարում, արժանանում են «Տարվա երգ» մրցանակին: Ընդ որում, կան երգեր, որոնք տեսահոլովակ չեն ունեցել, բայց շատ մեծ տարածում են գտել և սիրվել լսարանի կողմից, դրանք նույնպես ներառված են: Այստեղ չեն լինում տարատեսակ խոսակցություններ, թե ո՞վ էր ամենալավը, բարության մթնոլորտ է տիրում և բոլորն արժանանում են լավ գնահատականի: Կատարված աշխատանքի համար արտիստը գնահատական է ստանում և արժանանում հանդիսատեսի ջերմ ընդունելությանը, ինչը իրենց էլ հաճելի է»,-ասաց Իրինան:

Համերգային երեկոն կվարեն Նազենի Հովհաննիսյանն ու Վաչե Թովմասյանը: Մրցանակաբաշխությանը մասնակցում են մրցանակի հավակնորդներ, հայկական էստրադայի սիրված և ճանաչված աստղերը՝ Ռազմիկ Ամյանը, Լիլիթ Հովհաննիսյանը, Սոֆի Մխեյանը, Միհրան Ծառուկյանը, Արման Հովհաննիսյանը, Իվետա Մուկուչյանը, Էրիկ Կարապետյանը, Արմենչիկը, Հարութ Բալյանն ու Սուպեր Սաքոն, Սոնան և Արա Մարտիրոսյանը, Սոնա Ռուբենյանն ու Գարիկ Պապոյանը: Ժողովրդական երգիչներից կլինեն Մավր Մկրտչյանը, Գուրգեն Դաբաղյանը և մի շարք այլ հայտնի արտիստներ: Միջոցառման հատուկ հյուրերն են Ջիվան Գասպարյանն ու Ավրաամ Ռուսոն:

«Լինելու է գեղեցիկ շոու ծրագիր: Արտիստները հանդես կգան պարային խմբերի ուղեկցությամբ, գեղեցիկ բեմադրություններով: Հանդիսատեսի համար սա շատ սպասված իրադարձություն է: Դեռ մի քանի ամիս առաջ տոմսերն արդեն սպառվում են»,-ասաց Իրինան և ավելացրեց, որ Սոչիի նախընտրությունը պայմանավորված է նաև տեղի հանդիսատեսի հյուրընկալությամբ ու ջերմ ընդունելությամբ,- Մեկ օրում սիրված արտիստների լավագույն կատարումներով համերգային ծրագիրը փոքրիկ տոն է լինելու Սոչիի հանդիսատեսի համար: Տեղի հայերը շատ հյուրընկալ ձևով են ընդունում արտիստներին: Բացի այդ, կազմակերպիչներից Գրիգոր Գասպարյանը և նրա եղբայրը՝ Ամարասը, շատ մեծ փորձ ունեն այնտեղ նմանատիպ միջոցառումների կազմակերպման հարցում: Կարող եմ բացել փակագծեր և նշել, որ նմանատիպ միջոցառում մյուս տարի հնարավոր է Երևանում կազմակերպենք, ավելի լայն մասշտաբով և ավելի մեծ համերգասրահում»,-ասաց նա:

Կազմակերպիչները հանդիսատեսին խոստանում են իրական երաժշտական տոն՝ հիթային կատարումներով: Դե իսկ «Արմենիա TV»-ի հեռուստադիտողները հնարավորություն կունենան համերգային ծրագիրը վայելել արդեն հեռուստաեթերում: