Ստանսիլավսկու թատրոնի գեղարվեստական ղեկավարի նշանակման աժիոտաժը. Ելենա Վարդանյանը, Լիլիա Մուկուչյանը և այլք կբոյկոտեն, եթե չանցնի իրենց միասնական թեկնածուն` Կարեն Ներսիսյանը

17:49 • 29.09.18

Շոուբիզնես

Կոնստանտին Ստանիսլավսկու անվան ռուսական դրամատիկական թատրոնում գեղարվեստական ղեկավարի պաշտոնը շարունակում է թափուր մնալ: Հունիսի 21-ին նշանակված ընտրությունը չկայացավ, առաջադրված երկու թեկնածուի՝ ռեժիսոր Նորա Գրիգորյանի և նույն թատրոնի դերասան Ռոբերտ Հակոբյանի կողքին այժմ շրջանառվում են այլ թեկնածուների անուններ: Նրանցից մեկը ռուսաստանաբնակ ռեժիսոր Կարեն Ներսիսյանն է։ Թատրոնի դերասանուհի Լիլիա Մուկուչյանի խոսքով` նրա թեկնածությունն առաջադրել և սատարում են թատրոնի ստեղծագործական կազմի 21 անդամ, որոնցից 19-ը՝ գործող դերասաններն են:

Tert.am Life-ի հետ զրույցում դերասաններից մի քանիսը` Լիլիա Մուկուչյանը, Անուշ Սարգսյանը, Վերոնիկա Սարոյանը և Ելենա Վարդանյանը, խոսել են թատրոնի գեղարվեստական ղեկավարի ձգձգվող ընտրության մասին:

Դերասանների փոխանցմամբ` Մշակույթի նախարար Լիլիթ Մակունցը հունիսի 21–ին հանդիպում է ունեցել ստեղծագործական կազմի հետ և ասել, որ իրենք պետք է քվերակության միջոցով ընտրեն գեղարվեստական ղեկավարի, իրենք ընտրել են Կարեն Ներսիսյանին, նամակ են գրել նախարարությանը, որի տակ ստորագրել է ստեղծագործական կազմի 21 անդամ, սակայն, դերասանուհի Անուշ Սարգսյանի խոսքով, նախարար Մակունցը հերքել է իր նախորդ ասածն ու իր հետ զրույցում ասել, որ ընտրությունն անելու է նախարարությունը։

«Ես պատահական հանդիպում ունեցա Լիլիթ Մակունցի հետ և փորձեցի պատասխան ստանալ մեր նամակի վերաբերյալ, նա նշեց, որ սխալմունք է եղել և օրենքով նախատեսվում է, որ գեղարվեստական ղեկավարի նշանակումը պետք է լինի նախարարության կողմից: Ստացվում է, որ նա մեզ մոտ բարձարցրեց այդ ոգին, որ կարող ենք ինքներս ընտրել գեղարվեստական ղեկավարին, իսկ հիմա ասում է ՝ կներեք ես սխալվել եմ: Հիմա մեզ համար շատ դժվար է: Առանց այդ էլ թատրոնի գործերն օրեցօր ավելի են դժվարանում»,-ասաց դերասանուհին:

Սեպտեմբերի 17-ին Մշակույթի նախարարության պաշտոնական կայքում տեղադրվել է հայտարարություն Ստանսիլավսկու թատրոնի գեղարվեստական ղեկավարի նշանակման վերաբերյալ, համաձայն որի հոկտեմբերի 1-ին, ժամը 11:00-ից նախարարությունում տեղի են ունենալու առանձին լսումներ բոլոր հայտատուների մասնակցությամբ: Լսումների արդյունքն ամփոփվելու է մեկ շաբաթվա ընթացքում, որից հետո հայտարարվելու է թատրոնի գեղարվեստական ղեկավարի անունը։

Դերասաններն ասում են, որ հանդիպման օրը հետաձգվել է, ինչը նրանց անհանգստանալու առիթ է տվել։ «Ուրբաթ օրը, նախարարությունից զանգահարել են Կարեն Ներսիսյանին և ասել, որ նա կարող է չգալ երկուշաբթի օրը նախատեսված հանդիպմանը, քանի որ այն չի կայանալու: Մենք փորձեցինք պարզել, թե ինչ է կատարվում, սակայն որևէ ստույգ պատասխան նախարարությունից չհաջողվեց ստանալ»,-ասաց Լիլիա Մուկուչյանը:

Դերասանուհու խոսքով` ավելի ուշ իրենք պարզել են, որ ձևավորվելու է հանձնաժողով, որը պետք ուսումնասիրի բոլոր թեկնածուների գործերն ու որոշում կայացնի, սակայն, թե ովքեր են այդ հանձնաժողովում ընդգրկված, որքանով են իրավասու կայացնել այդ որոշումը, չեն կարողանում պարզել:

«Մեզ ասացին քվերակություն, ասացինք` համաձայն ենք, ասացին նշանակում՝ դրան էլ համաձայնեցինք, մեր թեկնածուին առաջադրեցինք, բայց այսօրվա դրությամբ, երբ երկու օր է մնացել հանդիպմանը, և մեր թեկնածուն գործերը հետաձգել, դեպի Հայաստան տոմսեր է գնել, հանկարծ ասում են` հանդիպում չի լինելու: Ի վերջո, պե՞տք է հաշվի առնեն, որ թատրոնի 40 հոգուց բաղկացած ստեղծագործական կազմի մեծամասնությունը՝ 21 հոգին ունի միասնական կարծիք և այս պաշտոնում տեսնում է Կարեն Ներսիսյանին»,-ասաց դերասանուհի Ելենա Վարդանյանը:

Դերասանների խոսքով, ստեղծագործական կազմի մյուս 19-ը անդամը չունեն միասնական թեկնածու և տարբեր թեկնածուների են պաշտպանում, մի մասն էլ չեզոք կեցվածք ունի։

«Շատ արվեստագետներ ասում են, թե դերասանների կարծիքը կարևոր չէ գեղարվեստական ղեկավարի ընտրության հարցում: Ինչո՞ւ կարևոր չէ, եթե մենք ենք ի վերջո աշխատելու այդ մարդու հետ: Այս 21 հոգու մեջ հիմնականում աշխատող դերասաններն են, որոնց ուսերին է թատրոնի խաղացանկը: Թատրոնի գեղարվեստական խորհրդի 13 անդամներից 8-ը և 33 դերասանից 19-ը մեր կազմում են: Ի վերջո, գեղարվեստական ղեկավարը մեզ հետ է աշխատելու: Չի կարելի մեզ հետ նման խաղեր խաղալ»,-ասաց դերասանուհի Վերոնիկա Սարոյանը:

Լիլիա Մուկուչյանն էլ հավելեց, որ իրենց առաջարկած թեկնածուն համապատասխանում է գեղարվեստական ղեկավարի պաշտոնում լինելու բոլոր չափոփորոշիչներին. «Մենք առաջարկեցինք Կարեն Ներսիսյանին, որովհետև ուզում ենք աշխատել մի մարդու հետ, ումից սովորելու բան կունենանք: Նա երկար տարիների աշխատանքային փորձ ունի, բազմաթիվ բեմադրություններ է արել տարբեր երկրներում: Հատկապես, որ հիմա շատ է խոսվում հայրենադարձության մասին, մեր թեկնածուն կարող է վերադառնալ հայրենիք և այստեղ ծավալել իր գործունեությունը»:

Դերասանները նշեցին, որ մինչ այժմ իրենց հասանելի չէ անգամ թեկնածուների ամբողջական ցանկը: Նրանց խոսքով` թատրոնի տնօրեն Ֆրեդ Դավթյանը նույնպես պաշտոնապես իրենց չի իրազեկել թեկնածուների մասին: «Պարբերաբար հոդվածներ են դուրս գալիս այն մասին, որ Սուրեն Շահվերդյանը հավակնում է դառնալ մեր թատրոնի գեղարվեստական ղեկավարը, իբրև թե նա նախարարի ընկերն է, վարչապետի ծանոթն է և ամեն ինչ արվում է, որ նա ընտրվի այդ պաշտոնում: Մենք չգիտենք` որքանով է սա համապատասխանում իրականությանը: Նրա դեմ ոչինչ չունենք, բայց արդեն ունենք մեր թեկնածուին, որին ուղղակիորեն տեսնում ենք այս պաշտոնում»,-ասաց Լիլիան:

Նրանք համոզված են, որ Կարեն Ներսիսյանը աշխատանքի անցնելուց հետո կարժանանա թատրոնի ստեղծագործական կազմի մյուս թեկնածուների հավանությանը: Դերասանների խոսքով` իրենց համար ոչ ցանկալի սցենարի դեպքում պատրաստ են ամեն քայլի՝ մինչև անգամ բոյկոտի և գործադուլի: Նրանք տեղեկացրին, որ արդեն նամակ են պատրաստել վարչապետ Նիկոլ Փաշինյանի համար և եթե առաջիկայում նախարարությունից հստակ հիմնավորում չստացան, նամակը կուղարկեն Կառավարության ղեկավարին:

Հեղինակ Անահիտ Հակոբյան