«Սա ամենահետաքրքիր եթերաշրջանն է լինելու». առաջին լուսանկարները «Ոսկե դպրոցի» նոր եթերաշրջանի նկարահանումներից

Ucom ցանցում գործող «Արմենիա պրեմիում» հեռուստաալիքի եթերում հոկտեմբերի 9-ից կմեկնարկի «Ոսկե դպրոց» սիթքոմի երրորդ եթերաշրջանը։ Նախագծի պրոդյուսեր և գլխավոր դերակատար Վաչե Թովմասյանը խոստանում է բավականին հետաքրքիր զարգացումներով ու ծիծաղաշարժ եթերաշրջան։

Tert.am Life–ը ներկայացնում է նոր եթերաշրջանի լուսանկարներն ու մանրամասները։

Եթերաշրջան առ եթերաշրջան ստեղծագործական թիմի աշխատանքը բարդանում է։ Ամեն սերիայի հետ ավելացող ինֆորմացիան ճիշտ օգտագործելը մասնագիտական մոտեցում է պահանջում, սակայն Վաչեն հպարտությամբ նշում է, որ իրենց հաջողվում է պատվով հաղթահարել առաջադրված խնդիրները։ «Ըստ մեր սցենարիստների` 3-րդ եթերաշրջանը մինչև այս եղածներից ամենածիծաղելին է։ Բավականին հետաքրքիր է ստացվել; Շատ հետաքրքիր զարգացումներ են սպասվում»,– նկատեց նա։

Ucom ընկերության համահիմնադիր և գլխավոր տնօրեն Հայկ Եսայանն էլ հիշեցրեց, որ «Արմենիա Պրեմիումի» որակյալ հեռուստաարտադրանքը հասանելի է «Տեսավարձույթ» բաժնում. «Եթե անհրաժեշտ է թարմացնել հիշողությունը սիթքոմի նոր մասերը դիտելուց առաջ, այս բաժնի շնորհիվ դա իրագործելի է օրվա ցանկացած պահին»։

Խոսելով այս եթերաշրջանի շեշտադրումների մասին` Վաչեն նկատեց, որ նախորդ ենթաշրջանն ավարտվեց նրանով, որ ոսկիները գտնվեցին, սակայն հայտնվեցին աշակերտներից մեկի` Մաքսի մոտ։ «Վերջինս ամաչկոտ և գաղտնապահ մեկն է։ Դրա հետևանքով լրիվ այլ ու հետաքրքիր իրավիճակներ են առաջանում։ Նոր իրավիճակ ունենք նաև դպրոցի տնօրենի ընտրությունների դեպքում։ Այս ուստարում պաշտոնի  համար առաջադրվել է նաև փոխտնօրեն Կարախանյանը։ Քանի որ երկրում արդեն ամեն ինչ արդար է, ստիպված են արդար ընտրություններ անցկացնել։ Դպրոցի տնօրենի նախընտրական քարոզարշավ է մեկնարկում, որն ավելի է հետաքրքրանում դպրոցական կյանքը։ Ընտրություններն ակտուալ են, որոշել ենք անդրադառնալ թեմային, բայց իրականության հետ զուգահեռներ չեն տարվում»,– ընդգծեց պրոդյուսերը։

Նոր եթերաշրջանում «Ոսկե դպրոցի» դերասանական կազմում փոփոխություններ չեն սպասվում։ «Մեր կազմն արդեն իսկ հագեցած է։ Մենք միշտ աշխատում ենք, որպեսզի մեզ մոտ լավ դերասաններ նկարահանվեն, թեկուզ, եթե դերը մի սերիայի կտրվածքով է։ Միաժամանակ, մենք չեն ընտրում հայտնի մարդու ու ըստ նրա կառուցում դերը, մեզ առաջնորդողը սցենարն է։ Յուրաքանչյուր կերպար ընտրվում է սցենարին համապատասխան»,– ասաց Վաչեն։

Լուսանկարները` Շաքե Հովհաննիսյանի