«Դու դատարկ թողեցիր քո տեղը, բայց քո թողած սերը երբեք դատարկ չի մնալու». Սելին Դիոնի ու այլ աստղերի գրառումները Շառլ Ազնավուրի մասին

Աշխարհահռչակ ֆրանսահայ շանսոնյե Շառլ Ազնավուրի մահվան կապակցությամբ համաշխարհային հայտնի աստղերն իրենց ցավակցությունն ու երախտիքի խոսքն են ուղղել մեծանուն արտիստին: 

Երգչուհի Սելին Դիոնը ֆեյսբուքյան իր էջում լուսանկար է հրապարակել Ազնավուրի հետ և դրան կից գրառում արել. «Պարոն Շառլ, երեկ կրկին քեզ էին պատկանում աշխարհի բոլոր բեմերը, որոնք դու այդքան սիրում էիր: Դու Հայաստանի որդին էիր, որը դարձել էր ֆրանսերենով սիրային երգերի ամենահայտնի դեսպանը: Նրա ռոմանտիկ բալլադները սերունդների անբաժան մասն են դարձել, ուստի այժմ սգում է ողջ աշխարհը: Քո ոսկե երգերը վերածվեցին սերունդների ռոնմանտիկ երազանքների: Իմացիր, դու դատարկ թողեցիր քո տեղը, բայց քո թողած սերը երբեք դատարկ չի մնալու:

Պարոն Շառլ, դուք մշտ ինձ համար կմնաք հրաշալի: Հարգանքներս ու ցավակցություններս ձեր ընտանիքին»,-գրել է երգչուհին:

Իտալացի հանրահայտ երգիչ Անդրեա Բոչելին աշխարհահռչակ շանսոնյեին ցավակցական ուղերձ է հղել: Ինչպես հաղորդում է «Արմենպրես»-ը, Բոչելին «Ֆեյսբուք»-ի իր էջում հրապարակել է նույն բեմում Շառլ Ազնավուրի հետ լուսանկար ու կատարել է հետևյալ գրառումը. «Շառլ, Դուք միշտ զարմացրել եք մեզ Ձեր արվեստով ու փայլուն առոգանությամբ: Ընդամենը մի քանի օր առաջ՝ իմ ծննդյան օրը, Դուք ինձ ասացիք. «60 տարեկան, դու այնքան երիտասարդ ես, Անդրեա: Ես էլ եմ 60 տարեկան եղել, բայց դա 30, ավելի շուտ 34 տարի առաջ էր»: 

Իրականում Դուք մեր բոլորի մեջ ամենաերիտասարդն էիք և, չնայած գրեթե մեկ դար ներառող կարիերային, Դուք միշտ պատրաստ էիք համերգ տալ ցանկացած վայրում ու ցանկացած պահի: Իմ սերն ու հարգանքը Ձեր նկատմամբ երբեք չի նվազի, իսկ Ձեր կիրքն աշխատանքի նկատմամբ միշտ օրինակ կլինի ինձ համար:

 
«Եթե ցանկանում եք, որ հանդիսատեսը սիրի ձեզ, դուք պետք է սիրեք հանդիսատեսին»: Ձեր խոսքերն են, որ միշտ կրկնում էիք, և, անկասկած, այս արվեստի մեջ Դուք անսահմանափակ սեր եք ներարկել»:

Հանրահայտ հոլիվուդյան դերասան Ժան- Կլոդ Վան Դամն էլ Ինստագրամի իր էջում Ազնավուրի հետ համատեղ արխիվային լուսանկար է հրապարակել, որն ուղեկցել է հուզիչ գրառմամբ.

«Քեզ կկարոտեմ մինչեւ կյանքիս վերջը, Շառլ: Քո երգերը հավերժ կհնչեն: Իմ մտքերն ու աղոթքները նրա ընտանիքի եւ սիրելիների հետ են»:

Հիշեցնենք, որ աշխարհահռչակ ֆրանսահայ շանսոնյե Շառլ Ազնավուրը մահացել է հոկտեմբերի 1-ին: Նա 94 տարեկան էր: Երգիչը մահացել է Ֆրանսիայի հարավ-արևելքում գտնվող Մուրիես քաղաքի իր տանը՝ քնած ժամանակ: