«Պետք լինի, մատուցողուհի էլ կաշխատեմ». Նաիրա Մովսիսյանը սկսել է նոր գործով զբաղվել

Դերասանուհի Նաիրա Մովսիսյանն այս փուլում զբաղվում է դիմահարդարմամբ: Ասում է՝ մասնագիտական այս ուղղությունն իր համար նոր չէ։ 5 տարի առաջ, երբ ուներ իր սեփական գեղեցկության սրահը, զբաղվում էր թե՛ վարսահարդարմամբ, թե՛ դիմահարդարմամբ: Tert.am Life-ի հետ զրույցում Նաիրան պատմել է, թե ինչու որոշեց վերապատրաստվել որպես դիմահարդար, ինչպես են արձագանքել շրջապատի մարդիկ իր որոշմանն ու խոսել դերասանական ոլորտում առկա խնդիրների մասին:

Դերասանուհին ասաց, որ դիմահարդարի մասնագիտությունն իրեն հետաքրքրել է դեռ տարիներ առաջ` ԱՄՆ-ում գտնվելու ժամանակ, որտեղ անցել է մասնագիտական դասընթացներ: Այս փուլում Նաիրան վերապատրաստվում է, թարմացնում գիտելիքները և արդեն սպասարկում հաճախորդների։ Նա ընդգծեց՝ դիմահարդարմանը մոտենում է լրջորեն ու պատրաստվում է խորանալ այդ մասնագիտության մեջ:

«Ինչ գործ էլ սկսում եմ, խորանում եմ այդ ուղղությամբ: Դերասանուհի լինելը  չի խանգարում մյուս ուղղություններով զբաղվել: Ես հոգեբանության կուրսեր ավարտեցի, առողջ ապրելակերպ ուսումնասիրեցի ու հիմա շարունակում եմ մարդկանց խորհուրդներ տալ, թե ինչպես ճիշտ սնվեն: Ցանկացած մասնագիտության մեջ, սկսած մեր՝ դերասանական գործից, պետք է անընդհատ վերապատրաստվել: Հիմա շարունակում եմ վերապատրաստվել դիմահարդարման ոլորտում, քանի որ այստեղ ամեն վայրկյան նոր թրենդներ են ի հայտ գալիս»,-ասաց նա:

Նաիրան համաձայն չէ այն տեսակետի հետ, որ լավ է զբաղվել մեկ աշխատանքով, բայց լիարժեք: Դերասանուհին համոզված է, որ մարդ պետք է կարողանա օգտագործել իր բոլոր շնորհները: Նա չթաքցրեց, որ դիմահարդարի աշխատանքը իր պարագայում նաև բիզնես նպատակ ունի և ապրուստի միջոց է հանդիսանում. «Խնդիրը հետևյալն էր՝ իմ մասնագիտությունն այնպիսին է, որ անընդհատ չես կարող գործ ունենալ, միաժամանակ  չես կարող նստել տանը ու սպասել, թե երբ պիտի առաջարկ լինի: Հասկացանք, որ թանկ վարձատրվող եմ, բայց պետք է ապրել մի կերպ: Ես դուրս չեմ եկել ոլորտից, երբ առաջարկ լինի, կընդունեմ: Չեմ կարող առանց իմ մասնագիտության, առավել ևս, որ թե՛ դա, թե՛ հոգեբանությունը շատ օգնում են նաև այստեղ` հաճախորդների հետ շփման հարցում»:

Նա ցավով նշեց, որ Հայաստանում դերասանի համար մշտական զբաղվածության ապահովման խնդիր կա. «Ես միշտ համեմատում եմ, որ դերասանը ջութակի լար է, եթե չլարեն, լարից ընկնում է: Մեր երկրում շատ են թողնում, որ դերասանները հանգիստ նստեն, հատկապես նրանց, ովքեր մասնագիտական կրթություն ունեն»:

Դերասանուհին նկատեց, որ հասարակության մեջ կարծրատիպային մոտեցում է ձևավորված, որ, օրինակ, ճանաչված դերասանը չի կարող զբաղվել այլ աշխատանքով և անկեղծացավ, որ իր շրջապատում նույնպես շատ մարդիկ չեն ողջունել նոր աշխատանքը:

«Իմ գործընկերներից ու մտերիմ ընկերուհիներից շատերը զանգում, ասում են՝ բա քեզ պե՞տք է, ճանաչված դերասանուհի ես, բայց ես վատ բան չեմ անում: Այո՛, մեր երկրում շատ բազմաբնույթ աշխատանքներ կան, բայց մեր մենթալիտետը շատերին խանգարում է ունենալ աշխատանք: Երբ ուրիշ երկրում ափսե ես լվանում, այն մարդիկ են քեզ քարկոծում, որոնցից ոչ ոք ձեռքդ չի բռնի, երբ սոված նստես: Այո՛, ես կարողանում եմ անել այն ամենը, ինչ իմ ձեռքից գալիս է: Պետք լինի, մատուցողուհի էլ կաշխատեմ: Ուզում եմ բոլորս այդպես մտածենք»,-ասաց նա:

Ի զարմանս շատերի, Նաիրան նշեց, որ իր ճանաչվածությունը դրականորեն չի ազդում դիմահարդարման աշխատանքում. «Դա նույնիսկ շատ վատ ազդեցություն է ունենում, որովհետև շատերին թվում է, որ ես պիտի աստղաբաշխական թվեր ուզեմ: Քանի որ ինքս էլ հասարակության մեջ եմ, գիտեմ՝ մարդիկ ինչպես են ապրում այս թանկացումների մեջ, այդ ամենը հաշվի եմ առնում: Երբ նոր գործ ես սկսում, շատ մարդիկ վերանում են քո կողքից: Արդեն քանի անգամ դա ապացուցվեց ինձ համար: Հիմա ես շատ մարդկանց մաղում եմ իմ կյանքից և ուրախ եմ դրա համար»:

Նաիրայի կարծիքով` Հայաստանում դիմահարդարման ոլորտը բավականին զարգացած է և լավ մասնագետներ կան: Դիտարկմանը, թե ինչպես է նա պատրաստվում գործել մրցակցային դաշտում, դերասանուհին արձագանքեց, որ իր համար ամենակարևորը հաճախորդի հավատը ձեռք բերելն է: