«Անկախ լսարանի արձագանքից երգելու եմ». Էլեն Ասատրյանը կներկայանա որպես երգչուհի և տեսահոլովակ կունենա

Երիտասարդ դերասանուհի Էլեն Ասատրյանը շուտով լսարանին կներկայանա որպես երգչուհի: Այս օրերին նա զբաղված է իր երգի ու տեսահոլովակի նախապատրաստական աշխատանքներով, որի առաջին մանրամասները հայտնել է Tert.am Life-ին:

Էլենը կներկայանա «Սիրահարվել եմ» երգով, որի խոսքերի և երաժշտության հեղինակը Վլադիմիր Պողոսյանն է, գործիքավորումն արել է Նիկ Էգիբյանը, որը լինելու է նաև տեսահոլովակի ռեժիսորը։

«Ակտիվ, պարային ռիթմերով երգ է: Ռումբա ոճում է, բայց երաժշտության մեջ օգտագործել ենք նաև հայկական գործիքներ, օրինակ՝ կլառնետ: Երկար ժամանակ պահանջվեց, որպեսզի երգը բերենք վերջնական տեսքի: Վաղն արդեն կնկարահանենք տեսահոլովակը: Երգում ռեփ հատված կա օտարազգի երգչի մասնակցությամբ, որը կլինի նաև տեսահոլովակիս հերոսը։ Թե ով է նա, այս պահին չեմ ցանկանում բացահայտել»,-ասաց Էլենը:

Նա նշեց, որ տեսահոլովակում կներկայանա դիզայներ Անահիտ Սիմոնյանի հեղինակած հագուստներով: Ըստ Էլենի` որպես երգչուհի ներկայանալը ոչ թե էքսպերիմենտալ քայլ է, այլ երաժշտական կարիերա սկսելու լուրջ մտադրություն: Դերասանուհին ասաց, որ երգելու ցանկություն վաղուց է ունեցել:

«Ես փոքր տարիքից երգել եմ դպրոցական միջոցառումներին, ինձ մոտ դեռ այն ժամանակ սեր կար երգելու հանդեպ: Երգել եմ նաև այն ակումբներում, կորպորատիվ միջոցառումների ժամանակ, որտեղ հանդես եմ եկել որպես հաղորդավարուհի: Իհարկե այդ մասին քիչ մարդիկ են իմացել, հիմա որոշել եմ հանրային դարձնել դա: Երաժշտական կրթություն չունեմ, բայց ինձ մոտ ստացվում է: Եթե չստացվեր, հաստատ չէի գնա այդ քայլին»,– ասաց դերասանուհին:

Նրա խոսքով, երգչուհու կարիերայից  դերասանական աշխատանքը չի տուժի, քանի որ մտադիր է դրանք համատեղել. «Ես ունեմ նոր կարիերա սկսելու նպատակ, բայց դա չի նշանակում, որ իմ առաջին գործը պիտի դրանից տուժի, ես պիտի էլ չնկարահանվեմ սերիալներում կամ տեսահոլովակներում: Նման բան չի լինելու»:  

Ավելին՝ Էլենը կարծում է, որ որպես դերասանուհի ձեռք բերած որոշակի ճանաչումը կնպաստի երգարվեստում հաջողություն գրանցելուն: Նա նկատեց, որ ավելի վաղ չի սկսել երգչուհու կարիերա, քանի որ մասամբ  նաև ֆինանսական խնդիր է ունեցել:

«Ֆինանսական հարցերն ամբողջությամբ ես եմ հոգում ու հենց դա է եղել պատճառը, որ երգը գնելուց հետո երկար ամիսներ են պահանջվել, որպեսզի այն գործիքավորվի և անենք նախապատրաստական մյուս աշխատանքները: Ամեն բան անում եմ ինքս, մի փոքր դանդաղ քայլերով, բայց կարևորը՝ ինքնուրույն: Կարծում եմ՝ հիմա ճիշտ ժամանակ եմ ընտրել և մարդիկ, որոնք ինձ ճանաչում են նաև սերիալներից, ավելի մեծ հետաքրքրությամբ կլսեն երգս, քան եթե ես դա անեի երկու տարի առաջ»,-ասաց նա:

Էլենն ընդգծեց, որ անկախ լսարանի արձագանքից և քննադատությունից շարունակելու է գործունեությունը երգի բնագավառում. «Չեմ ուզում ռիսկային կամ անպատասխանատու հայտարարություն անել, բայց հաստատ ինչ-որ զանգված երգը կսիրի։ Ես դա զգացի նաև սոցիալական ցանցում եղած արձագանքից, բազմաթիվ նամակներից, երբ երգից մի հատված տեղադրել էի իմ էջում: Եթե չսիրվի, իրենց խնդիրն է: Այնպես չէ, որ ես բոլոր երգերը սիրում եմ: Ինձ համար ամենակարևորն  այն է, որ մարդիկ կոռեկտ արտահայտվեն թե՛ մեկնաբանություններում, թե՛ ինձ հետ խոսելիս և չվիրավորեն իմ անձը»:

Նրա փոխանցմամբ` տեսահոլովակի պրեմիերան նախատեսվում է նոյեմբերի սկզբին: